Netflix Korean Drama : నెట్‌ఫ్లిక్స్‌లో ‘స్పుకీ ఇన్ లవ్’.. హారర్, లవ్, కామెడీ అదుర్స్.!

Netflix Korean Drama : ప్రస్తుతం ప్రపంచవ్యాప్తంగా కొరియన్ కంటెంట్‌కు ఉన్న క్రేజ్ గురించి ప్రత్యేకంగా చెప్పాల్సిన పనిలేదు. వినూత్నమైన కథాంశాలు, ఉత్కంఠ రేకెత్తించే ట్విస్టులు, ఆకట్టుకునే రొమాన్స్‌తో వచ్చే కే-డ్రామాలు , సిరీస్‌లకు భారతదేశంలోనూ మిలియన్ల సంఖ్యలో వీరాభిమానులు ఉన్నారు. ఈ క్రమంలోనే సుమారు మూడు వారాల క్రితం నెట్‌ఫ్లిక్స్‌లో అడుగుపెట్టిన ఒక కొత్త కొరియన్ సిరీస్ ప్రస్తుతం గ్లోబల్ టాప్-10 ట్రెండింగ్‌లో సంచలనం సృష్టిస్తోంది. హారర్, కామెడీ, రొమాన్స్ , క్రైమ్ థ్రిల్లర్ ఎలిమెంట్స్‌తో కూడిన ఈ సిరీస్ ఓటీటీ ప్రియులను విశేషంగా ఆకట్టుకుంటోంది.

IMDbలో 7.8 రేటింగ్.. ఓటీటీలో సరికొత్త రికార్డు

భయం, ప్రేమ , నవ్వులను సరైన పరిమాణంలో కలగలిపి రూపొందించిన 'స్పుకీ ఇన్ లవ్' (Spooky in Love) అనే దక్షిణ కొరియన్ సిరీస్ అంతర్జాతీయ స్థాయి ప్రశంసలు అందుకుంటోంది. ప్రముఖ ఓటీటీ రేటింగ్ ప్లాట్‌ఫారమ్ IMDbలో ఈ సిరీస్ ఏకంగా 7.8 బలమైన రేటింగ్‌ను సొంతం చేసుకుంది. ప్రముఖ రచయిత్రి చోయ్ జంగ్-మి ఈ చిత్రానికి అద్భుతమైన కథను అందించగా, లీ మిన్-సూ దీనికి దర్శకత్వ పగ్గాలు చేపట్టారు. కొరియన్ డ్రామాల్లో మంచి క్రేజ్ ఉన్న పార్క్ యూన్-బిన్, యాంగ్ సే-జియోంగ్ , ఓంగ్ సియోంగ్-వూ ఈ సిరీస్‌లో ప్రధాన పాత్రలలో నటించి తమ ఆకట్టుకునే నటనతో ప్రేక్షకులను మెప్పిస్తున్నారు.

కథేంటి?.. దెయ్యాలను చూసే సీఈఓ, దెయ్యాలంటే భయపడే ప్రాసిక్యూటర్

ఈ సిరీస్ 2011లో వచ్చిన సూపర్ హిట్ కొరియన్ చలనచిత్రం 'స్పెల్‌బౌండ్' ఆధారంగా రూపొందింది. ఒక పెద్ద ధనిక కుటుంబానికి వారసురాలు , ఒక ప్రముఖ హోటల్ సీఈఓ అయిన చియోన్ యో-రి (పార్క్ యూన్-బిన్) జీవితం చుట్టూ ఈ కథ తిరుగుతుంది. బయటకు ఎంతో దర్పంగా కనిపించే ఈమెకు ఒక రహస్యమైన అతీంద్రియ శక్తి ఉంటుంది. అదేమిటంటే.. ఆమెకు దెయ్యాలు స్పష్టంగా కనిపిస్తాయి. అన్యాయంగా చనిపోయి శాంతి లభించని ఆత్మలు ప్రతి రాత్రి ఆమెను వెంటాడుతూ తమ బాధలను చెప్పుకుంటూ ఉంటాయి.

