Nellore: కుప్పం తర్వాత దగదర్తి ఎయిర్‌పోర్ట్‌కే ప్రాధాన్యత: మంత్రి ఆనం ప్రకటన!

నెల్లూరు: నెల్లూరు జిల్లా దగదర్తి ఎయిర్‌పోర్ట్ నిర్మాణ పనులను వేగవంతం చేసేందుకు చర్యలు చేపడుతున్నామని రాష్ట్ర దేవాదాయ శాఖ మంత్రి ఆనం రామనారాయణరెడ్డి తెలిపారు. రాష్ట్రంలో రాబోయే తదుపరి దశ విమానాశ్రయ ప్రాజెక్టుల్లో కుప్పం తర్వాత దగదర్తి ఎయిర్‌పోర్ట్‌కే ప్రాధాన్యత ఇచ్చి పనులు చేపడుతున్నామని వెల్లడించారు.

నెల్లూరు నగరంలోని సంతపేటలోని తన క్యాంపు కార్యాలయంలో ఆదివారం నిర్వహించిన పాత్రికేయుల సమావేశంలో మంత్రి ఆనం రామనారాయణరెడ్డి దగదర్తి ఎయిర్‌పోర్ట్ నిర్మాణం, అభివృద్ధికి సంబంధించిన వివరాలను వెల్లడించారు.

దగదర్తి ఎయిర్‌పోర్ట్ పనులను వెంటనే వేగవంతం చేయాలని కేంద్ర ప్రభుత్వ పౌర విమానయాన మంత్రిత్వ శాఖతో సంప్రదింపులు జరుపుతున్నట్లు మంత్రి తెలిపారు. కేంద్రంతో సమన్వయం చేసుకుంటూ ప్రాజెక్టును త్వరితగతిన ముందుకు తీసుకెళ్లేందుకు చర్యలు తీసుకుంటున్నామని చెప్పారు.

ఎయిర్‌పోర్ట్ నిర్మాణానికి అవసరమైన అదనపు భూముల సేకరణకు ప్రభుత్వం, జిల్లా కలెక్టర్‌కు పూర్తి అనుమతులు మంజూరు చేసిందని ఆనం రామనారాయణరెడ్డి తెలిపారు. భూసేకరణ ప్రక్రియను కూడా ముందుకు తీసుకెళ్తున్నామని పేర్కొన్నారు.

దగదర్తి ఎయిర్‌పోర్ట్ నిర్మాణానికి సంబంధించి అన్ని రకాల ప్రాథమిక ప్రయత్నాలు ఇప్పటికే పూర్తయ్యాయని మంత్రి వెల్లడించారు. దగదర్తి ఎయిర్‌పోర్ట్ నిర్మాణం పూర్తయితే నెల్లూరు జిల్లా అభివృద్ధికి మరింత ఊతం లభించనుందని మంత్రి తెలిపారు. విమానాశ్రయానికి సంబంధించిన పనులను వేగవంతం చేసి, ప్రాజెక్టును ముందుకు తీసుకెళ్లేందుకు ప్రభుత్వం కట్టుబడి ఉందని స్పష్టం చేశారు.

ఈ సమావేశంలో శాసనమండలి సభ్యులు బీద రవిచంద్ర, గోపాలపురం ఎమ్మెల్యే వెంకటరాజు, నెల్లూరు రూరల్ ఎమ్మెల్యే కోటంరెడ్డి శ్రీధర్ రెడ్డి, సర్వేపల్లి ఎమ్మెల్యే సోమిరెడ్డి చంద్రమోహన్ రెడ్డి, కావలి ఎమ్మెల్యే దగుమాటి వెంకటకృష్ణారెడ్డి, కందుకూరు ఎమ్మెల్యే ఇంటూరి నాగేశ్వరరావు, ఉదయగిరి ఎమ్మెల్యే కాకర్ల సురేష్, వెంకటగిరి ఎమ్మెల్యే కురుగొండ్ల రామకృష్ణ తదితరులు పాల్గొన్నారు.