Love Oh Love Review : ప్రేమకు లిమిట్ ఉండాలనే మెసేజ్ ఇచ్చిన మూవీ.!

Love Oh Love Review : ధనుష్ మేనల్లుడు పవిష్ కథానాయకుడిగా నటించిన రెండవ చిత్రం 'లవ్ ఓ లవ్'. జులై 10న థియేటర్లలో విడుదలై యూత్‌ను ఆకట్టుకున్న ఈ రొమాంటిక్ డ్రామా, జులై 31 నుంచి అమెజాన్ ప్రైమ్ వీడియో (Amazon Prime Video) లో ప్రసారం అవుతోంది. మహేష్ రాజేంద్రన్ దర్శకత్వంలో తెరకెక్కిన ఈ చిత్రంతో జానపద పాటలతో మంచి గుర్తింపు తెచ్చుకున్న తెలుగు నటి నాగదుర్గ కథానాయికగా కోలీవుడ్‌కి పరిచయమైంది. నేటితరం కాన్సెప్ట్‌తో వచ్చిన ఈ సినిమా ప్రేక్షకులను ఏ మేరకు అలరించిందో ఈ రివ్యూలో చూద్దాం..

కథేంటి.?

రఘు (పవిష్) ఒక సాధారణ మధ్యతరగతి కుటుంబానికి చెందిన కుర్రాడు. తండ్రి చాలా క్రమశిక్షణ కలిగిన వ్యక్తి, అప్పులు చేయడం లేదా క్రెడిట్ కార్డులు వాడటం ఆయనకు అస్సలు నచ్చదు. రఘు కార్పొరేట్ ఉద్యోగం చేస్తూ రాగా, అతని జీతంతోనే తండ్రి ఇల్లు నడిపిస్తుంటాడు. ఈ క్రమంలో రఘుకి అవంతిక (నాగదుర్గ) పరిచయమవుతుంది. ఆమెను ఇష్టపడిన రఘు, ఆమె కోరిన ప్రతి కోరికనూ తీర్చడం మొదలుపెడతాడు. షాపింగ్‌లు, సినిమాలు, ట్రిప్పుల కోసం తన స్తోమతకు మించి ఖర్చు చేస్తాడు. జీతం సరిపోక అప్పులు చేయడం, బ్యాంక్ లోన్లు తీసుకోవడం మొదలుపెడతాడు.

ఒకసారి అవంతిక కోరిక మేరకు ఆమెను ఊటీకి తీసుకెళ్లగా, అవంతిక తల్లి రఘుపై కిడ్నాప్ కేసు పెడుతుంది. పోలీసు విచారణ, ఉద్యోగం పోవడం, బ్యాంక్ లోన్లు కట్టలేక బైక్ జప్తు కావడం.. ఇలా వరుస ఆఘాతాలు రఘుని ముంచెత్తుతాయి. కొడుకు చేసిన అప్పులు, పడిన అవమానాలు తట్టుకోలేక తల్లిదండ్రులు చెల్లెలిని తీసుకుని సొంత ఊరికి వెళ్లిపోతారు. ఈ పరిస్థితులకు కారణమైన అవంతిక విషయంలో రఘు ఏ నిర్ణయం తీసుకున్నాడు? వారి ప్రేమకథ ఎలాంటి మలుపు తిరిగింది? అనేదే మిగతా కథ..

విశ్లేషణ

ప్రేమించడం, విడిపోవడం నేటితరంలో చాలా సాధారణమైపోయింది. అయితే ప్రేమ పేరుతో అబ్బాయిలు తమ హద్దులు దాటి ఖర్చు చేయడం, అమ్మాయిలు సైతం ఫలితాన్ని ఆలోచించకుండా ఖర్చు పెట్టించడం లాంటి అంశాలను దర్శకుడు చాలా ప్రాక్టికల్‌గా చూపించారు.

దుబాయ్ వెళ్లేందుకు సిద్ధమైన రఘును పోలీసులు అదుపులోకి తీసుకోవడం, ఉమెన్స్ ఆర్గనైజేషన్స్ అతనిపై ఫిర్యాదు చేయడంతో సినిమా కథ ఆసక్తికరంగా మొదలవుతుంది. మొదటి భాగం అంతా రఘు, అవంతికల మధ్య రొమాన్స్, ఎంటర్‌టైన్‌మెంట్‌తో చాలా తేలికగా సాగిపోతుంది. ఇక రెండో భాగంలో రఘు పోలీసుల ముందు ఒక విచిత్రమైన కండిషన్ పెడతాడు. ఆ కండిషన్ ఏంటి? దానివల్ల కథ ఎలాంటి మలుపు తిరిగింది? అనేదే ఈ సినిమాకు ప్రధాన హైలైట్. రొమాన్స్, ఫ్రెండ్‌షిప్, ఫ్యామిలీ ఎమోషన్లను దర్శకుడు విసుగు రాకుండా నడిపించారు. ప్రీ-క్లైమాక్స్ వరకు అమ్మాయిల ప్రవర్తనను ప్రశ్నించినట్లు అనిపించినా, ఆ తర్వాత కథను రెండు వైపులా బ్యాలెన్స్ చేసేందుకు చేసిన ప్రయత్నం మెప్పిస్తుంది.

నటీనటుల పనితీరు

రఘు పాత్రలో పవిష్ చాలా సహజంగా నటించాడు. ఎమోషనల్ సీన్స్‌లోనూ, రొమాంటిక్ ఘట్టాల్లోనూ మంచి పరిణతి చూపించాడు. తెలుగు నటి నాగదుర్గ తమిళంలోకి తన ఎంట్రీని చాలా కాన్ఫిడెంట్‌గా ఇచ్చింది. భావోద్వేగాలు ఉన్న పాత్రలో చక్కగా ఒదిగిపోయింది. కేఎస్ రవికుమార్ , కుటుంబ సభ్యులుగా నటించిన మిగిలిన నటీనటులు తమ పాత్రలతో సినిమాకు మరింత బలాన్నిచ్చారు.

సాంకేతిక విభాగాలు

దర్శకుడు మహేష్ రాజేంద్రన్ నేటితరం సంబంధాలను, సామాజిక కోణాన్ని ఎంతో రిలేటబుల్‌గా చూపించడంలో విజయం సాధించారు. కెమెరా పనితనం సీన్లకు తగ్గట్టుగా కలర్‌ఫుల్‌గా ఉంది. ఫాక్స్న్ అందించిన నేపథ్య సంగీతం (BGM) సన్నివేశాల్లోని ఎమోషన్‌ను బాగా ఎలివేట్ చేసింది. సంభాషణలు చాలా అర్థవంతంగా ఉండి ప్రేక్షకుడి మనసుకు హత్తుకుంటాయి.

చివరిగా..

'లవ్ ఓ లవ్' అనేది ఒక మంచి ఎమోషనల్ మెసేజ్ ఉన్న యూత్‌ఫుల్ లవ్ డ్రామా. ప్రేమ పేరుతో ఆర్థికంగా బాధ్యతారాహిత్యంగా ఉండకూడదని, నిజమైన ప్రేమ అంటే ఒకరినొకరు అర్థం చేసుకోవడమే అని ఈ సినిమా చాటిచెబుతుంది. సెకండ్ హాఫ్ కాస్త ఊహించగలిగేలా ఉన్నప్పటికీ, నేటి యూత్‌కి బాగా కనెక్ట్ అయ్యే అంశాలు ఇందులో పుష్కలంగా ఉన్నాయి..