Markapuram: మార్కాపురంలో పోలీసుల హెల్మెట్ స్పెషల్ డ్రైవ్!

మార్కాపురం: జిల్లాలో రోడ్డు ప్రమాదాలను నివారించి వాహనదారుల ప్రాణాలను రక్షించేందుకు పోలీసు శాఖ ప్రత్యేక డ్రైవ్ నిర్వహించింది. మార్కాపురం జిల్లా ఇన్‌చార్జి ఎస్పీ హర్షవర్ధన్ రాజు ఆదేశాల మేరకు గ్రామీణ ఎస్ఐ వేమన ఆధ్వర్యంలో ద్విచక్ర వాహనదారులకు హెల్మెట్ ప్రాముఖ్యతపై అవగాహన కల్పించారు.

ఈ సందర్భంగా ఎస్ఐ వేమన మాట్లాడుతూ, రోడ్డు ప్రమాదాల్లో సంభవించే మరణాలు, తీవ్ర గాయాలను తగ్గించడంలో హెల్మెట్ కీలక పాత్ర పోషిస్తుందని తెలిపారు. ద్విచక్ర వాహనదారులు తప్పనిసరిగా నాణ్యమైన హెల్మెట్ ధరించి ప్రయాణించాలని సూచించారు.

హెల్మెట్ లేకుండా వాహనాలు నడిపేవారిపై చట్టపరమైన చర్యలు తీసుకుంటామని హెచ్చరించారు. ప్రతి పౌరుడు ట్రాఫిక్ నిబంధనలను పాటించి, తన కుటుంబ సభ్యుల భద్రతను దృష్టిలో ఉంచుకుని హెల్మెట్ ధరించాలని కోరారు. ఈ ప్రత్యేక డ్రైవ్‌లో పలువురు పోలీసు సిబ్బంది పాల్గొని వాహనదారులకు అవగాహన కల్పించారు.