Konakanamitla: చిన్నారికట్లలో పోలీసుల కార్డన్ అండ్ సెర్చ్ ఆపరేషన్

కొనకనమిట్ల: మండలంలో ఎలాంటి అసాంఘిక కార్యకలాపాలు చోటుచేసుకోకుండా ముందస్తు చర్యల్లో భాగంగా చిన్నారికట్ల గ్రామంలో పోలీసులు కార్డన్ అండ్ సెర్చ్ ఆపరేషన్ నిర్వహించారు. గ్రామంలోని పలు ప్రాంతాల్లో పోలీసులు విస్తృతంగా తనిఖీలు చేపట్టి, అనుమానాస్పద వ్యక్తులు, వాహనాలపై ప్రత్యేకంగా దృష్టి సారించారు.

ఈ సందర్భంగా గ్రామంలో మొత్తం 42 ద్విచక్ర వాహనాలు, 4 ఆటోలను పోలీసులు తనిఖీ చేశారు. వాహనాలకు సంబంధించిన రిజిస్ట్రేషన్, ఇతర రికార్డులను పరిశీలించారు. పత్రాలు సక్రమంగా ఉన్న వాహనాలను సంబంధిత యజమానులకు అప్పగించారు.

గ్రామంలో శాంతిభద్రతలకు విఘాతం కలిగించే కార్యకలాపాలకు పాల్పడితే కఠిన చర్యలు తీసుకుంటామని పోలీసులు హెచ్చరించారు. ప్రజలు కూడా అప్రమత్తంగా ఉండి, అనుమానాస్పద వ్యక్తులు లేదా కార్యకలాపాలపై పోలీసులకు సమాచారం అందించాలని సూచించారు.