OTT: ఓటీటీ అనేది లేజీగా ఉండేవాళ్ల కోసమే.. థియేటర్ కిక్కు వేరన్న నటుడు శివాజీ

OTT: టాలీవుడ్ సీనియర్ నటుడు శివాజీ ఓటీటీ ప్లాట్‌ఫామ్స్‌పై చేసిన తాజా వ్యాఖ్యలు సినీ వర్గాల్లో, సోషల్ మీడియాలో తీవ్ర చర్చనీయాంశంగా మారాయి. మనసులో ఉన్నది ఉన్నట్లుగా ముక్కుసూటిగా మాట్లాడే శివాజీ, తాజాగా ఓటీటీల్లో సినిమాలు చూసే వారిపై సంచలన కామెంట్స్ చేశారు. ఆనంద్ దేవరకొండ, వైష్ణవి చైతన్య జంటగా నటిస్తున్న 'ఎపిక్ ఫస్ట్ సెమిస్టర్' చిత్ర ప్రమోషన్స్ కార్యక్రమంలో పాల్గొన్న ఆయన ఈ ఆసక్తికరమైన వ్యాఖ్యలు చేశారు. ఓటీటీ అనేది బాగా ఫ్రీగా ఉన్నవారికి, ఇంట్లో లేజీగా ఉండేవారి కోసమేనని ఆయన అభివర్ణించారు.

సినిమా అంటే ఒక అద్భుతమైన అనుభూతి అని, అది మనల్ని మనం పూర్తిగా మరిచిపోయేలా చేస్తుందని శివాజీ అన్నారు. ఇంట్లో ఉండి ఆన్‌లైన్‌లో ఫుడ్ ఆర్డర్ చేసుకొని టీవీలో సినిమాలు చూస్తే ఆ అసలైన ఫీల్ రాదని స్పష్టం చేశారు. థియేటర్లో వందలాది మందితో కలిసి కూర్చొని బిగ్ స్క్రీన్ పై మూవీ చూస్తే వచ్చే కిక్కే వేరని ఆయన ఓ ఇంటర్వ్యూలో చెప్పారు. తన కామెంట్స్ ద్వారా థియేటర్ వ్యవస్థను కాపాడుకోవాల్సిన అవసరాన్ని ఆయన నొక్కి చెప్పారు. ఇంట్లోనే సినిమాలు, వెబ్ సిరీస్‌లు చూసే అలవాటు ప్రేక్షకుల్లో పెరిగిపోవడం వల్ల థియేటర్లకు వచ్చే వారి సంఖ్య గణనీయంగా తగ్గిపోతోందని ఆయన ఆందోళన వ్యక్తం చేశారు. ఒకప్పుడు కొత్త సినిమా విడుదలైతే థియేటర్‌కు వెళ్లడం తప్ప మరో ఆప్షన్ ఉండేది కాదని, కానీ ఇప్పుడు పరిస్థితి పూర్తిగా మారిపోయిందని గుర్తుచేశారు.

తనకు మంచి గుర్తింపు తెచ్చిపెట్టిన '#90s - మై మిడిల్ క్లాస్ బయోపిక్' వెబ్ సిరీస్ గురించి కూడా శివాజీ ఓ ఆసక్తికరమైన ప్రకటన చేశారు. ఈ సిరీస్‌ను ఓటీటీకి బదులుగా నేరుగా థియేటర్లలో విడుదల చేసి ఉంటే.. బాక్సాఫీస్ వద్ద అది సులువుగా రూ. 100 కోట్లు మార్కును దాటి ఉండేదని ఆయన ధీమా వ్యక్తం చేశారు. మిడిల్ క్లాస్ భావోద్వేగాలు, సరళమైన కథాంశంతో రూపుదిద్దుకున్న ఈ సిరీస్ కుటుంబ ప్రేక్షకులకు బాగా దగ్గరైందని ఆయన గుర్తుచేశారు. థియేటర్లలో ఆడియన్స్ రెస్పాన్స్ లైవ్‌గా చూడటం అనేది నటీనటులకు ఎంతో ఉత్సాహాన్ని ఇస్తుందని ఆయన అభిప్రాయపడ్డారు.

శివాజీ చేసిన ఈ బోల్డ్ కామెంట్స్‌పై నెట్టింట భిన్నమైన వాదనలు వినిపిస్తున్నాయి. కొందరు ఆయన మాటలతో పూర్తిగా ఏకీభవిస్తున్నారు. భారీ యాక్షన్ సినిమాలు, విజువల్ ఎఫెక్ట్స్ ఉన్న చిత్రాలను థియేటర్‌లో చూస్తేనే అసలైన మజా ఉంటుందని, హీరో కనిపించినప్పుడు వందల మంది ఒకేసారి రెస్పాండ్ అవ్వడం, క్లైమాక్స్‌లో ప్రేక్షకుల ఎమోషన్ ఓటీటీలో ఎప్పటికీ దొరకదని పలువురు సినీ ప్రియులు సమర్థిస్తున్నారు. బిగ్ స్క్రీన్ అనుభవాన్ని ప్రమోట్ చేయడంలో ఎలాంటి తప్పులేదని వారు భావిస్తున్నారు.

అయితే మరోవర్గం నెటిజన్లు మాత్రం ఆయన కామెంట్స్‌ను తీవ్రంగా తప్పుబడుతున్నారు. పెరిగిన టికెట్ రేట్లు, పాప్‌కార్న్ ధరలు, పార్కింగ్, ప్రయాణ ఖర్చులు కలుపుకుంటే కుటుంబంతో కలిసి థియేటర్‌కు వెళ్లడం సామాన్యుడికి తలకు మించిన భారంగా మారిందని నెటిజన్లు గుర్తుచేస్తున్నారు. నలుగురు ఉన్న ఒక కుటుంబం మల్టీప్లెక్స్ థియేటర్ కు వెళ్లి సినిమా చూడాలంటే కనీసం రూ. 2 వేలు నుంచి రూ. 3 వేలు ఖర్చు చేయాల్సిన పరిస్థితి నెలకొందని వాపోతున్నారు. పని ఒత్తిడిలో బతికే సామాన్య కుటుంబాలకు ఇంట్లోనే నాణ్యమైన వినోదాన్ని అందిస్తున్న ఓటీటీలను తక్కువ చేసి మాట్లాడటం ఏమాత్రం సరికాదని కొందరు అంటున్నారు. ప్రతి ఒక్కరినీ సోమరిపోతులుగా చూడటం కరెక్ట్ కాదని విమర్శిస్తున్నారు. ఏ ప్లాట్‌ఫామ్ అయినా సరే ప్రేక్షకుడికి కావాల్సింది మంచి కంటెంట్ మాత్రమేనని, కంటెంట్ బాగుంటే ఎక్కడైనా చూస్తారని స్పష్టం చేస్తున్నారు.