Ott Movie: శోభనం రోజే భార్య వర్జిన్ కాదని భర్తకు తెలిస్తే.. ఓటీటీలో దూసుకెళ్తున్న తెలుగు క్రైమ్ థ్రిల్లర్..!

Na Wife Missing movie: ఈ మధ్యకాలంలో పెద్ద సినిమాలే కాదు, బలమైన కథాంశం ఉన్న చిన్న సినిమాలు కూడా డిజిటల్ ప్లాట్‌ఫారమ్‌లపై సంచలనాలు సృష్టిస్తున్నాయి. ముఖ్యంగా సస్పెన్స్, క్రైమ్ థ్రిల్లర్ కథలను ఇష్టపడే ఓటీటీ ప్రేక్షకులను విశేషంగా ఆకట్టుకుంటూ డిజిటల్ వేదికపై ట్రెండింగ్‌లో నిలిచింది తెలుగు థ్రిల్లర్ మూవీ ‘నా వైఫ్ మిస్సింగ్’. ఒకప్పుడు ‘కొత్త బంగారు లోకం’ చిత్రంతో యూత్‌ను అల్లరించిన హిట్ జంట వరుణ్ సందేశ్, శ్వేతా బసు ప్రసాద్ సుదీర్ఘ విరామం తర్వాత మళ్లీ ఒకే ఫ్రేమ్‌లో జంటగా కనిపించిన ఈ చిత్రం, ఆహా ఓటీటీలో స్ట్రీమింగ్ అవుతూ 100 మిలియన్ల కంటే ఎక్కువ స్ట్రీమింగ్ మినిట్స్‌ను దక్కించుకుని ఘన విజయాన్ని సాధించింది.

ఈ సినిమా ప్రారంభం నుంచే ప్రేక్షకులలో కుతూహలాన్ని పెంచుతుంది. పెళ్లి చూపుల వేళ కుటుంబ సభ్యుల ఒత్తిడితో బాలును వివాహం చేసుకుంటుంది స్వప్న. అయితే శోభనం రోజే తను వర్జిన్ కాదని భర్తకు నిజాన్ని చెప్పేస్తుంది. ఒకవైపు భర్తతో ఉంటూనే, పెళ్లికి ముందే తాను ప్రేమించిన అబాన్ అనే వ్యక్తితో ఎఫైర్ కొనసాగిస్తుంటుంది. ఒక రోజు వీరిద్దరినీ బాలు రెడ్ హ్యాండెడ్‌గా పట్టుకోవడంతో కథ ఊహించని మలుపు తిరుగుతుంది. ఆ సంఘటన తర్వాత స్వప్న అనుమానాస్పద స్థితిలో హఠాత్తుగా కనిపించకుండా పోతుంది. దీంతో భర్త బాలు పోలీసులను ఆశ్రయించడం, ఇన్వెస్టిగేషన్ క్రమంలో వెలుగులోకి వచ్చే రహస్యాలు ప్రేక్షకులను సీటు అంచున కూర్చోబెడతాయి. అసలు స్వప్న ఏమైంది? ఆమె మిస్సింగ్ వెనుక ఉన్న అసలు మాస్టర్‌మైండ్ ఎవరు? అనేది తెలియాలంటే ఈ సినిమా చూడాల్సిందే.

దర్శకురాలు స్వాతి ప్రకాష్ మంత్రిప్రగడ తెరకెక్కించిన ఈ చిత్రం, ఒక సాధారణ భార్యాభర్తల డ్రామాలా ప్రారంభమై ఊహించని క్రైమ్ థ్రిల్లర్‌గా మారుతుంది. వరుణ్ సందేశ్ - శ్వేతా బసు ప్రసాద్ నటన:** నటుడిగా వరుణ్ సందేశ్ పాత్రలోని వేదనను, అనుమానాన్ని చాలా చక్కగా పండించగా.. శ్వేతా బసు ప్రసాద్ తన గ్లామర్ , సీరియస్ పర్ఫార్మెన్స్‌తో మెప్పించారు. కామెడీ నటుడు ప్రవీణ్, జబర్దస్త్ సత్యశ్రీ తమదైన టైమింగ్‌తో సీరియస్ థ్రిల్లర్ మూడ్‌లో కాస్త రిలీఫ్ అందిస్తారు. సంగీత దర్శకుడు సాయి కార్తీక్ అందించిన నేపథ్య సంగీతం సన్నివేశాల్లోని థ్రిల్‌ను నెక్స్ట్ లెవెల్‌కు తీసుకెళ్లింది. అనవసరమైన ల్యాగ్ లేకుండా తక్కువ రన్‌టైమ్‌తో కథనం వేగంగా సాగడం ఓటీటీ వీక్షకులకు బాగా ప్లస్ అయింది.

తెలుగు ఆహా ఓటీటీలోకి అడుగుపెట్టిన కొద్ది రోజుల్లోనే ఈ సినిమా ఏకంగా 100 మిలియన్ స్ట్రీమింగ్ మినిట్స్ దాటేసి రికార్డులకెక్కింది. ఒక హిస్టరీ క్రియేట్ చేసిన లవ్ స్టోరీ నుంచి.. హెడ్‌లైన్స్‌లో నిలిచే సస్పెన్స్ థ్రిల్లర్ వరకు అంటూ ఆహా యాజమాన్యం వేసిన స్పెషల్ క్యాప్షన్ ఇప్పుడు నెట్టింట వైరల్ అవుతోంది. వీకెండ్‌లో మంచి క్రైమ్ థ్రిల్లర్, సస్పెన్స్ డ్రామా చూడాలనుకునే డిజిటల్ ప్రియులకు ‘నా వైఫ్ మిస్సింగ్’ ఒక పర్‌ఫెక్ట్ ఛాయిస్‌గా నిలుస్తోంది.