మరోవైపు, ఎంతటి సంక్లిష్టమైన కేసులనైనా ఛేదించగల ప్రతిభావంతుడైన ప్రాసిక్యూటర్ మా కాంగ్-వూక్ (యాంగ్ సే-జియోంగ్) ఉంటాడు. చట్టం ముందు నేరస్థులను నిలబెట్టే ఈ ప్రాసిక్యూటర్‌కు దెయ్యాలంటే మాత్రం విపరీతమైన భయం. అనుకోని పరిస్థితుల్లో ఈ ఇద్దరి మార్గాలు ఒకటవుతాయి. నగరంలో ఏళ్లుగా పరిష్కారం కాకుండా పడివున్న పాత హత్య కేసులను ఛేదించేందుకు ఈ ఇద్దరూ కలిసి పనిచేయాల్సి వస్తుంది. దెయ్యాలు చూపించే ఆధారాల ద్వారా నేరస్థులను పట్టుకోవడానికి ఒక దెయ్యాలను చూసే సీఈఓ, దెయ్యాలంటే భయపడే ప్రాసిక్యూటర్ చేసే ప్రయాణంలో ఎదురయ్యే భయాందోళనలు, వినోదాత్మక సన్నివేశాలు , వారి మధ్య చిగురించే ఆసక్తికరమైన ప్రేమాయణమే ఈ 'స్పుకీ ఇన్ లవ్' సిరీస్ ప్రధాన ఆకర్షణ.

ప్రసార వివరాలు , ఎపిసోడ్స్ షెడ్యూల్

tvN టెలివిజన్ నెట్‌వర్క్ , నెట్‌ఫ్లిక్స్ ఓటీటీ వేదికలుగా జూలై 18న ఈ సిరీస్ ప్రపంచవ్యాప్తంగా ప్రసారం కావడం ప్రారంభమైంది. ప్రతి శనివారం , ఆదివారం రాత్రి 9:10 గంటలకు (KST) కొత్త ఎపిసోడ్లు అందుబాటులోకి వస్తున్నాయి. ఇప్పటివరకు ప్రసారమైన 6 ఎపిసోడ్‌లు ప్రేక్షకులలో తీవ్ర ఉత్కంఠను పెంచగా, రాబోయే ఎపిసోడ్‌ల కోసం వీక్షకులు ఎంతో ఆసక్తిగా ఎదురుచూస్తున్నారు.

మొత్తం 12 ఎపిసోడ్‌లుగా వస్తున్న ఈ సిరీస్‌లో ఏడో ఎపిసోడ్ ఈరోజు ప్రసారానికి సిద్ధంగా ఉండగా, ఎనిమిదో ఎపిసోడ్ ఆగస్టు 9న విడుదల కానుంది. ఇక మిగిలిన ఎపిసోడ్‌లు వరుసగా.. 9వ ఎపిసోడ్ ఆగస్టు 15న, 10వ ఎపిసోడ్ ఆగస్టు 16న, 11వ ఎపిసోడ్ – ఆగస్టు 22న, 12వ ఎపిసోడ్ (గ్రాండ్ ఫినాలే) ఆగస్టు 23న ప్రసారం కానున్నాయి. వారాంతాల్లో కుటుంబంతో కలిసి లేదా స్నేహితులతో సరదాగా చూసేందుకు ఒక పర్ఫెక్ట్ హారర్-కామెడీ ఎంటర్‌టైనర్ కోసం చూస్తున్నట్లయితే, నెట్‌ఫ్లిక్స్‌లో స్ట్రీమ్ అవుతున్న ఈ 'స్పుకీ ఇన్ లవ్' సిరీస్‌ను మీ వాచ్‌లిస్ట్‌లో కచ్చితంగా చేర్చుకోవచ్చు..