Kaluvai: నెల్లూరు జిల్లాలో పొదుపు సంఘం నిధుల దుర్వినియోగంపై ఫిర్యాదు

కలువాయి: నెల నెలా పొదుపు చేసుకుంటూ.. అవసరమైన సమయంలో సభ్యులకు రుణాలు అందించుకునే మహిళా పొదుపు సంఘంలో నిధుల వ్యవహారం వివాదానికి దారితీసింది. తమకు తెలియకుండానే పొదుపు సంఘానికి సంబంధించిన డబ్బులు తీసుకున్నారని ఆరోపిస్తూ నెల్లూరు జిల్లా కలువాయి మండలం దాచూరు గ్రామంలోని ధనలక్ష్మి పొదుపు సంఘం మహిళా సభ్యులు వెలుగు ప్రాజెక్టు ఏపీఎం రవికి ఫిర్యాదు చేశారు.

సంఘానికి సంబంధించిన బ్యాంకు స్టేట్‌మెంట్‌ను కూడా ఫిర్యాదుకు జత చేసి అధికారులకు అందించారు. తమకు తెలియకుండా సంఘం సభ్యురాలు శిరీషా శ్రీనిధి పేరుతో సుమారు రూ.6 లక్షల వరకు డబ్బులు తీసుకున్నారని మహిళలు ఆరోపించారు. అలాగే నెల నెలా పొదుపు సంఘం రుణానికి చెల్లించాల్సిన మొత్తాన్ని బ్యాంకులో జమ చేయకుండా ఖర్చు చేసినట్లు ఫిర్యాదులో పేర్కొన్నారు.

కొంతమంది సభ్యుల సంతకాలను సైతం తమకు తెలియకుండా ఉపయోగించి డబ్బులు తీసుకున్నారని.. తాము సంతకాలు చేయలేదని మహిళలు అధికారుల దృష్టికి తీసుకెళ్లారు. దీంతో పొదుపు సంఘం నిధుల లావాదేవీలపై పూర్తిస్థాయిలో విచారణ చేపట్టి వాస్తవాలను వెలుగులోకి తీసుకురావాలని వారు కోరారు. తమకు తెలియకుండా సంఘం డబ్బులు ఎలా తీసుకున్నారు.. బ్యాంకు ఖాతా నుంచి ఎవరి అనుమతితో నగదు ఉపసంహరణ జరిగింది..

లావాదేవీలకు సంబంధించిన సంతకాలు ఎవరివి అనే విషయాలపై స్పష్టత ఇవ్వాలని సభ్యులు కోరుతున్నారు. ఫిర్యాదును స్వీకరించిన వెలుగు ప్రాజెక్టు ఏపీఎం రవి.. ఈ వ్యవహారంపై గ్రామానికి వచ్చి పొదుపు సంఘం సభ్యులతో సమావేశం నిర్వహించి పూర్తి వివరాలు తెలుసుకుంటామని తెలిపారు.

బ్యాంకు స్టేట్‌మెంట్‌తో పాటు సంఘానికి సంబంధించిన రికార్డులు, సభ్యుల వివరాలు, రుణ చెల్లింపులు, నగదు లావాదేవీలను పరిశీలించి విచారణ చేపడతామని మహిళలకు హామీ ఇచ్చారు. అధికారుల విచారణలో అసలు నిధులు ఎంత మేరకు ఉపసంహరించబడ్డాయి.. ఎవరి సంతకాలతో లావాదేవీలు జరిగాయి.. రుణ మొత్తాలను బ్యాంకులో ఎందుకు జమ చేయలేదనే అంశాలపై స్పష్టత వచ్చే అవకాశం ఉంది. పొదుపు సంఘం డబ్బులు సభ్యులందరి నమ్మకానికి సంబంధించినవని, ఈ వ్యవహారంపై పారదర్శకంగా విచారణ జరిపి తమకు న్యాయం చేయాలని ధనలక్ష్మి పొదుపు సంఘం మహిళలు కోరుతున్నారు.