Viral Video : మేము చైనీస్ కాదు.. ఇండియన్స్.. చిన్నారి కౌంటర్..!
Viral Video : మన దేశంలో ఈశాన్య రాష్ట్రాల (నార్త్ ఈస్ట్) ప్రజలు తరచూ ఎదుర్కొనే జాతి వివక్ష, రంగు , రూపం ఆధారంగా చేసే వ్యాఖ్యలపై అరుణాచల్ ప్రదేశ్కు చెందిన ఒక
Viral-Video
Viral Video : మన దేశంలో ఈశాన్య రాష్ట్రాల (నార్త్ ఈస్ట్) ప్రజలు తరచూ ఎదుర్కొనే జాతి వివక్ష, రంగు , రూపం ఆధారంగా చేసే వ్యాఖ్యలపై అరుణాచల్ ప్రదేశ్కు చెందిన ఒక చిన్నారి ఇచ్చిన సమాధానం ప్రస్తుతం దేశవ్యాప్తంగా విపరీతంగా చర్చనీయాంశమైంది. "మీరు చైనీసా?" అని అడిగిన ఒక వ్యక్తి ప్రశ్నకు ఆ పాప అత్యంత ప్రశాంతంగా, అంతే స్పష్టతతో ఇచ్చిన ధీటైన సమాధానం సోషల్ మీడియా వేదికగా నెటిజన్ల హృదయాలను గెలుచుకోవడమే కాకుండా, సమాజంలో దాగి ఉన్న వివక్షత ఆలోచనలను ప్రశ్నిస్తోంది.
చైనీస్ అంటే కోపం వస్తుంది.. మేము పక్కా భారతీయులం
ప్రస్తుతం ఇన్స్టాగ్రామ్, ఎక్స్ (ట్విట్టర్) లో వైరల్ అవుతున్న ఆ వీడియోలో, ఒక వ్యక్తి చిన్నారి వద్దకు వచ్చి "మీరు చైనీసా?" అని ఆరా తీస్తాడు. ఆ ప్రశ్నకు ఏమాత్రం భయపడకుండా లేదా సంకోచించకుండా ఆ పాప తన స్వచ్ఛమైన హిందీలో చెప్పిన మాటలు ప్రతీ ఒక్కరినీ కట్టిపడేస్తున్నాయి."హం లోగ్ ఇండియన్ హైన్. ఆప్ హంకో చైనీస్ బోల్నే సే హం బహుత్ గుస్సా హోతే హైన్, బహుత్ దుఖీ హోతే హైన్. హంకో ఇండియన్ బోలో. హం ఇండియా కా హై. హం ఇటానగర్ మే రహతే హై" (మేము భారతీయులం. మీరు మమ్మల్ని చైనీస్ అని పిలిస్తే మాకు తీవ్రమైన కోపం వస్తుంది, చాలా బాధ కలుగుతుంది. మమ్మల్ని భారతీయులు అని పిలవండి. మేము భారతదేశానికి చెందినవాళ్ళం, ఇటానగర్ లో నివసిస్తున్నాం) అని ఆ చిన్నారి అమాయకంగానే అయినా, ఎంతో ఖరాఖండిగా వ్యాఖ్యానించింది.
సోషల్ మీడియాలో వెల్లువెత్తుతున్న మద్దతు – ప్రశంసల వర్షం
ఈ వీడియో వైరల్ కావడంతో దేశవ్యాప్తంగా నెటిజన్ల నుంచి విశేష స్పందన లభిస్తోంది. చిన్న వయసులోనే తన అస్తిత్వం, దేశభక్తి, మూలాల పట్ల ఆ పాప చూపిన స్పష్టతను ప్రతి ఒక్కరూ ముక్తకంఠంతో ప్రశంసిస్తున్నారు. ఆ పాప మాటలు విన్న చాలామంది "సొంత దేశంలోనే తమ పౌరసత్వాన్ని, భారతీయతను గుర్తుచేయాల్సి రావడం నిజంగా విచారకరం" అని అభిప్రాయపడుతున్నారు. "ఆ పాప ఎవరికీ ఎలాంటి వివరణలు ఇచ్చుకోవాల్సిన అవసరం లేదు, తను పక్కా భారతీయురాలు" అని నెటిజన్లు మద్దతుగా కామెంట్లు పెడుతున్నారు.
దశాబ్దాలుగా నార్త్ ఈస్ట్ ప్రజలను వేధిస్తున్న సామాజిక రుగ్మత
అరుణాచల్ ప్రదేశ్, మణిపూర్, అస్సాం, మేఘాలయ వంటి ఈశాన్య రాష్ట్రాలకు చెందిన ప్రజలను వారి శరీర ఆకృతి, కళ్ల రూపురేఖలను బట్టి చైనీస్, నేపాలీ లేదా అపరిచితులుగా భావించడం నేటికీ అనేక ప్రాంతాల్లో జరుగుతోంది. ఇది కేవలం తెలియక అడిగే ప్రశ్న మాత్రమే కాదు, ఆ ప్రాంత ప్రజల మనోభావాలను తీవ్రంగా గాయపరిచే అంశం. ఈ చిన్నారి మాట్లాడిన ప్రతి మాట కేవలం ఒక వైరల్ క్లిప్ మాత్రమే కాదు, ఈశాన్య భారత ప్రజల ఆత్మగౌరవానికి ప్రతిరూపంగా నిలిచింది. సమాజంలో వేళ్లూనుకున్న వివక్షత వైఖరికి ఎలాంటి ముసుగు లేకుండా, తన గంభీరమైన స్వరంతో ఆ పాప ఇచ్చిపడేసిన సందేశం అందరికీ కన్నువిప్పు కలిగిస్తోంది.
G Krishna
అక్షరంతో మొదలైన ప్రయాణం.. అంకెల్లో చెప్పాలంటే పదేళ్ల అనుభవం..! 2015లో కెరీర్ స్టార్ట్ చేసి, ప్రింట్ మీడియా నుంచి డిజిటల్ విప్లవం వరకు అన్నిటినీ దగ్గరగా చూశాను. అంతర్జాతీయ పరిణామాల నుంచి దేశ రాజధాని రాజకీయాల వరకు, గల్లీ స్థాయి వార్తల నుంచి ఢిల్లీ స్థాయి విశ్లేషణల వరకు ప్రతి అంశాన్ని లోతుగా అధ్యయనం చేస్తూ కథనాలు అందించాను. టెక్నాలజీ స్పీడ్, బిజినెస్ లెక్కలైనా, ఆస్ట్రాలజీ విశ్లేషణ ఏదైనా.. నా నుంచి వచ్చే ప్రతి కథనం ప్రతి వార్త పాఠకుడికి ఇన్ఫర్మేషన్తో పాటు ఇంట్రెస్ట్ను కూడా అందిస్తుంది.