Nellore: నర్రవాడ పీహెచ్‌సీని ఆకస్మికంగా తనిఖీ చేసిన ఎమ్మెల్యే కాకర్ల సురేష్
Nellore: దుత్తలూరు మండలం నర్రవాడ ప్రాథమిక ఆరోగ్య కేంద్రాన్ని ఆకస్మికంగా తనిఖీ చేసిన ఉదయగిరి ఎమ్మెల్యే కాకర్ల సురేష్. రోగులతో మాట్లాడి సమస్యలను తెలుసుకున్న వైనం.
Nellore: నర్రవాడ పీహెచ్‌సీని ఆకస్మికంగా తనిఖీ చేసిన ఎమ్మెల్యే కాకర్ల సురేష్
Nellore: నెల్లూరు జిల్లా దుత్తలూరు మండలం నర్రవాడ గ్రామంలోని ప్రాథమిక ఆరోగ్య కేంద్రాన్ని ఉదయగిరి శాసనసభ్యులు కాకర్ల సురేష్ మంగళవారం ఆకస్మికంగా తనిఖీ చేశారు. ఎటువంటి ముందస్తు సమాచారం లేకుండా ఆరోగ్య కేంద్రానికి చేరుకున్న ఎమ్మెల్యే అక్కడ అందుతున్న వైద్య సేవలు, సిబ్బంది పనితీరు, రోగులకు అందుతున్న సౌకర్యాలను స్వయంగా పరిశీలించారు.
ఈ సందర్భంగా ఆరోగ్య కేంద్రంలోని జనరల్ వార్డు, కాన్పుల గది, వైద్య పరీక్షల గదులు, రోగులకు అందుబాటులో ఉన్న ఇతర సౌకర్యాలను పరిశీలించారు. రోగులకు అందుతున్న వైద్య సేవలు, అందుబాటులో ఉన్న మందులు, వైద్య సిబ్బంది హాజరు, పారిశుద్ధ్య నిర్వహణ, అత్యవసర వైద్య సేవలపై సంబంధిత వైద్యులు, అధికారులను అడిగి వివరాలు తెలుసుకున్నారు.
ప్రాథమిక ఆరోగ్య కేంద్రానికి వచ్చే పేద, మధ్యతరగతి ప్రజలకు ఎలాంటి ఇబ్బందులు కలగకుండా సకాలంలో వైద్య సేవలు, అవసరమైన మందులు అందేలా చర్యలు తీసుకోవాలని ఎమ్మెల్యే సూచించారు. ముఖ్యంగా గర్భిణులు, బాలింతలు, చిన్నారులు, వృద్ధులకు వైద్య సేవలు అందించడంలో ప్రత్యేక శ్రద్ధ వహించాలని అధికారులను ఆదేశించారు.అనంతరం వైద్యం కోసం ఆరోగ్య కేంద్రానికి వచ్చిన రోగులు, వారి కుటుంబ సభ్యులు, స్థానిక ప్రజలను ఎమ్మెల్యే నేరుగా కలిసి వారి సమస్యలను అడిగి తెలుసుకున్నారు.
ఆసుపత్రిలో వైద్య సేవలు ఎలా అందుతున్నాయి, మందులు అందుతున్నాయా, వైద్య సిబ్బంది అందుబాటులో ఉంటున్నారా, ఇతర సమస్యలు ఏమైనా ఉన్నాయా అనే విషయాలను స్వయంగా తెలుసుకున్నారు.ప్రజలు తమ సమస్యలను ఎమ్మెల్యే దృష్టికి తీసుకురాగా, వాటిని సానుకూలంగా విన్న ఆయన సంబంధిత అధికారులతో మాట్లాడి అవసరమైన చర్యలు తీసుకోవాలని సూచించారు. ప్రజలకు ప్రభుత్వ వైద్య వ్యవస్థపై నమ్మకం కలిగేలా అధికారులు, సిబ్బంది బాధ్యతాయుతంగా పనిచేయాలని తెలిపారు.
ప్రజలకు అందుబాటులో ఉండే ప్రభుత్వ వైద్యం, పేదలకు మెరుగైన ఆరోగ్య సేవలు అందించడమే కూటమి ప్రభుత్వ ప్రధాన లక్ష్యమని ఎమ్మెల్యే కాకర్ల సురేష్ పేర్కొన్నారు. గ్రామీణ ప్రాంతాల్లోని ప్రాథమిక ఆరోగ్య కేంద్రాలను మరింత బలోపేతం చేసి ప్రజలకు నాణ్యమైన వైద్యం అందేలా ప్రభుత్వం కృషి చేస్తోందన్నారు.నర్రవాడ పీహెచ్‌సీ పరిధిలో ప్రజలకు వైద్య సేవల విషయంలో ఎలాంటి ఇబ్బందులు ఉన్నా తన దృష్టికి తీసుకురావాలని, అవసరమైన సమస్యలను సంబంధిత అధికారుల సమన్వయంతో పరిష్కరించేందుకు కృషి చేస్తానని ఎమ్మెల్యే కాకర్ల సురేష్ తెలిపారు.
