Markapuram: సీఎం చంద్రబాబు జన్మదిన వేడుకల్లో భాగంగా మార్కాపురంలో మెగా జాబ్ మేళా

Markapuram: ఆంధ్రప్రదేశ్ రాష్ట్ర ముఖ్యమంత్రి Nara Chandrababu Naidu జన్మదినాన్ని పురస్కరించుకుని నూతన మార్కాపురం జిల్లాలో భారీ స్థాయిలో జాబ్ మేళా ఘనంగా నిర్వహించారు. ఈ మేళా స్థానిక యువతకు ఉపాధి అవకాశాల పండుగగా మారింది.

మార్కాపురం పట్టణంలోని బి కన్వెన్షన్ ఫంక్షన్ హాల్‌లో జరిగిన ఈ కార్యక్రమానికి జిల్లా కలెక్టర్ Vijaya Sunitha, మార్కాపురం ఎమ్మెల్యే Kandula Narayana Reddy ముఖ్య అతిథులుగా హాజరయ్యారు.ఎమ్మెల్యే కందుల నారాయణరెడ్డి ఆధ్వర్యంలో, రాష్ట్ర స్కిల్ డెవలప్మెంట్ కార్పొరేషన్ సహకారంతో నిర్వహించిన ఈ మేళాలో దేశవ్యాప్తంగా పేరొందిన 67 మల్టీనేషనల్ కంపెనీలు పాల్గొన్నాయి. సుమారు 4,000 ఉద్యోగాల భర్తీకి సంస్థలు నేరుగా ఇంటర్వ్యూలు నిర్వహించాయి.ఈ జాబ్ మేళాకు భారీగా స్పందన లభించింది. మార్కాపురం ప్రాంతంతో పాటు పరిసర మండలాల నుండి వేలాది మంది యువత హాజరై తమ ప్రతిభను చాటుకున్నారు. విద్యార్హతలతో పాటు నైపుణ్యాల ఆధారంగా అభ్యర్థులను ఎంపిక చేసే ప్రక్రియ నిర్వహించబడింది.

ఈ సందర్భంగా కలెక్టర్ విజయ సునీత మాట్లాడుతూ, యువతకు ఉపాధి అవకాశాలు కల్పించడం ప్రభుత్వ ప్రాధాన్యతల్లో ఒకటని తెలిపారు. ఇలాంటి జాబ్ మేళాలు గ్రామీణ యువతకు ఎంతో ఉపయోగకరమని ఆమె పేర్కొన్నారు.ఎమ్మెల్యే కందుల నారాయణరెడ్డి మాట్లాడుతూ, మార్కాపురం ప్రాంత యువతకు స్థానికంగానే ఉద్యోగ అవకాశాలు అందించడం తన లక్ష్యమని చెప్పారు. భవిష్యత్తులో మరిన్ని ఇలాంటి మేళాలను నిర్వహించి నిరుద్యోగ సమస్యను తగ్గించే దిశగా చర్యలు తీసుకుంటామని హామీ ఇచ్చారు.

ఈ కార్యక్రమంలో టిడిపి నియోజకవర్గ క్లస్టర్ ఇంచార్జ్ కందుల రామిరెడ్డి, మాజీ మున్సిపల్ ఛైర్మన్ వక్కలగడ్డ మల్లికార్జున, మార్కెట్ యార్డ్ చైర్మన్ వెంకట రెడ్డి, సీనియర్ నాయకుడు గుంటక సుబ్బారెడ్డి, మరియు స్కిల్ డెవలప్మెంట్ కార్పొరేషన్ సిబ్బంది పాల్గొన్నారు.