OTT Releases : ఈ వారం OTT బ్లాస్ట్.. మిస్ కాకూడని టాప్ రిలీజులు ఇవే..!

OTT Releases : ఈ వారం ఓటీటీ ప్రియులకు పండుగే అని చెప్పాలి. ప్రముఖ డిజిటల్ ప్లాట్‌ఫారమ్‌లైన నెట్‌ఫ్లిక్స్, అమెజాన్ ప్రైమ్ వీడియో, సోనీ లివ్, సన్ నెక్స్ట్ వంటి వేదికలపైకి వైవిధ్యభరితమైన సినిమాలు, వెబ్ సిరీస్‌లు దూసుకువస్తున్నాయి. రొమాంటిక్ డ్రామాలు, కామెడీ ఎంటర్‌టైనర్లు, క్రైమ్ థ్రిల్లర్లతో పాటు అనిమే, హాలీవుడ్ లవర్స్ కోసం ప్రత్యేకమైన షోలు కూడా అందుబాటులోకి వస్తున్నాయి.

నెట్‌ఫ్లిక్స్‌లో విక్రాంత్ మాస్సే ‘ముసాఫిర్ కేఫ్’

దివ్య ప్రకాష్ దూబే రాసిన ప్రముఖ హిందీ నవల ఆధారంగా తెరకెక్కిన 'ముసాఫిర్ కేఫ్' ఈ వారం నెట్‌ఫ్లిక్స్‌లో వినోదాన్ని పంచడానికి సిద్ధమైంది. జూలై 24 నుంచి స్ట్రీమింగ్ కానున్న ఈ సిరీస్‌లో విక్రాంత్ మాస్సే, వేదిక పింటో, మహిమా మక్వానా ప్రధాన పాత్రల్లో నటించారు. సాఫ్ట్‌వేర్ ఇంజనీర్‌గా ఉండే చందర్, తన గతాన్ని మర్చిపోవడానికి కొండ ప్రాంతాలకు వెళ్లి ఒక కేఫ్ ప్రారంభిస్తాడు. అక్కడ అతనికి ప్రీతి అనే అమ్మాయి పరిచయమవుతుంది. అయితే అతని పాత జ్ఞాపకాలు, అనుబంధాలు మళ్లీ తనను ఎలా వెంటాడాయనే కథాంశంతో ఈ రొమాంటిక్ డ్రామా ఆకట్టుకోనుంది.

ప్రైమ్ వీడియోలో కేకే మీనన్ ‘ఆదర్శ్ బాల్ విద్యాలయ’

అమేజాన్ ప్రైమ్ వీడియోలో జూలై 24 నుంచి 'ఆదర్శ్ బాల్ విద్యాలయ' అనే ఏడు ఎపిసోడ్ల కామెడీ డ్రామా సిరీస్ అందుబాటులోకి వస్తోంది. నగరంలోనే అత్యంత వెనుకబడిన ఒక ప్రభుత్వ పాఠశాలకు హెడ్‌మాస్టర్‌గా బాధ్యతలు చేపట్టిన జ్ఞానేశ్వర్ తివారీ అనే పాత్రలో కేకే మీనన్ నటించారు. ఉపాధ్యాయుల బాధ్యతారాహిత్యం, విద్యార్థుల అల్లరి, పాఠశాల నిధుల కొరత వంటి సమస్యల నడుమ ఆ స్కూల్ రూపురేఖలను మార్చడానికి ఆయన పడే తాపత్రయాన్ని వినోదాత్మకంగా, ఆలోచింపజేసేలా రూపొందించారు.

