Vijay Gold Ring Scheme: సీఎం విజయ్‌ సరికొత్త పథకం... పుట్టిన బిడ్డకు గ్రాము బంగారం... ఎలా పొందాలంటే

Vijay Gold Ring Scheme: తమిళనాడులో నవజాత శిశువులకు ప్రభుత్వం నుంచి గ్రాము బంగారం అందించే పథకం సోమవారం, సెప్టెంబర్‌ 28న ప్రారంభమైంది. ‘థాయ్‌ మామన్‌ తంగ మోతిరం’ పేరుతో అమలు చేస్తున్న ఈ పథకం కింద అర్హత ఉన్న ప్రతి శిశువుకు ఒక గ్రాము బరువున్న బంగారు ఉంగరం అందించనున్నారు. మదురైలోని ప్రభుత్వ రాజాజీ ఆసుపత్రిలో ముఖ్యమంత్రి సి. జోసెఫ్‌ విజయ్‌ ఈ పథకాన్ని ప్రారంభించారు. తొలి దశలో 1.28 లక్షల ఉంగరాలను పంపిణీకి సిద్ధం చేశారు.

జూన్‌ 22 నుంచే పథకం వర్తింపు

ఈ పథకంలో ముఖ్యమైన విషయం కటాఫ్‌ తేదీ 2026 జూన్‌ 22 నుంచి తమిళనాడులోని ప్రభుత్వ ఆసుపత్రుల్లో జన్మించిన అర్హత కలిగిన శిశువులకు ఈ ప్రయోజనం వర్తిస్తుంది. అంటే పథకం అధికారికంగా సెప్టెంబర్‌ 28న ప్రారంభమైనప్పటికీ, జూన్‌ 22 నుంచి పుట్టిన పిల్లలను కూడా ఇందులోకి తీసుకున్నారు. ప్రతి ఉంగరం 22 క్యారెట్ల బంగారంతో, 916 హాల్‌మార్క్‌ ప్రమాణాలతో తయారు చేస్తారు. గుర్తింపు కోసం ప్రత్యేక సీరియల్‌ నంబర్‌ ఉంటుంది. ఉంగరాలను ట్యాంపర్‌ ప్రూఫ్‌ ప్యాకేజింగ్‌లో అందజేయనున్నట్లు ప్రభుత్వం తెలిపింది.

ఎవరు అర్హులు?

ఈ పథకం తమిళనాడులోని ప్రభుత్వ ఆరోగ్య వ్యవస్థలో ప్రసవించిన కుటుంబాలకు వర్తిస్తుంది. ముఖ్యంగా శిశువు తల్లి తమిళనాడులో శాశ్వత నివాసి అయి ఉండాలి. గర్భధారణ సమయంలో PICME వ్యవస్థలో నమోదు చేసుకుని, RCH ID పొందినవారికి అర్హత ఉంటుంది. అంటే రాష్ట్రంలో ఎక్కడైనా ప్రైవేట్‌ ఆసుపత్రిలో ప్రసవం జరిగితే ఆటోమేటిక్‌గా ఉంగరం వస్తుందని కాదు. ప్రభుత్వ ఆసుపత్రి లేదా సంబంధిత ప్రభుత్వ ఆరోగ్య కేంద్రంలో ప్రసవం జరగడం, తల్లి గర్భధారణ వివరాలు ప్రభుత్వ రిజిస్ట్రేషన్‌ వ్యవస్థలో ఉండటం ముఖ్యమైన అంశాలు.

ఎలా పొందాలి?

కొత్తగా పుట్టే పిల్లల కోసం ప్రత్యేకంగా మరో దరఖాస్తు చేసుకోవాల్సిన అవసరం లేదని అందుబాటులో ఉన్న వివరాలు చెబుతున్నాయి. ఆసుపత్రి రికార్డులు, తల్లి PICME నమోదు, RCH ID ఆధారంగా అర్హతను నిర్ధారించిన తర్వాత ఉంగరాన్ని అందజేస్తారు. సెప్టెంబర్‌ 28 తర్వాత ప్రభుత్వ ఆసుపత్రుల్లో పుట్టే అర్హ శిశువులకు తల్లి, బిడ్డ డిశ్చార్జ్‌ అయ్యే సమయంలోనే ఉంగరం ఇవ్వాలని ప్రభుత్వం నిర్ణయించింది. అయితే జూన్‌ 22 నుంచి సెప్టెంబర్‌ 27 వరకు పుట్టిన పిల్లల కోసం ప్రత్యేక పంపిణీ ఏర్పాట్లు చేశారు. రాష్ట్రవ్యాప్తంగా 107 కేంద్రాల ద్వారా ఈ ఉంగరాలను పంపిణీ చేయనున్నారు. ప్రతి కేంద్రం రోజుకు సుమారు 100 మంది శిశువులకు సేవలు అందించేలా ఏర్పాట్లు చేసినట్లు అధికారులు తెలిపారు.

ఏడాదికి ఎంత ఖర్చు?

ఈ పథకానికి తమిళనాడు ప్రభుత్వం ఏడాదికి రూ.755.83 కోట్ల బడ్జెట్‌ను కేటాయించింది. పూర్తి స్థాయిలో సంవత్సరానికి సుమారు 4.41 లక్షల ఒక గ్రాము, 22 క్యారెట్ల ఉంగరాలు అవసరమవుతాయని అంచనా. తొలి దశలో నాలుగు నెలల అవసరాల కోసం 1,28,499 ఉంగరాల కొనుగోలుకు ఆర్డర్లు ఇచ్చినట్లు ప్రభుత్వ సంబంధిత సమాచారం వెల్లడించింది.

‘థాయ్‌ మామన్‌’ పేరు ఎందుకు?

తమిళ సంప్రదాయంలో ‘థాయ్‌ మామన్‌ సీర్‌’కు ప్రత్యేక స్థానం ఉంది. అంటే తల్లి సోదరుడు లేదా మేనమామ కొత్తగా పుట్టిన బిడ్డకు బహుమతులు ఇవ్వడం ఆనవాయితీ. అందులో బంగారం కూడా ఉండొచ్చు. అదే సాంస్కృతిక భావనను ప్రభుత్వ సంక్షేమ పథకంతో అనుసంధానిస్తూ ‘థాయ్‌ మామన్‌ తంగ మోతిరం’ అనే పేరు పెట్టారు. ప్రభుత్వం ఈ పథకాన్ని మాతృత్వాన్ని గౌరవించడం, ప్రభుత్వ ఆసుపత్రుల్లో ప్రసవాలను ప్రోత్సహించడం, ప్రభుత్వ వైద్య సేవలపై ప్రజల విశ్వాసాన్ని పెంచడం వంటి లక్ష్యాలతో అనుసంధానించింది. ఇదే సమయంలో పథకం భారీ స్థాయిలో అమలు కానుండటంతో అర్హత, నమోదు, పంపిణీ ప్రక్రియపై కుటుంబాలు స్పష్టమైన సమాచారం కలిగి ఉండటం ముఖ్యంగా మారింది.