Podili: నూతన ఎక్సైజ్ పాలసీ: పొదిలిలో మద్యం షాపుల ఫీజుల వివరాలు!

పొదిలి: ఆంధ్రప్రదేశ్ ప్రభుత్వం ప్రకటించిన 2026–27 నూతన ఎక్సైజ్ పాలసీకి అనుగుణంగా పొదిలి నియోజకవర్గ పరిధిలోని మద్యం దుకాణాల లైసెన్సుల రెన్యూవల్ ప్రక్రియ ప్రారంభమైంది. ఈ మేరకు పొదిలి ప్రొహిబిషన్ అండ్ ఎక్సైజ్ స్టేషన్‌లో జిల్లా ఎక్సైజ్ డిప్యూటీ కమిషనర్ హేమంత్ నాగరాజు ఆధ్వర్యంలో వైన్ షాపుల లైసెన్స్‌దారులతో ప్రత్యేక సమావేశం నిర్వహించారు. ఎక్సైజ్ ఇన్‌స్పెక్టర్ టి. అరుణ కుమారి అధ్యక్షతన జరిగిన సమావేశానికి పొదిలి పరిధిలోని ఏ-4 షాపుల యజమానులు హాజరయ్యారు.

ఈ సందర్భంగా నూతన ఎక్సైజ్ పాలసీలోని నిబంధనలు, రెన్యూవల్ ఫీజులు, పర్మిట్ రూమ్ ఫీజుల వివరాలను అధికారులు లైసెన్స్‌దారులకు వివరించారు. నగర పంచాయతీ పరిధిలోని షాపులకు వార్షిక రిటైల్ ట్యాక్స్ రూ.71.50 లక్షలు ఉండగా, రెన్యూవల్ ఫీజు రూ.27.20 లక్షలు, పర్మిట్ రూమ్ ఫీజు రూ.7.50 లక్షలుగా నిర్ణయించినట్లు తెలిపారు.

మండల స్థాయి స్లాబ్ షాపులకు వార్షిక రిటైల్ ట్యాక్స్ రూ.60.50 లక్షలు కాగా, రెన్యూవల్ ఫీజు రూ.23 లక్షలు, పర్మిట్ రూమ్ ఫీజు రూ.5 లక్షలుగా ఖరారు చేసినట్లు పేర్కొన్నారు. రిజర్వుడ్ కేటగిరీ షాపుకు వార్షిక రిటైల్ ట్యాక్స్ రూ.30.30 లక్షలు ఉండగా, రెన్యూవల్ ఫీజు రూ.11.50 లక్షలు, పర్మిట్ రూమ్ ఫీజు రూ.5 లక్షలుగా నిర్ణయించినట్లు అధికారులు వివరించారు.

ప్రభుత్వం నిర్దేశించిన నిబంధనల ప్రకారం లైసెన్స్‌దారులందరూ సెప్టెంబర్ 21లోపు సంబంధిత ఫీజులను చలానాల ద్వారా ప్రభుత్వానికి చెల్లించి ఏ-4 షాపుల లైసెన్సులను రెన్యూవల్ చేసుకోవాలని ఎక్సైజ్ ఇన్‌స్పెక్టర్ టి. అరుణ కుమారి స్పష్టం చేశారు. నిర్ణీత గడువులోగా ఫీజులు చెల్లించని దుకాణాలపై నిబంధనల ప్రకారం తదుపరి చర్యలు తీసుకుంటామని ఆమె హెచ్చరించారు.