Amar Chand Bhanthia : ఝాన్సీ లక్ష్మీబాయి కోసం ఖజానానే ధారపోసిన వీరుడు ఎవరో తెలుసా..!

Amar Chand Bhanthia : భారతదేశానికి స్వాతంత్ర్యం అనేది అయాచితంగా వచ్చిన వరం కాదు. బ్రిటీష్ పాలకుల అణచివేత నుండి విముక్తి పొందేందుకు ఎందరో వీరులు తమ ప్రాణాలను పణంగా పెట్టారు. కొందరి పేర్లు చరిత్ర పుటల్లో సువర్ణాక్షరాలతో లిఖించబడగా, మరికొందరు నిశ్శబ్దంగా విప్లవానికి బాటలు వేసి విస్మరణకు గురయ్యారు. అటువంటి అరుదైన యోధులలో ఒకరు అమర్ చంద్ బాంతియా. 1857 సిపాయిల తిరుగుబాటులో రాజస్థాన్ నుండి పోరాడిన తొలి అమరవీరుడిగా ఆయన చరిత్రలో నిలిచిపోయారు.

వ్యాపార సామ్రాజ్యం నుండి రాజ్య కోశాధికారి వరకు

అమర్ చంద్ బాంతియా కుటుంబం రాజస్థాన్‌లోని బిక్కనీర్‌కు చెందిన ఓస్వాల్ జైన కుటుంబం. వీరి పూర్వీకులు పేదలకు విపరీతంగా సంపదను పంచేవారు, అందుకే వారికి 'బాంతియా' (అంటే పంచేవాడు అని అర్థం) అనే పేరు వచ్చింది. వ్యాపారంలో నష్టాలు రావడంతో అమర్ చంద్ పదేళ్ల వయసులో తన కుటుంబంతో కలిసి గ్వాలియర్‌కు తరలివెళ్లారు. అక్కడ తన పట్టుదల, ఆర్థిక నైపుణ్యంతో వ్యాపారంలో గొప్ప పేరు సంపాదించారు. ఆయన ప్రతిభను గుర్తించిన గ్వాలియర్ మహారాజు జయాజీరావు సింధియా, తన రాజ్య ఖజానా అయిన 'గంగాజలి'కి అమర్ చంద్‌ను చైర్మన్‌గా నియమించారు. గ్వాలియర్ సింధియా పాలకులు రత్నాల రాజులుగా ప్రసిద్ధి చెందారు, వారి ఖజానా వజ్రవైఢూర్యాలతో నిండి ఉండేది. దానిని అత్యంత సమర్థవంతంగా నిర్వహించినందుకు ఆయనకు 'నగరసేత్' అనే బిరుదు లభించింది.

విప్లవ జ్వాల, దేశభక్తి

బ్రిటీష్ వారి అరాచకాలు దేశవ్యాప్తంగా మిన్నంటుతున్న తరుణంలో 1857 తిరుగుబాటు మొదలైంది. అయితే అప్పటి గ్వాలియర్ సంస్థానం బ్రిటీష్ వారికి మిత్రదేశంగా ఉండేది. అమర్ చంద్ మనసులో మాత్రం దేశభక్తి రగులుతూ ఉండేది. ఆయుధాలు పట్టమని కొందరు కోరినప్పుడు, "నేను స్వయంగా ఆయుధాలు పట్టలేకపోవచ్చు కానీ, సమయం వచ్చినప్పుడు విప్లవకారులకు వెలకట్టలేని సాయం చేస్తాను" అని ఆయన మాటిచ్చారు. 1858లో ఝాన్సీ రాణి లక్ష్మీబాయి, తాంతియా తోపేలు గ్వాలియర్ కోటను స్వాధీనం చేసుకున్నప్పుడు వారి సైన్యం తీవ్ర ఆర్థిక ఇబ్బందుల్లో ఉంది. సైనికులకు జీతాలు లేవు, ఆహారం, నీరు నిండుకున్నాయి.

రాణి కోరిక మేరకు ఖజానా అప్పగింత

ఆ క్లిష్ట పరిస్థితుల్లో అమర్ చంద్ బాంతియా తన మాటను నిలబెట్టుకున్నారు. గ్వాలియర్ కోటలో దాచి ఉంచిన 'గంగాజలి' ఖజానా తాళాలను రాణి లక్ష్మీబాయికి అప్పగించారు. అంతేకాకుండా, తన వ్యాపారం ద్వారా తాను సంపాదించిన సొంత సంపదను కూడా విప్లవకారుల అవసరాల కోసం దానం చేశారు. అహింసా మార్గాన్ని నమ్మే వ్యక్తి అయినప్పటికీ, దేశ స్వాతంత్ర్యం కోసం తన బాధ్యతను అత్యున్నత రీతిలో నెరవేర్చారు. ఈ ఆర్థిక సాయంతోనే రాణి లక్ష్మీబాయి సైన్యం బ్రిటీష్ వారితో మురార్ వద్ద జరిగిన నిర్ణయాత్మక యుద్ధంలో వీరోచితంగా పోరాడగలిగింది.

బ్రిటీష్ వారి క్రూరత్వం , వీరమరణం

యుద్ధం ముగిసి బ్రిటీష్ వారు మళ్లీ గ్వాలియర్‌ను ఆక్రమించినప్పుడు, ఖజానా ఖాళీగా ఉండటం చూసి విస్తుపోయారు. దీనికి కారణం అమర్ చంద్ అని తెలియగానే ఆయనపై రాజద్రోహం కేసు మోపారు. 1858 జూన్ 22న ఆయనను తన నివాసం సమీపంలోని సరాఫా బజార్‌లో ఒక వేప చెట్టుకు ఉరితీశారు. ప్రజల్లో భయం పుట్టించేందుకు ఆయన మృతదేహాన్ని మూడు రోజుల పాటు ఆ చెట్టుకే వేలాడదీశారు. తాను పుట్టి పెరిగిన వీధిలోనే, తాను సేవ చేసిన నగరం కోసమే ఆయన చివరకు ప్రాణత్యాగం చేశారు.

నేడు గ్వాలియర్ బులియన్ మార్కెట్‌లో అమర్ చంద్ బాంతియా విగ్రహం ఆయన త్యాగానికి చిహ్నంగా కనిపిస్తుంది. ప్రతి సంవత్సరం జూన్ 22న రాజస్థాన్ , మధ్యప్రదేశ్ ప్రజలు ఆయనను స్మరించుకుంటారు. స్వాతంత్ర్య సమరంలో సంపదను ఆయుధంగా మార్చి బ్రిటీష్ వారిని గడగడలాడించిన ఈ 'రాజస్థాన్ మంగళ్ పాండే' చరిత్రలో చిరస్థాయిగా నిలిచిపోయారు.