Ambulance Hero : కొండచరియల మధ్య పసికందును కాపాడిన రియల్ హీరో..

Ambulance Hero : ప్రకృతి విపత్తుల వేళ సొంత ప్రాణాలను సైతం పణంగా పెట్టి ఇతరుల జీవితాలను నిలబెట్టే వ్యక్తులే నిజమైన కథానాయకులు. తాజాగా హిమాచల్ ప్రదేశ్‌లోని చంబా జిల్లాలో అలాంటి ఒక అద్భుతమైన సన్నివేశం చోటుచేసుకుంది. ఎడతెరిపి లేకుండా కురుస్తున్న భారీ వర్షాల వల్ల ఒకవైపు కొండచరియలు విరిగిపడుతుంటే, మరోవైపు తీవ్ర భయాందోళనల నడుమ ఒక అంబులెన్స్ ఉద్యోగి చూపిన సాహసవంతమైన చొరవ ఇప్పుడు దేశవ్యాప్తంగా అందరి దృష్టిని ఆకర్షిస్తోంది. కొండపై నుంచి రాళ్లు రువ్వుతున్నట్లు పడుతున్నప్పటికీ లెక్కచేయకుండా, ఏడు నెలల పసికందును రక్షించిన ఆ వ్యక్తి పై ప్రస్తుతం ప్రశంసల వర్షం కురుస్తోంది.

కళ్లముందే విరిగిపడుతున్న కొండచరియలు.. ప్రాణాలకు తెగించిన దృశ్యం

హిమాచల్ ప్రదేశ్‌లో కొనసాగుతున్న వర్షాకాలం ఆ ప్రాంత వాసులను, అత్యవసర వైద్య సిబ్బందిని నిత్యం గండంలో నెడుతోంది. వర్షాల ధాటికి చంబా జిల్లాలోని కొండ ప్రాంత రహదారులు తీవ్రంగా దెబ్బతిన్నాయి. భారీ బండరాళ్లు, వదులైన రాళ్లు, మందపాటి బురదతో రోడ్లన్నీ ప్రయాణానికి వీలులేకుండా మారిపోయాయి. పైనున్న కొండ ఏ క్షణంలోనైనా విరిగిపడే ప్రమాదం పొంచి ఉంది. జూన్ 23న నిఖిల్ సైనీ అనే వ్యక్తి 'ఎక్స్' వేదికగా పంచుకున్న ఒక వీడియో ద్వారా ఈ భయాందోళనకరమైన దృశ్యం వెలుగులోకి వచ్చింది. కొండపై నుంచి చిన్న చిన్న రాళ్లు జారిపడుతున్నా, ఫ్లోరోసెంట్ సేఫ్టీ జాకెట్ ధరించిన సదరు అంబులెన్స్ ఉద్యోగి ఏమాత్రం వెనుకాడలేదు. ఆ పసికందును తన గుండెలకు గట్టిగా హత్తుకుని, జారే మట్టి , రాళ్ల నడుమ ఎంతో జాగ్రత్తగా అడుగులు వేస్తూ అత్యంత ప్రమాదకరమైన ఆ మార్గాన్ని దాటించాడు.

రోడ్డు క్లియర్ అయ్యే వరకు ఆగకుండా సమయస్ఫూర్తి

భారీ వర్షాల కారణంగా కొండప్రాంతాలలో రహదారులు పూర్తిగా మూసుకుపోవడంతో, అంబులెన్సులు లేదా ఇతర వాహనాలు ముందుకు వెళ్లేందుకు వీలులేకుండా పోయింది. అధికారులు వచ్చి శిథిలాలను తొలగించి రోడ్డును పునరుద్ధరించే వరకు వేచి చూస్తే, ఆ చిన్నారి ప్రాణాలకే ప్రమాదం వాటిల్లే అవకాశం ఉందని సదరు ఉద్యోగి గ్రహించాడు. అందుకే ఏమాత్రం ఆలస్యం చేయకుండా తక్షణమే రంగంలోకి దిగాడు. చుట్టూ ఉన్న స్థానికులు, ఇతర అత్యవసర సిబ్బంది సహాయం అందిస్తున్నప్పటికీ, తన పట్టు తప్పకుండా ఎంతో సమయస్ఫూర్తితో పాపాయిని సురక్షిత ప్రాంతానికి చేర్చాడు. ఆ చిన్నారికి త్వరితగతిన వైద్యం అందాలనే తపనతో అతను చూపిన చొరవ స్థానికులను సైతం అబ్బురపరిచింది.

వాహనాలు వదిలేసి కిలోమీటర్ల కొద్దీ నడుస్తున్న అత్యవసర సిబ్బంది

ప్రస్తుతం హిమాచల్ ప్రదేశ్‌లోని పలు జిల్లాల్లో పరిస్థితి చాలా తీవ్రంగా ఉంది. ఎడతెరిపి లేని వర్షాలు, తరచుగా విరిగిపడే కొండచరియల కారణంగా ప్రధాన రహదారులన్నీ దెబ్బతిన్నాయి. దీంతో అత్యవసర పరిస్థితుల్లో రోగుల వద్దకు చేరుకోవడానికి అంబులెన్స్ సిబ్బంది , సహాయక బృందాలు తమ వాహనాలను ఉన్నచోటే వదిలేసి, కిలోమీటర్ల కొద్దీ కాలినడకన ప్రయాణించాల్సి వస్తోంది. ప్రాణాపాయంలో ఉన్న బాధితులను కాపాడేందుకు ఈ యోధులు పడుతున్న శ్రమ వర్షాకాలంలో ఎంతటి సవాళ్లు ఎదురవుతున్నాయో స్పష్టంగా చూపుతోంది.

సోషల్ మీడియాలో ప్రశంసల నీరాజనాలు

ఈ సాహసవంతమైన రెస్క్యూ వీడియో సోషల్ మీడియాలో వైరల్ అయినప్పటి నుంచి ఆ అంబులెన్స్ ఉద్యోగి స్వార్థం లేని సేవపై నెటిజన్ల నుంచి విపరీతమైన ఆదరణ లభిస్తోంది. "నిజమైన ధైర్యమంటే అత్యంత అవసరమైన సమయంలో ఇతరులకు సహాయం చేయడమే. చిన్నారి భద్రతకు ప్రథమ ప్రాధాన్యం ఇచ్చిన ఆ ఉద్యోగికి శిరస్సు వంచి నమస్కరిస్తున్నాం" అని ఒక నెటిజన్ కామెంట్ చేయగా, "సూపర్ హీరోలందరూ క్యాప్‌లు లేదా స్పెషల్ సూట్లు ధరించరు.. వీరే మన సమాజానికి నిజమైన హీరోలు" అని మరొకరు రాసుకొచ్చారు. ఆపద సమయంలో మానవత్వాన్ని చాటిచెప్పిన ఈ సంఘటన సమాజంపై నమ్మకాన్ని పునరుద్ధరించిందని, ఇలాంటి కథలే నలుగురికి స్ఫూర్తినిస్తాయని నెటిజన్లు ఆ కాపాడిన అంబులెన్స్ ఉద్యోగిని కొనియాడుతున్నారు.

He deserves all the fame and applause ❤️
An ambulance staff member in Chamba carried a 7-month-old baby through a dangerous stretch of falling stones, putting his own life at risk so the little one could make it to safety. pic.twitter.com/8VIRZhZAMt

— Nikhil saini (@iNikhilsaini) July 23, 2026