Nellore: అర్ధరాత్రి వేగంగా వచ్చిన టిప్పర్.. నెల్లూరు హైవేపై రెండు దుప్పిలు మృతి!

నెల్లూరు జిల్లా: దుత్తలూరు మండలం నర్రవాడ వద్ద 565 జాతీయ రహదారిపై విషాద ఘటన చోటుచేసుకుంది. అర్ధరాత్రి సమయంలో వేగంగా వెళ్తున్న ఓ టిప్పర్ ఢీకొట్టడంతో రెండు చుక్కల దుప్పిలు అక్కడికక్కడే మృతి చెందాయి. రహదారి దాటుతున్న సమయంలో ఈ ప్రమాదం జరిగినట్లు స్థానికులు చెబుతున్నారు.అటవీ ప్రాంతాలకు సమీపంగా ఉన్న ఈ ప్రాంతంలో తరచూ అడవి జంతువులు రహదారిపైకి వస్తుంటాయని గ్రామస్థులు తెలిపారు. ముఖ్యంగా రాత్రి వేళల్లో వాహనాలు అధిక వేగంతో ప్రయాణించడం వల్ల ఇలాంటి ప్రమాదాలు జరుగుతున్నాయని ఆవేదన వ్యక్తం చేస్తున్నారు. ఘటన అనంతరం రహదారిపై కొంతసేపు విషాద వాతావరణం నెలకొంది. సమాచారం అందుకున్న అటవీ శాఖ సిబ్బంది వెంటనే ఘటనాస్థలానికి చేరుకుని పరిశీలించారు.

మృతి చెందిన దుప్పిలను స్వాధీనం చేసుకుని పోస్టుమార్టం నిమిత్తం తరలించినట్లు అధికారులు తెలిపారు. ఈ ఘటనపై కేసు నమోదు చేసి దర్యాప్తు చేపట్టారు. ప్రమాదానికి కారణమైన వాహనం వివరాలు సేకరిస్తున్నట్లు సమాచారం.అటవీ ప్రాంతాల సమీపంలోని జాతీయ రహదారులపై వాహనదారులు అప్రమత్తంగా ఉండాలని, ముఖ్యంగా రాత్రి సమయంలో వేగ నియంత్రణ పాటించాలని అటవీ శాఖ అధికారులు సూచిస్తున్నారు. అడవి జంతువుల సంరక్షణ అందరి బాధ్యత అని అధికారులు పేర్కొన్నారు.