Weekend OTT Releases: ఈ వీకెండ్ ఓటీటీలో 12 కొత్త సినిమాలు, సిరీస్‌లు..

Weekend OTT Releases: వారాంతం వస్తే చాలు ఓటీటీ ప్రియులు కొత్త సినిమాలు, సిరీస్‌ల కోసం డిజిటల్ ప్లాట్‌ఫామ్‌లపై కళ్లు కాయలు కాచేలా ఎదురుచూస్తుంటారు. ఈ వారాంతాన్ని మరింత ఆహ్లాదకరంగా మార్చేందుకు నెట్‌ఫ్లిక్స్, అమెజాన్ ప్రైమ్ వీడియో, జియోహాట్‌స్టార్, సోనీలివ్ వంటి ప్రముఖ ఓటీటీ ప్లాట్‌ఫామ్‌లు సరికొత్త కంటెంట్‌తో ముస్తాబయ్యాయి. రొమాన్స్, యాక్షన్, థ్రిల్లర్, డ్రామా విభాగాల్లో వినోదాన్ని పంచేందుకు సిద్ధమైన ఆ 12 ప్రతిష్టాత్మక చిత్రాలు , షోల వివరాలు చూద్దాం.

ది స్కాండల్ (నెట్‌ఫ్లిక్స్)

జోసన్ రాజవంశం నేపథ్యంతో రూపొందిన ఈ పీరియడ్ రొమాంటిక్ కె-డ్రామా ప్రసిద్ధ ఫ్రెంచ్ నవల 'లెస్ లయాసన్స్ డేంజరస్' ఆధారంగా తెరకెక్కింది. లేడీ చో (సన్ యే-జిన్), చో వోన్ (జి చాంగ్-వుక్) అనే ఇద్దరు వ్యక్తులు కలిసి ఆడే ప్రమాదకరమైన ప్రేమ ఆట , వారి కుట్రల మధ్య చిక్కుకునే అన్ హుయ్-యోన్ (నానా) కథే ఈ సిరీస్ సారాంశం.

తొడక్కమ్ (జియోహాట్‌స్టార్)

విస్మయ మోహన్‌లాల్ ప్రధాన పాత్రలో నటించిన యాక్షన్ ఆధారిత మలయాళ చిత్రం 'తొడక్కమ్'. ఇడుక్కి ప్రాంతంలో తన తండ్రితో కలిసి సాధారణ జీవితం గడిపే మార్షల్ ఆర్ట్స్ నిపుణురాలు మీను జీవితం ఒక కాంట్రాక్ట్ కిల్లర్‌తో జరిగిన ఘర్షణతో ఎలా మలుపు తిరిగింది, తన కుటుంబాన్ని కాపాడుకోవడానికి ఆమె చేసిన పోరాటం ఏమిటనేది చిత్ర కథంశం.

స్లో హార్సెస్ సీజన్ 6 (యాపిల్ టీవీ)

పాపులర్ ఎంఐ5 ఏజెంట్ల థ్రిల్లర్ సిరీస్ 'స్లో హార్సెస్' ఆరో సీజన్‌తో ప్రేక్షకుల ముందుకు వచ్చింది. గ్యారీ ఓల్డ్‌మన్ నేతృత్వంలోని డిస్ఫంక్షనల్ టీమ్ ఈసారి తమ సొంత ఏజెన్సీ నుంచే ఎదురయ్యే ప్రాణసంకటమైన కుట్రలను ఎలా తిప్పికొట్టిందో ఈ సీజన్‌లో ఉత్కంఠభరితంగా చూపించారు.

ది ఫిక్సర్స్ (నెట్‌ఫ్లిక్స్)

మాజీ గ్యాంగ్‌స్టర్ ఫెలిక్స్ కియాంగ్, రాజకీయ నాయకుని అహంకారి కొడుకు లూయిస్ హ్స్యూ అనే ఇద్దరు భిన్న ధృవాలు కలిసి బలవంతులైన క్లయింట్ల క్రిమినల్ స్కాండల్స్‌ను రహస్యంగా పరిష్కరించే క్రమంలో ఎదుర్కొనే సవాళ్లతో ఈ క్రైమ్ డ్రామా రూపుదిద్దుకుంది.

ది డాల్ (నెట్‌ఫ్లిక్స్)

పోలిష్ నవల ఆధారంగా రూపొందిన ఆరు భాగాల పీరియడ్ డ్రామా ఇది. ఒక సంపన్న వ్యాపారి, ఉన్నత వర్గానికి చెందిన మహిళ ప్రేమను గెలుచుకోవడానికి వార్సాలోని ఉన్నత వర్గాల్లోకి ఎలా ప్రవేశించాడు , ఆ క్రమంలో చోటుచేసుకున్న పరిణామాలను ఇందులో చిత్రీకరించారు.

