Tirupati: పెళ్లకూరులో సినిమాను తలపించిన జడ్పీటీసీ ఎన్నికల ఫలితం!

తిరుపతి: తిరుపతి జిల్లా పెళ్లకూరు మండల జడ్పీటీసీ ఎన్నికల ఫలితం ఓ సినిమాను తలపించింది. ఒకవైపు జైలు గోడల వెనుక భర్త.. మరోవైపు ప్రజాక్షేత్రంలో ఎన్నికల పోరాటానికి సిద్ధమైన భార్య.. పరిస్థితులు ప్రతికూలంగా ఉన్నా ఏమాత్రం వెనుకడుగు వేయకుండా సాగించిన పోరాటానికి ప్రజాతీర్పు విజయాన్ని కట్టబెట్టింది. వైఎస్సార్‌సీపీ అభ్యర్థి కామిరెడ్డి సత్యనారాయణరెడ్డి 1,719 ఓట్ల మెజారిటీతో ఘన విజయం సాధించారు. ఈ విజయం వెనుక ఆయన జీవిత భాగస్వామి కీలక పాత్ర పోషించడం రాజకీయంగా ప్రత్యేక చర్చకు దారితీసింది.

కామిరెడ్డి సత్యనారాయణరెడ్డి జైలులో ఉన్న సమయంలో ఎన్నికల ప్రచార బాధ్యతలను ఆయన భార్య స్వయంగా భుజాన వేసుకున్నారు. కుటుంబ పరిస్థితులు ఒకవైపు, రాజకీయ ప్రత్యర్థుల సవాళ్లు మరోవైపు ఉన్నప్పటికీ ధైర్యంగా ప్రజల్లోకి వెళ్లారు. భర్తకు బదులుగా తానే ప్రచార రంగంలోకి దిగి ప్రతి ఒక్కరినీ కలుస్తూ ఓట్లు అభ్యర్థించారు. ఈ క్రమంలో పార్టీ నాయకులు, కార్యకర్తలు, అభిమానులు అండగా నిలిచారు. అన్నింటికీ మించి ప్రజలు ఇచ్చిన మద్దతు విజయానికి బాటలు వేసింది.

కుటుంబానికి కష్టకాలం ఎదురైనప్పుడు ఎవరు అండగా నిలుస్తారో అన్న సందేహాలకు నాయకులు, కార్యకర్తలు, ప్రజలు తమ మద్దతుతో సమాధానం ఇచ్చారు. ప్రత్యర్థుల రాజకీయ అంచనాలను తలకిందులు చేస్తూ 1,719 ఓట్ల ఆధిక్యంతో కామిరెడ్డి సత్యనారాయణరెడ్డి విజయం సాధించడం పెళ్లకూరు మండల రాజకీయాల్లో హాట్ టాపిక్‌గా మారింది.

జైలు గోడల వెనుక ఉన్న భర్తకు ప్రజాక్షేత్రంలో భార్య సాగించిన పోరాటం విజయాన్ని అందించగా.. ఈ ఎన్నికల ఫలితం రాజకీయాల్లో పట్టుదల, ప్రజాభిమానం, కుటుంబ అండదండల ప్రాధాన్యతను మరోసారి చాటిచెప్పింది.