సౌత్ నుంచి వస్తున్న యాక్షన్ అండ్ క్రైమ్ థ్రిల్లర్లు

మలయాళ నటుడు టోవినో థామస్ నటించిన పీరియాడికల్ యాక్షన్ డ్రామా 'పల్లిచట్టంబి' థియేటర్లలో అలరించిన తర్వాత ఇప్పుడు సోనీ లివ్ ప్లాట్‌ఫారమ్‌లో జూలై 24న అడుగుపెడుతోంది. 1950ల కాలం నాటి కేరళ నేపథ్యంలో సాగే ఈ కథలో రాజకీయ, మతపరమైన ఉద్రిక్తతల నడుమ గ్రామాన్ని కాపాడే పోథన్ పాత్రలో టోవినో కనిపిస్తారు. ఇది మలయాళంతో పాటు తెలుగు, తమిళ, కన్నడ, హిందీ భాషల్లో లభ్యమవుతుంది. మరోవైపు అర్జున్ దాస్, అన్నా బెన్ ప్రధాన పాత్రల్లో నటించిన క్రైమ్ థ్రిల్లర్ 'కాన్ సిటీ' నెట్‌ఫ్లిక్స్‌లో జూలై 24 నుంచి రాబోతోంది. కర్ణాటకలోని ముల్కీ అనే ప్రాంతంలో హోటల్ నడుపుతూ సాధారణ కుటుంబంలా నటిస్తున్న నలుగురు కేటుగాళ్ల కథే ఈ సినిమా.

మరికొన్ని వైవిధ్యమైన ప్రాంతీయ చిత్రాలు

యంగ్ హీరో సిబి చంద్రన్ నటించిన తమిళ డ్రామా 'ఈగో రామన్' ప్రైమ్ వీడియోలో జూలై 24 నుంచి అందుబాటులోకి వస్తోంది. సివిల్ సర్వీసెస్ లక్ష్యంగా సాధన చేసే ఒక యువకుడు ఎదుర్కొన్న సవాళ్లు, సాధించిన విజయం చుట్టూ ఈ కథ సాగుతుంది. ఇక మలయాళ హారర్ కామెడీ ప్రియుల కోసం 'సీక్రెట్ ఆఫ్ కళింగ' సన్ నెక్స్ట్‌లో జూలై 24న విడుదలవుతోంది. న్యూ ఇయర్ వేడుకల కోసం వెళ్లిన విశ్వవిద్యాలయ విద్యార్థులకు ఒక పురాతన బావి కనిపించడం, ఆ తర్వాత వారి జీవితాల్లో జరిగే ఊహించని విచిత్ర సంఘటనల చుట్టూ ఈ కథ నడుస్తుంది.

డాక్యుమెంటరీ, అనిమే , హాలీవుడ్ వినోదం

నిజమైన నేరాల ఆధారంగా రూపొందిన 'ఎ టాక్సిక్ లవ్ స్టోరీ' అనే ట్రూ-క్రైమ్ డాక్యుమెంటరీ జూలై 22 నుంచి నెట్‌ఫ్లిక్స్‌లో స్ట్రీమ్ అవుతోంది. కాలిఫోర్నియాలోని ఒక దంపతులకు వచ్చే అనామక బెదిరింపు ఈమెయిళ్ల వెనుక ఉన్న షాకింగ్ నిజాలను ఇందులో చూపించారు. ఇక అనిమే ప్రేమికులు ఎంతో ఆసక్తిగా ఎదురుచూస్తున్న 'బ్లీచ్: థౌజండ్-ఇయర్ బ్లడ్ వార్ – ది కలమిటీ (పార్ట్ 4)' డిస్నీ ప్లాట్‌ఫారమ్‌లో జూలై 25న విడుదలవుతోంది. 'ది బిగ్ బ్యాంగ్ థియరీ' అభిమానులను అలరించేందుకు హాలీవుడ్ స్పిన్-ఆఫ్ సిరీస్ 'స్టువర్ట్ ఫెయిల్స్ టు సేవ్ ది యూనివర్స్' జూలై 23న హెచ్‌బీఓ మ్యాక్స్‌లో అందుబాటులోకి వచ్చింది. పొరపాటున మల్టీవర్స్ పరికరాన్ని పాడుచేసిన స్టువర్ట్ చేసే సాహసాల చుట్టూ ఈ కామెడీ సైన్స్ ఫిక్షన్ సిరీస్ సాగుతుంది.