Gokavaram: ఉత్సాహంగా చెకుముకి టాలెంట్ టెస్ట్ – విజేతలకు బహుమతులు

గోకవరం: విద్యార్థుల్లో శాస్త్రీయ దృక్పథాన్ని పెంపొందించడంతో పాటు వారి ప్రతిభను వెలికితీసే లక్ష్యంతో జన విజ్ఞాన వేదిక ఆధ్వర్యంలో నిర్వహించిన చెకుముకి టాలెంట్ టెస్ట్ గోకవరం మండల కేంద్రంలోని శ్రీ విద్య ఇంగ్లీష్ మీడియం స్కూల్‌లో శుక్రవారం ఉత్సాహంగా జరిగింది.

మండల స్థాయిలో నిర్వహించిన ఈ ప్రతిభా పరీక్షకు వివిధ పాఠశాలలకు చెందిన విద్యార్థులు ఉత్సాహంగా హాజరై తమ ప్రతిభను ప్రదర్శించారు. టాలెంట్ టెస్ట్ కన్వీనర్ ఎం. పార్థ విజేతల వివరాలను వెల్లడించారు.

హైస్కూల్ స్థాయిలో ప్రథమ స్థానాన్ని ఏపీ రెసిడెన్షియల్ స్కూల్, భూపతిపాలెం విద్యార్థులు సాధించగా, ద్వితీయ స్థానాన్ని జడ్పీహెచ్ స్కూల్, కామరాజుపేట విద్యార్థులు, తృతీయ స్థానాన్ని జడ్పీహెచ్ స్కూల్, అచ్చుతాపురం విద్యార్థులు కైవసం చేసుకున్నారు.

అప్పర్ ప్రైమరీ పాఠశాలల విభాగంలో ప్రథమ స్థానాన్ని ఎంపీయూపీ స్కూల్, గంగంపాలెం విద్యార్థులు, ద్వితీయ స్థానాన్ని ఎంపీయూపీ స్కూల్ ఉర్దూ, గోకవరం విద్యార్థులు సాధించారు.

ప్రైవేట్ పాఠశాలల విభాగంలో జ్ఞాన సరస్వతి విద్యా నికేతన్ విద్యార్థులు ప్రథమ స్థానంలో నిలవగా, శ్రీ విద్య ఇంగ్లీష్ మీడియం స్కూల్ విద్యార్థులు ద్వితీయ స్థానాన్ని సాధించారు.

విజేతలకు ఎంఈఓ-1 బి. గౌరమ్మ, ఎంఈఓ-2 ఎం. చిమ్మరాజు దొర, యూటీఎఫ్ జిల్లా కార్యదర్శి కె. నాగభూషణం, మండల అధ్యక్షులు పి.వి.ఎస్.ఆర్. త్రిమూర్తులు, ప్రధాన కార్యదర్శి పి.వి.వి.ఎస్. దుర్గాప్రసాద్ తదితరులు బహుమతులు అందజేశారు. ఈ కార్యక్రమంలో యూటీఎఫ్ సీనియర్ నాయకులు ఎం. ప్రేమ్ కుమార్, ఆర్. హరనాథ్, కె. శ్రీనివాస్, పి. సాయిబాబా, టి. నారాయణరావు, డి. సత్యనారాయణ, బి. నవీన్, బి. శ్రీనివాస్‌తో పాటు పాఠశాల ఉపాధ్యాయులు పాల్గొన్నారు.

విద్యార్థుల్లో శాస్త్రీయ ఆలోచనలకు వేదిక

చెకుముకి టాలెంట్ టెస్ట్ వంటి కార్యక్రమాలు విద్యార్థుల్లో శాస్త్రీయ ఆలోచనా విధానాన్ని, సృజనాత్మకతను, పోటీ తత్వాన్ని పెంపొందించేందుకు దోహదపడతాయని నిర్వాహకులు పేర్కొన్నారు. పాఠ్యాంశాలకే పరిమితం కాకుండా విజ్ఞానాన్ని అన్వేషించేలా విద్యార్థులను ప్రోత్సహించడం ఈ కార్యక్రమం ప్రధాన ఉద్దేశమని తెలిపారు.

ఈ కార్యక్రమాన్ని నిర్వహించేందుకు పాఠశాల ప్రాంగణాన్ని అందించడంతో పాటు విద్యార్థులు, ఉపాధ్యాయులకు స్నాక్స్ ఏర్పాటు చేసిన శ్రీ విద్య ఇంగ్లీష్ మీడియం స్కూల్కరస్పాండెంట్, ప్రిన్సిపాల్ ఎస్.ఆర్. దుర్గాప్రసాద్ మరియు పాఠశాల సిబ్బందికి చెకుముకి కన్వీనర్ ఎం. పార్థ, యూటీఎఫ్ నాయకులు ప్రత్యేక ధన్యవాదాలు తెలిపారు.

విద్యార్థుల ప్రతిభకు వేదికగా నిలిచిన ఈ చెకుముకి టాలెంట్ టెస్ట్ కార్యక్రమం మండలంలో విద్యార్థుల్లో విజ్ఞానంపై ఆసక్తిని మరింత పెంచేందుకు దోహదపడింది.