El Nino: ప్రపంచాన్ని గడగడలాడిస్తున్న 'ఎల్‌నినో'.. డిసెంబరులో గరిష్ఠ స్థాయికి చేరిక!

El Nino: ప్రపంచవ్యాప్తంగా వాతావరణాన్ని తీవ్రంగా ప్రభావితం చేస్తూ, గడగడలాడిస్తున్న ఎల్‌నినో (El Nino) వేగంగా బలపడుతోంది. దీనివల్ల రాబోయే రోజుల్లో ప్రపంచంలోని చాలా ప్రాంతాల్లో సాధారణం కన్నా అత్యధిక ఉష్ణోగ్రతలు నమోదుకానున్నాయని ప్రపంచ వాతావరణ సంస్థ (WMO) తీవ్ర హెచ్చరిక జారీ చేసింది. ఈ ఏడాది డిసెంబరు నాటికి ఎల్‌నినో తన గరిష్ఠ స్థాయికి చేరుకోనుందని స్పష్టం చేసింది.

వచ్చే ఏడాది ఫిబ్రవరి వరకు ఈ వాతావరణ పోకడ కొనసాగడానికి దాదాపు 100 శాతం అవకాశాలు ఉన్నట్లు WMO వివరించింది. దీంతో 1950 తర్వాత కాలంలో అత్యంత బలమైన 'సూపర్ ఎల్‌నినో'గా ఇది నిలిచిపోయే ప్రమాదం ఉందని ఆందోళన వ్యక్తం చేసింది.

అక్టోబరు నుంచి డిసెంబరు మధ్య కాలంలో ఎల్‌నినోకు కేంద్ర బిందువుగా ఉన్న మధ్య, తూర్పు ఉష్ణమండల పసిఫిక్ ప్రాంతంలో ఉష్ణోగ్రతలు సాధారణం కన్నా 3.7 డిగ్రీల సెల్సియస్‌ మేర పెరిగే అవకాశం ఉందని పేర్కొంది.

పసిఫిక్ మహాసముద్రంలో నిక్షిప్తమైన వేడి బయటకు విడుదలవుతుండటంతో భూమి దాదాపు 'ఎర్రగా' మారిందని శాస్త్రవేత్త ర్యాన్ మవీ తెలిపారు. గతంలో ఎన్నడూ లేనివిధంగా ఈ వాతావరణ పోకడ కొత్త ప్రాంతాలకు విస్తరిస్తోందని నిపుణులు హెచ్చరిస్తున్నారు.

ఈ బలపడిన ఎల్‌నినో ప్రభావం వల్ల భారతదేశంలో వర్షపాత సరళిపై తీవ్ర ప్రభావం పడే అవకాశం ఉంది. ఇప్పటికే జూన్ - సెప్టెంబరు మధ్య భారత్‌లో దీర్ఘకాల సరాసరితో పోలిస్తే సాధారణం కన్నా తక్కువ వర్షాలు నమోదయ్యాయి. ఈ పరిణామాల నేపథ్యంలో దేశంలో కరువు పరిస్థితులు, అసాధారణ వేడిగాలులు (Heatwaves), మరియు ఆహార భద్రతపై ప్రభావం పడే ముప్పు పొంచి ఉందని నిపుణులు హెచ్చరిస్తున్నారు.