నియాగ్లీ (అమేజాన్ ప్రైమ్ వీడియో)

ప్రసిద్ధ 'రీచర్' సిరీస్ స్పిన్-ఆఫ్‌గా వచ్చిన యాక్షన్ థ్రిల్లర్ సిరీస్ ఇది. తమ సన్నిహిత మిత్రుడి అనుమానాస్పద మృతి వెనుక ఉన్న నిజాలను వెలికితీసేందుకు ప్రైవేట్ ఇన్వెస్టిగేటర్ ప్రాన్సెస్ నియాగ్లీ (మరియా స్టెన్) జరిపిన ప్రమాదకర శోధన ఈ కథకు ప్రాణం.

లీ క్రోనిన్స్ ది మమ్మీ (జియోహాట్‌స్టార్)

ఈజిప్ట్‌లో ఎనిమిదేళ్ల క్రితం అదృశ్యమైన కేటీ హఠాత్తుగా ఇంటికి తిరిగిరావడం, ఆమె శరీరం ఒక ప్రాచీన రాక్షస పరాన్నజీవి (డెమోనిక్ పారాసైట్)కి నిలయంగా మారిందని తెలుసుకున్న తల్లిదండ్రులు తమ కూతురిని కాపాడుకోవడానికి పడే తపనతో కూడిన సూపర్‌నేచురల్ హారర్ చిత్రమిది.

లస్ట్ స్టోరీస్ 3 (నెట్‌ఫ్లిక్స్)

తీవ్ర ఆదరణ పొందిన నెట్‌ఫ్లిక్స్ ఆంథాలజీ సిరీస్‌లో మూడో భాగం విడుదలయ్యేందుకు సిద్ధమైంది. విక్రమాదిత్య మోత్వానే, శకున్ బాత్రా, విశాల్ భరద్వాజ్, కిరణ్ రావు సంయుక్తంగా దర్శకత్వం వహించిన ఈ చిత్రంలో అదితి రావు హైదరీ, సిద్ధార్థ్, రాధికా ఆప్టే, విజయ్ వర్మ, ఆలీ ఫజల్, కొంకణా సేన్ శర్మ ముఖ్య పాత్రల్లో నటించారు.

కట్టాలన్ (సోనీలివ్)

కేరళ-తమిళనాడు సరిహద్దు అడవుల్లో ఏనుగుల దంతాల స్మగ్లింగ్ చేసే రెండు ప్రత్యర్థి ముఠాల మధ్య జరిగే ఘోరమైన ముఠా కక్షలు, వన్యప్రాణి వేట నేపథ్యంలో సాగే ఉత్కంఠభరితమైన కథనంతో ఈ చిత్రం తెరకెక్కింది.

బెస్ట్ ఆఫ్ ది బెస్ట్ (నెట్‌ఫ్లిక్స్)

చిన్ననాటి స్నేహితులైన మాయ, అంజలి యూసీఎల్‌ఏ బోలీవుడ్-ఫ్యూజన్ డ్యాన్స్ టీమ్‌లో చేరిన తర్వాత, నేషనల్ ఛాంపియన్‌షిప్ పోటీల ఒత్తిడిలో వారి మధ్య తలెత్తిన పోటీతత్వం, స్నేహంలో వచ్చే మార్పుల చుట్టూ ఈ యూత్ డ్రామా తిరుగుతుంది.

యూ ప్లస్ మీ - అగైనెస్ట్ ది వరల్డ్ (అమేజాన్ ప్రైమ్ వీడియో)

సినిమా రంగంపై మక్కువ ఉన్న ధనిక యువతి ఆల్మా, తిరుగుబాటు మనస్తత్వం ఉన్న వదిమ్ ఒక ఫిల్మ్ ప్రాజెక్ట్‌లో కలవడం, వారి ప్రేమాయణం ఒక అపరిచిత స్టాకర్ పంపే బెదిరింపు మెసేజ్‌ల వల్ల ఎలాంటి మలుపులు తిరిగింది అనే అంశంతో ఈ రొమాంటిక్ థ్రిల్లర్ రూపొందింది.

ప్లాస్టిక్ బ్యూటీ (నెట్‌ఫ్లిక్స్)

ఆసుపత్రిలో ఉద్యోగం కోల్పోయిన అత్యవసర శస్త్రచికిత్స నిపుణురాలు ఫుమి నుమాటా, కాస్మెటిక్ మెడిసిన్ రంగంలోకి అడుగుపెట్టిన తర్వాత ఆ రంగంలో ఉండే అత్యాశ, గ్లామర్ వెనుక ఉన్న చీకటి కోణాలను ఎదుర్కొనే కథతో ఈ జపనీస్ డ్రామా నిర్మించబడింది.