P Gannavaram: రాజీనామాల వార్తలను ఖండించిన పి.గన్నవరం టీడీపీ నేతలు!

P Gannavaram: తెలుగుదేశం పార్టీ (టీడీపీ) పి.గన్నవరం నియోజకవర్గానికి చెందిన మండల పార్టీ అధ్యక్షులు, నాయకులు తాము రాజీనామా చేశామంటూ సోషల్ మీడియా, టీవీ ఛానళ్లలో వస్తున్న వార్తలను తీవ్రంగా ఖండించారు. ఈ మేరకు వారు ఆదివారం ఒక వీడియో ప్రకటన విడుదల చేశారు.

​నిన్నటి నుంచి టీవీ ఛానళ్లు, వార్తాపత్రికలు, సోషల్ మీడియాలో మండల పార్టీ అధ్యక్షులు రాజీనామా చేశారంటూ ప్రచారం జరుగుతున్న వార్తల్లో ఎలాంటి నిజం లేదని నాయకులు స్పష్టం చేశారు.

పి.గన్నవరం నియోజకవర్గ కో-కన్వీనర్ మోకా ఆనంద సాగర్ వ్యవహార శైలి కారణంగా తాము, తమ కేడర్ ఇబ్బందులు ఎదుర్కొంటున్నామని, ఈ విషయాన్ని పార్టీ శ్రేయస్సు మరియు కార్యకర్తల ప్రయోజనాల దృష్ట్యా పార్టీ అధిష్టానం దృష్టికి తీసుకెళ్లామని వివరించారు. ​తమ సమస్యలపై పార్టీ అధిష్టానం సానుకూలంగా స్పందించి, పరిష్కరిస్తామని హామీ ఇచ్చిందని వెల్లడించారు.

తమకు పార్టీ అధిష్టానంపై పూర్తి నమ్మకం ఉందని, ముఖ్యమంత్రి నారా చంద్రబాబు నాయుడు, వర్కింగ్ ప్రెసిడెంట్ నారా లోకేష్ నాయకత్వంలో పార్టీ బలోపేతానికి ఎప్పటిలాగే శ్రమిస్తామని తెలిపారు. ​

ఈ ప్రకటన విడుదల చేసిన వారిలో పి.గన్నవరం మండల పార్టీ అధ్యక్షురాలు ప్రతిపాటి ఉమా మహేశ్వరి, అంబాజీపేట మండల పార్టీ అధ్యక్షుడు గూడాల ఫణి, అయినవిల్లి మండల పార్టీ అధ్యక్షుడు వస్కా శ్యామ్ సుందర్ ఉన్నారు.