Viral: ఓర్నీ.! సిగ్నల్ బ్రేక్ చేయకున్నా ఇంటికొచ్చిన చలానా.. ఆరా తీయగా..

Viral: భారతీయ నగరాలలో ట్రాఫిక్ ఉల్లంఘనలను సులువుగా గుర్తించడానికి ప్రభుత్వం ఆధునిక సాంకేతికతను ఉపయోగిస్తోంది. ఇందులో భాగంగా రోడ్లపై సీసీ కెమెరాలతో పాటు ఏఐ కెమెరాలను కూడా భారీ సంఖ్యలో ఏర్పాటు చేస్తున్నారు. ఈ అత్యాధునిక కెమెరాలు హెల్మెట్ ధరించని వారు అలాగే సీట్ బెల్ట్ పెట్టుకోని వారిని గుర్తించి ఆటోమేటిక్‌గా ఈ-చలాన్‌లను జారీ చేస్తుంటాయి. అయితే కొన్నిసార్లు ఈ సాంకేతిక పరిజ్ఞానంలో జరిగే చిన్నపాటి పొరపాట్ల వల్ల వాహనదారులు విచిత్రమైన సమస్యలను ఎదుర్కొవాల్సి వస్తోంది. తాజాగా బెంగళూరు నగరంలో ఒక వాహనదారుడికి ఇలాంటి విచిత్రమైన అనుభవమే ఎదురైంది.

బెంగళూరులో బైక్ మీద వెళ్తున్న ఒక వ్యక్తి హెల్మెట్ ధరించి ఉన్నప్పటికీ అతనికి ఏఐ కెమెరా రూ. 500 చలానా విధించింది. నిబంధనల ప్రకారం ఆయన అన్ని జాగ్రత్తలు తీసుకున్నప్పటికీ జరిమానా పడటంతో ఆశ్చర్యపోవడం ఆయన వంతైంది. అసలు ఎందుకు చలానా పడిందో అని ఆరా తీయగా ఆసక్తికరమైన నిజం వెలుగు చూసింది. ఆ వాహనదారుడు తన వీపునకు ఒక గిటార్ బ్యాగును తగిలించుకుని ప్రయాణిస్తున్నాడు. దాన్ని పరిశీలించిన ఏఐ కెమెరా వెనుక మరో ప్రయాణికుడు కూర్చున్నాడని పొరబడింది.

వెనుక ఉన్న ఆ వ్యక్తి హెల్మెట్ పెట్టుకోలేదని ఏఐ భావించి వెంటనే నిబంధనల ఉల్లంఘన కింద చలాన్‌ను జనరేట్ చేసింది. టెక్నాలజీ ఆధారంగా పనిచేసే ఈ కెమెరాలు వస్తువులను మనుషులుగా సరిగ్గా గుర్తించలేకపోవడం వల్ల ఇలాంటి పొరపాట్లు జరుగుతున్నాయని తెలుస్తోంది. సోషల్ మీడియాలో ఈ ఘటనకు సంబంధించిన ఫోటోలు ప్రస్తుతం విపరీతంగా వైరల్ అవుతున్నాయి. దీన్ని చూసిన నెటిజన్లు ఏఐ టెక్నాలజీ అతిగా ఆలోచించి సాధారణ ప్రజలను ఇబ్బంది పెడుతోందని సరదాగా కామెంట్లు చేస్తున్నారు.

ఈ విచిత్ర ఘటనపై ట్రాఫిక్ పోలీసులు కూడా స్పందించారు. టెక్నాలజీలో ఇలాంటి పొరపాట్లు జరగడం సహజమేనని అధికారులు వెల్లడించారు. ఏఐ కెమెరాలు చేసే ఇలాంటి టెక్నికల్ లోపాలను వెంటనే సరిదిద్దుతామని తెలిపారు. పొరపాటున జారీ అయిన ఆ చలాన్‌ను రద్దు చేస్తామని, ఎవరైనా వాహనదారులు ఇలాంటి సమస్యలను ఎదుర్కొంటే వెంటనే ఫిర్యాదు చేయవచ్చని సూచించారు. భవిష్యత్తులో ఇలాంటి పొరపాట్లు పునరావృతం కాకుండా తగిన సాంకేతిక మార్పులు చేస్తామని ట్రాఫిక్ శాఖ స్పష్టం చేసింది.