Viksit Bharat 2047 : నేడు నీతి ఆయోగ్ కీలక సమావేశం.. 'వికసిత భారత్ 2047' రోడ్‌మ్యాప్‌పై మోడీ మంతనాలు

Viksit Bharat 2047 : భారతదేశాన్ని 2047 నాటికి సర్వతోముఖాభివృద్ధి చెందిన దేశంగా మార్చడమే లక్ష్యంగా దిల్లీలోని రాష్ట్రపతి భవన్ సాంస్కృతిక కేంద్రంలో నీతి ఆయోగ్ 11వ గవర్నింగ్ కౌన్సిల్ సమావేశం అత్యంత ప్రతిష్టాత్మకంగా ప్రారంభమైంది. ప్రధానమంత్రి నరేంద్ర మోదీ అధ్యక్షతన జరుగుతున్న ఈ కీలక భేటీకి వివిధ రాష్ట్రాల ముఖ్యమంత్రులు, కేంద్రపాలిత ప్రాంతాల లెఫ్టినెంట్ గవర్నర్లు, నిర్వాహకులు, ఉన్నతాధికారులు పెద్ద సంఖ్యలో హాజరయ్యారు. ఈ ఏడాది సమావేశానికి వికసిత భారత్ @2047 కోసం సమగ్ర మానవాభివృద్ధి అనే థీమ్‌ను ఎంచుకున్నారు.

మానవాభివృద్ధికి నిర్దేశించిన నాలుగు ముఖ్య స్తంభాలు

దేశ ప్రగతిని వేగవంతం చేయడానికి ఈ సమావేశంలో నాలుగు ప్రధానమైన అంశాలపై ప్రత్యేకంగా దృష్టి సారించారు. భవిష్యత్తు కాలానికి అనుగుణంగా యువతలో నైపుణ్యాలను పెంచడం, స్థానిక ఉపాధి వ్యవస్థాపకత ఆధారిత వికేంద్రీకృత అభివృద్ధిని ప్రోత్సహించడం, దేశ ప్రజల ఆరోగ్యం-పోషకాహారం సంక్షేమంపై శ్రద్ధ పెట్టడం, చివరగా సమాజంలో అందరికీ సమానత్వం గౌరవాన్ని అందించడం వంటి అంశాలను ఈ నాలుగు స్తంభాలుగా పేర్కొన్నారు. దీనితో పాటు పాఠశాల విద్య, ఉన్నత విద్య, క్రీడల అభివృద్ధిపై కూడా సుదీర్ఘంగా చర్చిస్తున్నారు.

ముఖ్యమంత్రుల ప్రసంగాలకు ఆన్-స్క్రీన్ టైమర్ నిఘా

ఈ సమావేశంలో ఒక ఆసక్తికరమైన నిబంధనను తీసుకువచ్చారు. వివిధ రాష్ట్రాల నుంచి వచ్చిన ముఖ్యమంత్రులు తమ రాష్ట్ర సమస్యలు, సూచనలను వివరించడానికి కేవలం 7 నిమిషాల సమయాన్ని మాత్రమే కేటాయించారు. ఈ సమయాన్ని పర్యవేక్షించడానికి పెద్ద స్క్రీన్లపై టైమర్‌ను ఏర్పాటు చేశారు. ఎవరైనా ముఖ్యమంత్రి పెద్ద పెద్ద ప్రసంగ పత్రాలు తీసుకువస్తే, వాటిని చదవడానికి సమయం సరిపోకపోతే, ఆ పత్రాలను ఆటోమేటిక్‌గా చదివినట్లుగా భావించి రికార్డుల్లోకి తీసుకుంటారు. అలాగే పాలనలో ఆర్టిఫిషియల్ ఇంటెలిజెన్స్, డేటా గవర్నెన్స్ వాడకాన్ని పెంచాలని ప్రధాని రాష్ట్రాలకు సూచించారు.

పాఠశాలల్లో అంగన్‌వాడీల విలీనం

చిన్న పిల్లల ప్రాథమిక విద్యను బలోపేతం చేసేందుకు అంగన్‌వాడీ కేంద్రాలను పాఠశాలల ప్రాంగణంలోకి మార్చే ప్రక్రియ వేగంగా జరుగుతోంది. తాజా గణాంకాల ప్రకారం ఇప్పటికే దేశవ్యాప్తంగా 2.9 లక్షల అంగన్‌వాడీ కేంద్రాలు ప్రభుత్వ పాఠశాలల ఆవరణలోనే నడుస్తున్నాయి. వీటికి అదనంగా ఈ ఆర్థిక సంవత్సరంలో మరో 30 వేల కొత్త కేంద్రాలను పాఠశాలలతో అనుసంధానించారు. అంగన్‌వాడీల మౌలిక వసతులను మెరుగుపరచడానికి ప్రారంభించిన పంఖుడి పోర్టల్ ద్వారా ఎన్‌జీఓలు, ఎన్నారైలు, కార్పొరేట్ సంస్థల నుంచి భారీగా సాయం అందుతోందని, ఇప్పటికే 70 వేల కేంద్రాలకు సీఎస్‌ఆర్ నిధుల మద్దతు లభించిందని అధికారులు వెల్లడించారు.

దేశంలో గణనీయంగా తగ్గిన బాలల కుపోషణం

గడిచిన కొన్ని నెలల్లో చిన్న పిల్లల్లో పోషకాహార లోపం రేటు దేశంలో గణనీయంగా తగ్గిందని నీతి ఆయోగ్ తన నివేదికలో ప్రశంసించింది. దీని ప్రకారం పిల్లల్లో ఎదుగుదల లోపం 2.92 శాతం నుంచి 29.73 శాతానికి పడిపోయింది. అలాగే తక్కువ బరువు ఉండే పిల్లల శాతం 14.03 నుంచి 12.23 శాతానికి, తీవ్ర పోషకాహార లోపం 4.81 శాతం నుంచి 4.07 శాతానికి తగ్గింది. దేశవ్యాప్తంగా కొత్తగా ఏర్పాటు చేసిన 19,500 పోషణ్ వాటికలు, ప్రాంతాల వారీగా అమలు చేసిన ప్రత్యేక పోషకాహార పథకాల వల్లే ఇది సాధ్యమైందని స్పష్టం చేశారు.

పోషణ్ ట్రాకర్‌తో డిజిటల్ హెల్త్ ఐడీల అనుసంధానం

ఆరోగ్య రంగాన్ని డిజిటలైజ్ చేసే ప్రక్రియలో భాగంగా ఆయుష్మాన్ భారత్ హెల్త్ అకౌంట్ (ABHA) ఐడీలు, విద్యార్థుల అపార్ (APAAR) ఐడీలను అంగన్‌వాడీల పోషణ్ ట్రాకర్ వ్యవస్థతో విజయవంతంగా అనుసంధానించారు. ప్రస్తుతం 42.8 శాతం మంది లబ్ధిదారులకు అభా ఐడీలు, 28.6 శాతం మందికి అపార్ ఐడీలు క్రియేట్ అయ్యాయి. అలాగే వెనుకబడిన గిరిజన తెగల కోసం ఉద్దేశించిన పీఎం జన్మన్ పథకం కింద మంజూరైన 2,498 అంగన్‌వాడీ కేంద్రాలలో ఇప్పటికే 2,486 కేంద్రాలు విజయవంతంగా నడుస్తున్నాయని, మిగిలిన భవనాల నిర్మాణం వేగంగా సాగుతోందని నీతి ఆయోగ్ భేటీలో చర్చించారు.