Prakasam: ప్రకాశం, మార్కాపురం జిల్లాల్లో పరిషత్ సమరానికి సర్వం సిద్ధం

ప్రకాశం జిల్లా: ప్రకాశం జిల్లాలో జడ్పీటీసీ, ఎంపీటీసీ ఎన్నికల నిర్వహణకు అధికారులు అన్ని ఏర్పాట్లు పూర్తి చేశారు. ఎన్నికల నేపథ్యంలో జిల్లా వ్యాప్తంగా పోలింగ్ సామగ్రిని ఆయా కేంద్రాలకు తరలించడంతో పాటు, పోలింగ్ సజావుగా నిర్వహించేందుకు అవసరమైన ఏర్పాట్లు చేపట్టారు. రేపు ఉదయం నుంచి ఎన్నికల పోలింగ్ జరగనుండటంతో అధికారులు, పోలీసు యంత్రాంగం అప్రమత్తమైంది.

ప్రకాశం జిల్లాలో మొత్తం 27 జడ్పీటీసీ స్థానాలకు ఎన్నికలు ప్రకటించగా, మర్రిపూడి, పొన్నలూరు మండలాల్లోని రెండు జడ్పీటీసీ స్థానాలు ఏకగ్రీవమయ్యాయి. దీంతో మిగిలిన 25 జడ్పీటీసీ స్థానాలకు రేపు పోలింగ్ నిర్వహించనున్నారు. అదేవిధంగా జిల్లాలో 371 ఎంపీటీసీ స్థానాలకు ఎన్నికలు ప్రకటించగా, 151 స్థానాలు ఏకగ్రీవమయ్యాయి. మిగిలిన 220 ఎంపీటీసీ స్థానాలకు ఓటర్లు తమ ఓటు హక్కును వినియోగించుకోనున్నారు.

ఎన్నికల నిర్వహణ కోసం జిల్లా వ్యాప్తంగా 714 పోలింగ్ లొకేషన్లలో మొత్తం 1,260 పోలింగ్ కేంద్రాలను ఏర్పాటు చేశారు. వీటిలో 83 అత్యంత సమస్యాత్మక, 149 సమస్యాత్మక, 482 సాధారణ పోలింగ్ లొకేషన్లుగా అధికారులు వర్గీకరించారు. సమస్యాత్మక ప్రాంతాల్లో ఎలాంటి అవాంఛనీయ సంఘటనలు చోటుచేసుకోకుండా ప్రత్యేక భద్రతా ఏర్పాట్లు చేపట్టారు. ఇప్పటికే పోలింగ్ కేంద్రాలకు అవసరమైన ఎన్నికల సామగ్రిని తరలించారు. ఎన్నికల విధుల్లో పాల్గొనే సిబ్బందికి అవసరమైన సూచనలు అందించారు. పోలింగ్ ప్రక్రియ ప్రశాంతంగా జరిగేలా పోలీసు బలగాలను మోహరించడంతో పాటు, సమస్యాత్మక ప్రాంతాలపై ప్రత్యేక నిఘా ఏర్పాటు చేశారు.

మార్కాపురం జిల్లాలో తొలిసారిగా పరిషత్ ఎన్నికలు

మరోవైపు నూతనంగా ఏర్పడిన మార్కాపురం జిల్లాలో తొలిసారిగా జడ్పీటీసీ, ఎంపీటీసీ ఎన్నికలు జరగనుండటం ప్రాధాన్యత సంతరించుకుంది. మార్కాపురం, ఎర్రగొండపాలెం, కనిగిరి, గిద్దలూరు నియోజకవర్గాల పరిధిలోని 21 మండలాల్లో ఎన్నికల నిర్వహణకు అధికారులు ఏర్పాట్లు పూర్తి చేశారు.

మార్కాపురం జిల్లాలో మొత్తం 21 జడ్పీటీసీ స్థానాలకు ఎన్నికలు ప్రకటించగా, ఆరు స్థానాలు ఏకగ్రీవమయ్యాయి. దీంతో మిగిలిన 15 జడ్పీటీసీ స్థానాలకు రేపు పోలింగ్ జరగనుంది. ఇక 274 ఎంపీటీసీ స్థానాలకు ఎన్నికలు ప్రకటించగా, 217 స్థానాలు ఏకగ్రీవమయ్యాయి. మిగిలిన 57 ఎంపీటీసీ స్థానాలకు ఓటింగ్ నిర్వహించనున్నారు.

నూతన జిల్లాగా ఏర్పడిన తర్వాత తొలిసారిగా పరిషత్ ఎన్నికలు జరుగుతుండటంతో మార్కాపురం జిల్లా యంత్రాంగం ఈ ఎన్నికలను ప్రతిష్టాత్మకంగా తీసుకుంది. పోలింగ్ సిబ్బంది నియామకం, ఎన్నికల సామగ్రి పంపిణీ, పోలింగ్ కేంద్రాల వద్ద భద్రత వంటి అంశాలపై ప్రత్యేక దృష్టి సారించింది.

రెండు జిల్లాల్లోనూ ఎన్నికలు ప్రశాంత వాతావరణంలో నిర్వహించేందుకు అధికారులు అన్ని చర్యలు చేపట్టారు. ఓటర్లు ఎలాంటి ఇబ్బందులు లేకుండా తమ ఓటు హక్కును వినియోగించుకునేలా ఏర్పాట్లు పూర్తి చేశారు. పోలింగ్ సమయంలో ఎక్కడైనా అవాంఛనీయ సంఘటనలు చోటుచేసుకుంటే వెంటనే స్పందించేలా పోలీసు యంత్రాంగాన్ని అప్రమత్తం చేశారు. దీంతో రేపు జరగనున్న పరిషత్ ఎన్నికలపై రాజకీయ పార్టీలతో పాటు అభ్యర్థుల్లోనూ ఉత్కంఠ నెలకొంది.