Nellore: నెల్లూరులో బీసీల నిరసన గళం.. వైసీపీ తీరుపై తీవ్ర ఆగ్రహం!

Nellore: నెల్లూరు బాలాజీ నగర్‌‌లోని సావిత్రీబాయి పూలే విగ్రహం వద్ద బీసీ సంఘాల నాయకులు భారీ నిరసన ప్రదర్శన చేపట్టారు. వైసీపీ హయాంలో బీసీ రిజర్వేషన్లకు కోత పెట్టారంటూ వారు తీవ్ర ఆగ్రహం వ్యక్తం చేశారు.

ఈ నిరసన కార్యక్రమంలో భాగంగా బీసీ సెల్ అధ్యక్షులు కప్పిర శ్రీనివాసులుతో పాటు పలువురు ప్రముఖ బీసీ నేతలు సావిత్రీబాయి పూలే విగ్రహానికి పాలాభిషేకం చేసి, పూలమాలలు వేసి నివాళులర్పించారు. వైసీపీ హయాంలో బీసీ రిజర్వేషన్లను కుదించి ఏకంగా 16,800 మంది బీసీల రాజకీయ అవకాశాలను దెబ్బతీశారని బీసీ నేతలు మండిపడ్డారు.

బీసీలకు 34 శాతం రిజర్వేషన్లు రాకుండా కుట్రపూరితంగా వ్యవహరించి కోర్టులకు వెళ్లిన చరిత్ర వైసీపీది అని, ఆ పార్టీ నిజమైన 'బీసీ ద్రోహి' అంటూ నినాదాలు చేశారు. బీసీల ఉసురు తగిలి వైసీపీ రాజకీయంగా పూర్తిగా తుడిచిపెట్టుకుపోవడం తథ్యమని హెచ్చరించారు.

రాబోయే స్థానిక సంస్థల ఎన్నికల్లో బీసీలంతా ఏకమై కూటమి అభ్యర్థులను అత్యధిక మెజార్టీతో గెలిపిస్తామని బీసీ నేతలు స్పష్టం చేశారు. రాబోయే ఎన్నికల్లో కూటమి సాధించే విజయం.. వైసీపీ చేసిన బీసీ ద్రోహానికి చెంపపెట్టులా ఉండబోతోందని వారు తీవ్రంగా హెచ్చరించారు.