Martur: మార్టూరులో ఘనంగా తిరంగా ర్యాలీ నేతృత్వం వహించిన ఎమ్మెల్యే ఏలూరి!

Martur: స్వాతంత్య్ర దినోత్సవం సందర్భంగా మార్టూరులో దేశభక్తి భావం ఉరకలెత్తింది. స్థానిక ఎమ్మెస్ఎన్ పాఠశాల నుంచి ఎమ్మెల్యే ఏలూరి సాంబశివరావు సారథ్యంలో భారీ తిరంగా ర్యాలీ నిర్వహించారు. ఈ ప్రదర్శనలో విద్యార్థులు పెద్ద సంఖ్యలో పాల్గొని దేశభక్తి నినాదాలతో మార్టూరు వీధులను మార్మోగించారు.

ర్యాలీలో ప్రత్యేక ఆకర్షణగా నిలిచిన 100 అడుగుల పొడవైన త్రివర్ణ పతాకాన్ని విద్యార్థులు అందరూ కలిసి భుజాలపై మోస్తూ ప్రదర్శనలో ముందుకు సాగారు. ఈ దృశ్యం స్థానికులను విశేషంగా ఆకట్టుకుంది.

తిరంగా జెండాను స్వయంగా చేతబూని ఎమ్మెల్యే ఏలూరి ప్రదర్శనకు అగ్రభాగాన నడిచారు. ఆయనతో పాటు పార్టీ నాయకులు, కార్యకర్తలు, పాఠశాల ఉపాధ్యాయులు, సిబ్బంది పెద్ద సంఖ్యలో ర్యాలీలో పాలుపంచుకున్నారు.

ఎమ్మెస్ఎన్ పాఠశాల నుంచి బయలుదేరిన ఈ ప్రదర్శన మార్టూరులోని ప్రధాన వీధుల గుండా సాగింది. నాయకులు, కార్యకర్తలు, విద్యార్థులు, స్థానిక ప్రజలు అంతా ఒక్కటై కదం తొక్కుతూ, చేతుల్లో తిరంగా జెండాలు, ప్లకార్డులు పట్టుకుని దేశభక్తి నినాదాలు చేస్తూ ముందుకు సాగారు.

ఈ సందర్భంగా "జయహో భారత్‌", "వందేమాతరం" నినాదాలతో యావత్ మార్టూరు మార్మోగిపోయింది. ప్రదర్శన పొడవునా రోడ్డుకు ఇరువైపులా ప్రజలు బారులుతీరి తిరంగా ర్యాలీని తిలకించారు. విద్యార్థుల ఉత్సాహం, ప్రజల భాగస్వామ్యం, నాయకుల నేతృత్వం కలగలిసిన ఈ దృశ్యం మార్టూరులో దేశభక్తి వాతావరణాన్ని నింపింది.

ఈ కార్యక్రమం ద్వారా యువతలో దేశభక్తి భావాన్ని పెంపొందించడమే లక్ష్యంగా నిర్వహించినట్లు నిర్వాహకులు తెలిపారు. నాయకులు, కార్యకర్తలు, విద్యార్థులు, ప్రజలు అందరూ ఏకతాటిపైకి వచ్చి నిర్వహించిన ఈ తిరంగా ర్యాలీ మార్టూరు చరిత్రలో మరో దేశభక్తి ఘట్టంగా నిలిచిపోయింది.