Kondapuram: డప్పు కళాకారుల పింఛన్లలో అనర్హుల తొలగింపునకు నిరసన

కొండాపురం: డప్పు కళాకారుల పింఛన్ల కోసం అర్హత లేని వారు దరఖాస్తు చేసుకున్నారని ఆరోపిస్తూ కొండాపురం మండలానికి చెందిన మాదిగ కులస్తులు సోమవారం నిరసన ర్యాలీ నిర్వహించారు. పింఛన్ల దరఖాస్తుల పరిశీలనలో నిబంధనల ప్రకారం అర్హతలను పరిశీలించి, అనర్హుల దరఖాస్తులను తొలగించాలని వారు అధికారులను కోరారు.

రాష్ట్ర ప్రభుత్వం కొత్త పింఛన్లకు అర్హులైన వారి నుంచి దరఖాస్తులు స్వీకరించేందుకు అవకాశం కల్పించడాన్ని స్వాగతిస్తున్నామని నిరసనకారులు తెలిపారు.డప్పు కళాకారులుగా,చెప్పులు కుట్టుకుంటూ జీవనం సాగిస్తున్న పేద మాదిగ కుటుంబాలకు పింఛన్ మంజూరు చేయడం ఎంతో ప్రయోజనకరమని పేర్కొన్నారు.

అయితే మండలంలోని మర్రిగుంట, నేకునంపేటతో పాటు మరికొన్ని గ్రామాల్లో అర్హత లేని మాల కులానికి చెందిన కొందరు డప్పు కళాకారుల పింఛన్లకు దరఖాస్తు చేసుకున్నారని వారు ఆరోపించారు. అనర్హులు పింఛన్లు పొందితే నిజమైన అర్హులకు అవకాశం కోల్పోయే పరిస్థితి ఏర్పడుతుందని ఆందోళన వ్యక్తం చేశారు.

ఈ నేపథ్యంలో సోమవారం ఉదయం జిల్లా పరిషత్ ఉన్నత పాఠశాల నుంచి మండల పరిషత్ కార్యాలయం వరకు డప్పులు వాయిస్తూ ర్యాలీగా వెళ్లారు. అనంతరం ఎంపీడీఓను కలిసి వినతిపత్రం సమర్పించారు. దరఖాస్తుల పరిశీలన సందర్భంగా ప్రతి దరఖాస్తుదారుడి అర్హతను నిబంధనల ప్రకారం క్షుణ్ణంగా పరిశీలించాలని,అర్హత లేని దరఖాస్తులను తిరస్కరించి, వాస్తవంగా అర్హులైన డప్పు కళాకారులకు పింఛన్లు మంజూరు చేయాలని వారు ఎంపీడీఓను కోరారు.అర్హులైన పేదలకు ప్రభుత్వం అందిస్తున్న పింఛన్ పథకం ప్రయోజనాలు ఎలాంటి వివక్షకు తావులేకుండా నిజమైన లబ్ధిదారులకు చేరేలా అధికారులు చర్యలు తీసుకోవాలని వారు విజ్ఞప్తి చేశారు.ఈ కార్యక్రమంలో మండలంలోని మాదిగ కులస్తులు పాల్గొన్నారు.