మమత రాజీనామాకు నో.. ఈసీ నుంచి షాక్! మే 9న బెంగాల్‌లో కొత్త సర్కార్?

West Bengal Election 2026: పశ్చిమ బెంగాల్ రాజకీయాల్లో చారిత్రాత్మక మార్పు దిశగా అడుగులు పడుతున్నాయి. 2026 అసెంబ్లీ ఎన్నికల ప్రక్రియ ముగిసిన నేపథ్యంలో, భారత ఎన్నికల సంఘం (ECI) కొత్త శాసనసభ ఏర్పాటుకు సంబంధించి 'కాన్‌స్టిట్యూషన్ ఆఫ్ న్యూ అసెంబ్లీ' అధికారిక నోటిఫికేషన్‌ను విడుదల చేసింది. ఈ నోటిఫికేషన్ కాపీని ఎన్నికల అధికారులు రాజ్‌భవన్‌లో గవర్నర్‌కు సమర్పించడంతో, రాష్ట్రంలో కొత్త ప్రభుత్వం కొలువుదీరేందుకు రాజ్యాంగపరమైన మార్గం సుగమమైంది.

ఎన్నికల ఫలితాల్లో స్పష్టమైన ఆధిక్యం లభించినప్పటికీ, ముఖ్యమంత్రి మమతా బెనర్జీ తన పదవికి రాజీనామా చేసేందుకు నిరాకరించడం ఇప్పుడు హాట్ టాపిక్ అయింది. అయితే, ఈసీ తాజా నోటిఫికేషన్‌తో ప్రస్తుత అసెంబ్లీ రద్దు కావడం, కొత్త ఎమ్మెల్యేల జాబితా గవర్నర్ వద్దకు చేరడం మమతకు రాజకీయంగా గట్టి షాక్ అని విశ్లేషకులు భావిస్తున్నారు. మరోవైపు, అమిత్ షా నేతృత్వంలో బీజేపీ అగ్రనేతలు ఇప్పటికే కోల్‌కతాలో మకాం వేసి, మే 9వ తేదీన నూతన ప్రభుత్వ ప్రమాణ స్వీకార కార్యక్రమం కోసం భారీ ఏర్పాట్లు చేస్తున్నారు.

రవీంద్రనాథ్ ఠాగూర్ జయంతి (మే 9) సందర్భంగా పశ్చిమ బెంగాల్‌లో తొలి బీజేపీ ప్రభుత్వం కొలువుదీరాలని ఆ పార్టీ నిర్ణయించింది. కొత్త ముఖ్యమంత్రి ఎవరనే దానిపై సస్పెన్స్ కొనసాగుతున్నప్పటికీ, ఈసీ నోటిఫికేషన్ రావడంతో ఈ ప్రక్రియ మరింత వేగవంతమైంది. మెజారిటీ పార్టీని ప్రభుత్వ ఏర్పాటుకు ఆహ్వానించాల్సిందిగా బీజేపీ నేతలు గవర్నర్‌ను కోరనున్నారు.