Road Potholes: రోడ్డు గుంతలకు ఏఐ చెక్: బెంగళూరు ఇంజినీర్ సరికొత్త ఆవిష్కరణ!

Road Potholes: రోడ్డుపై గుంత కనిపించగానే ప్రయాణికులకు తీవ్ర అవస్థలు, వాహనాలకు మరమ్మతులు, అధికారులపై అసహనం గుర్తురావడం సాధారణం. అయితే బెంగళూరుకు చెందిన సాఫ్ట్‌వేర్ ఇంజినీర్ గౌరవ్ సేన్ మాత్రం ఈ నిత్య సమస్యకు తన నైపుణ్యంతో అద్భుతమైన సాంకేతిక పరిష్కారాన్ని కనుగొన్నారు. ఆర్టిఫిషియల్ ఇంటెలిజెన్స్ (AI), డ్యాష్‌కామ్ , ప్రభుత్వ కాంట్రాక్టుల డేటాను ఏకీకృతం చేస్తూ పౌర సమస్యల పరిష్కారంలో విప్లవాత్మక అడుగు వేశారు. ఈ ఆవిష్కరణ ప్రస్తుతం సోషల్ మీడియాలో విశేష ఆదరణ పొందుతోంది.

ఏఐ సాంకేతికతతో గుంతల గుర్తింపు

గౌరవ్ సేన్ తన కారుకు ఒక డ్యాష్‌కామ్, జీపీఎస్ , యాక్సిలెరోమీటర్‌ను అమర్చి ప్రయాణం ప్రారంభించారు. వాహనం వెళ్తున్న సమయంలో డ్యాష్‌కామ్ రికార్డు చేసే దృశ్యాలను ఏఐ విజన్ మోడల్స్ క్షుణ్ణంగా విశ్లేషిస్తాయి. దూరానికి స్పీడ్ బ్రేకర్లలా కనిపించే రోడ్డు గుంతలను కూడా ఈ సిస్టమ్ అత్యంత కచ్చితత్వంతో వేరుచేసి పసిగడుతుంది. ఓపెన్ ఏఐ (OpenAI) సాంకేతికత , కోడెక్స్ ఆధారంగా గౌరవ్ రూపొందించిన అప్లికేషన్ ఈ డేటానంతటినీ సేకరించి లొకేషన్‌తో సహా భద్రపరుస్తుంది.

గుంత మాత్రమే కాదు.. బాధ్యులైన అధికారుల వివరాలు ప్రత్యక్షం

కేవలం రోడ్డుపై గుంతలను గుర్తించడమే కాకుండా, "ఈ రోడ్డు నిర్మించిన కాంట్రాక్టర్ ఎవరు? మరమ్మతు చేయాల్సిన అధికారి ఎవరు?" అనే ప్రశ్నకు ఈ యాప్ కచ్చితమైన సమాధానం ఇస్తుంది. గౌరవ్ తన అప్లికేషన్‌ను దాదాపు 2,900 ప్రభుత్వ టెండర్ కాంట్రాక్టుల డేటాతో అనుసంధానించారు. దీనివల్ల కారు వెళ్తున్న రోడ్డు ఏ కాంట్రాక్టర్ పరిధిలోకి వస్తుంది, ఆ రోడ్డు ఇంకా గ్యారంటీ వ్యవధిలోనే ఉందా అనే వివరాలను సిస్టమ్ వెలికితీస్తుంది. గుంత చిత్రం, కచ్చితమైన జీపీఎస్ కోఆర్డినేట్స్, టెండర్ నంబర్ , సంబంధిత అధికారి పేరుతో సహా కేవలం నాలుగు సెకన్లలో ఫిర్యాదు లేఖను ఇది సిద్ధం చేస్తుంది.

ఆఫీసు ప్రయాణంలో పరీక్ష.. నెటిజన్ల ప్రశంసలు

తన ఆఫీసు ప్రయాణంలో భాగంగా గౌరవ్ ఈ సిస్టమ్‌ను ప్రత్యక్షంగా పరీక్షించగా, ఒకే మార్గంలో 12 రోడ్డు గుంతలను ఆధారాలతో సహా రికార్డు చేసింది. ఈ ప్రాజెక్టుకు సంబంధించిన వీడియో వైరల్ అవ్వడంతో నెటిజన్ల నుంచి ప్రశంసల వర్షం కురుస్తోంది. రోడ్ల నిర్వహణలో పారదర్శకత పెంచడానికి, కాంట్రాక్టర్లు , అధికారులలో జవాబుదారీతనాన్ని పెంపొందించడానికి ప్రభుత్వ పౌర వేదికలు కూడా ఇటువంటి అధునాతన ఏఐ విధానాలను అమలు చేయాలని ప్రజలు అభిప్రాయపడుతున్నారు.

ఒక ఇంజినీర్ తన సొంత ప్రయాణ సమస్య నుంచి ప్రారంభించిన ఈ ఆలోచన, ఇప్పుడు దేశవ్యాప్తంగా సాంకేతిక పరిజ్ఞానంతో పౌర సమస్యలను ఎలా పరిష్కరించవచ్చో నిరూపించింది.