Ongole: ఒంగోలులో మందుబాబుల బీభత్సం.. బార్‌లో బీరు బాటిళ్లతో దాడులు!

ప్రకాశం జిల్లా: ఒంగోలు నగరంలో మందుబాబుల ఆగడాలు ఆందోళన కలిగిస్తున్నాయి. నగరంలోని పాత మార్కెట్ సమీపంలో ఉన్న ఓ బార్‌లో ఈ నెల 23వ తేదీన అర్ధరాత్రి జరిగిన గొడవ స్థానికంగా కలకలం రేపింది. మద్యం మత్తులో కొందరు యువకులు గ్రూపులుగా విడిపోయి ఒకరిపై ఒకరు దాడులకు దిగడంతో బార్ ప్రాంగణం ఒక్కసారిగా ఉద్రిక్తంగా మారింది.

సమాచారం ప్రకారం.. రాత్రి వేళ బార్‌కు వచ్చిన పలువురు యువకులు అర్ధరాత్రి వరకు మద్యం సేవించారు. మద్యం మత్తు అధికం కావడంతో చిన్నపాటి వాగ్వాదం మొదలై.. అది కాస్తా తీవ్ర ఘర్షణగా మారింది. ఇద్దరు, ముగ్గురుగా గుంపులుగా విడిపోయిన యువకులు బార్‌లో ఉన్న ఖాళీ మద్యం సీసాలు, బీరు బాటిళ్లతో పరస్పరం దాడులు చేసుకున్నారు. దీంతో అక్కడ ఒక్కసారిగా భయాందోళన నెలకొంది.

గొడవ తీవ్రరూపం దాల్చడంతో బార్ సిబ్బంది అడ్డుకునేందుకు ప్రయత్నించినా పరిస్థితి అదుపులోకి రాలేదు. దాడిలో పలువురికి గాయాలయ్యాయి. గాయపడిన వారిని స్థానికులు సమీప ఆసుపత్రికి తరలించి చికిత్స అందించారు. ఘటనతో కొంతసేపు ఆ ప్రాంతంలో ఉద్రిక్త పరిస్థితులు నెలకొన్నాయి.

ఈ ఘటనకు సంబంధించిన దృశ్యాలు బార్‌లోని సీసీ కెమెరాల్లో రికార్డు అయ్యాయి. ప్రస్తుతం ఆ వీడియో సోషల్ మీడియాలో వైరల్‌గా మారి చర్చనీయాంశమైంది. బార్‌లో యువకులు బీరు బాటిళ్లతో ఒకరిపై ఒకరు దాడి చేసుకుంటున్న దృశ్యాలు స్పష్టంగా కనిపిస్తున్నాయి.

ఒంగోలు నగరంలో బహిరంగ ప్రదేశాల్లో, బార్‌ల వద్ద ఇలాంటి ఘటనలు పునరావృతం కావడం పట్ల స్థానికులు ఆందోళన వ్యక్తం చేస్తున్నారు. రాత్రి వేళల్లో బార్‌ల వద్ద భద్రతను మరింత కట్టుదిట్టం చేయాలని, ఇలాంటి ఘటనలు మళ్లీ జరగకుండా పోలీసులు కఠిన చర్యలు తీసుకోవాలని కోరుతున్నారు.