Udayagiri: సీఎం చంద్రబాబు, పవన్ రాక.. ఏర్పాట్లను పరిశీలించిన మద్దిపాటి!

ఉదయగిరి: ఉదయగిరి నియోజకవర్గంలో రేపు భారీ స్థాయిలో పల్లెపండుగ కార్యక్రమాన్ని నిర్వహించేందుకు ఏర్పాట్లు చేస్తున్నారు. ఈ కార్యక్రమానికి ముఖ్యమంత్రి నారా చంద్రబాబు నాయుడు, ఉప ముఖ్యమంత్రి పవన్ కళ్యాణ్ హాజరుకానున్న నేపథ్యంలో అధికారులు, ప్రజాప్రతినిధులు, పార్టీ నాయకులు ఏర్పాట్లను వేగవంతం చేశారు.

ఈ సందర్భంగా ఎమ్మెల్యే మద్దిపాటి వెంకటరాజు కార్యక్రమం జరిగే ప్రాంతాన్ని పరిశీలించి, సభా ప్రాంగణం, ప్రజలకు అవసరమైన సౌకర్యాలు, పార్కింగ్, రాకపోకలు, వేదిక ఏర్పాట్లు తదితర అంశాలపై సంబంధిత అధికారులతో చర్చించారు. భారీ సంఖ్యలో ప్రజలు హాజరుకానున్నందున ఎలాంటి ఇబ్బందులు తలెత్తకుండా ముందస్తు చర్యలు చేపట్టాలని సూచించారు.

పల్లెపండుగ 3.0లో భాగంగా గ్రామీణ ప్రాంతాల్లో చేపట్టిన అభివృద్ధి కార్యక్రమాలు, మౌలిక వసతుల పనులకు ప్రాధాన్యత ఇవ్వనున్నట్లు తెలిపారు. గ్రామాల అభివృద్ధి, ప్రజలకు మెరుగైన సౌకర్యాల కల్పన లక్ష్యంగా ప్రభుత్వం చేపడుతున్న కార్యక్రమాలను ప్రజలకు వివరించేలా పల్లెపండుగను నిర్వహిస్తున్నట్లు పేర్కొన్నారు.

లక్ష మంది ప్రజలు పాల్గొనేలా నిర్వహించనున్న ఈ కార్యక్రమాన్ని విజయవంతం చేసేందుకు ప్రతి ఒక్కరూ సమన్వయంతో పనిచేయాలని ఎమ్మెల్యే మద్దిపాటి వెంకటరాజు కోరారు. కార్యక్రమానికి వచ్చే ప్రజలకు ఎలాంటి అసౌకర్యం కలగకుండా అధికారులు ప్రత్యేక దృష్టి సారించాలని సూచించారు. సన్నాహక కార్యక్రమంలో స్థానిక ప్రజాప్రతినిధులు, అధికారులు, టీడీపీ నాయకులు, కార్యకర్తలు తదితరులు పాల్గొన్నారు.