Brave Woman: అది పాము అనుకుందా..ఇంకెమైనా అనుకుందా..అలా పట్టుకుంది ఏంటి..!

Snake : పాము అనే పేరు వినగానే ఎంతటి ధైర్యవంతుడైనా ఒక్కసారిగా వణికిపోతాడు. అది కళ్లముందు కనిపిస్తే ఇక చెప్పక్కర్లేదు.. ప్రాణాలు గుప్పిట్లో పెట్టుకుని పరుగులు తీస్తాం. అలాంటిది ఓ భారీ పామును ఒక మహిళ ఎంతో ధైర్యంగా, ప్రశాంతంగా రక్షించిన వీడియో ఒకటి ప్రస్తుతం సోషల్ మీడియాలో విపరీతంగా వైరల్‌గా మారింది. ఆమె చూపిన అసాధారణ సాహసం, సమయస్ఫూర్తి చూసి నెటిజన్లు ముక్కున వేలేసుకుంటున్నారు.

వైరల్ అవుతున్న వీడియో ప్రకారం.. ఒక నివాస ప్రాంతంలోకి ఊహించని విధంగా ఒక పొడవాటి భారీ పాము వచ్చింది. దాని పరిమాణం, పొడవు చూసి స్థానికులు ఒక్కసారిగా భయాందోళనకు గురయ్యారు. చాలామంది అది ప్రమాదకరమైన నాగుపాము అని భావించి, భయంతో దూరంగా నిలబడి చూస్తున్నారు తప్ప, ఎవరూ దాని దరిదాపుల్లోకి వెళ్లేందుకు కూడా సాహసం చేయలేదు. సరిగ్గా అదే సమయంలో ఓ మహిళ అక్కడకు చేరుకుని పరిస్థితిని తన చేతుల్లోకి తీసుకుంది. చుట్టూ ఉన్నవాళ్లు భయపడుతున్నా.. ఆమె మాత్రం ఎలాంటి బెరుకు లేకుండా నేరుగా పాము వద్దకు వెళ్ళింది.

ఎంతో అనుభవజ్ఞురాలైన స్నేక్ క్యాచర్‌లా ఆమె ఆ భారీ పామును అదుపులోకి తీసుకునే ప్రయత్నం చేసింది. ఈ క్రమంలో ఆ పాము చాలా చురుకుగా కదులుతూ, రక్షణ కోసం ఆమె శరీరం చుట్టూ చుట్టుకునే ప్రయత్నం చేసింది. సాధారణంగా ఎవరికైనా ఇలా జరిగితే గుండె ఆగినంత పనవుతుంది. కానీ ఆ మహిళ ఏమాత్రం ఆందోళన చెందలేదు. ఎంతో అప్రమత్తంగా, ప్రశాంతంగా వ్యవహరిస్తూ ఆ పామును హ్యాండిల్ చేసింది. ఆమె ముఖంలో కనిపించిన ఆత్మవిశ్వాసం, చాకచక్యం చూస్తే ఎవరైనా సరే ఫిదా అవ్వాల్సిందే.

చుట్టుపక్కల ఉన్నవారు దూరం నుంచే ఊపిరి బిగబట్టి ఈ ఉత్కంఠభరిత దృశ్యాన్ని చూస్తూ, కొందరు తమ మొబైల్ ఫోన్లలో రికార్డ్ చేశారు. కొన్ని నిమిషాల పాటు సాగిన ఈ హై-డ్రామా రెస్క్యూ ఆపరేషన్ తర్వాత, ఆ మహిళ పామును విజయవంతంగా అదుపులోకి తెచ్చింది. ఆపై దానికి ఎలాంటి గాయం కాకుండా ఒక ప్రత్యేక కంటైనర్‌లో భద్రపరిచి, అడవిలో విడిచిపెట్టేందుకు సురక్షిత ప్రదేశానికి తరలించింది.

ఈ వీడియో నెట్టింట ప్రత్యక్షమవ్వడమే ఆలస్యం.. లక్షలాది వ్యూస్‌తో దూసుకుపోతోంది. ఈ వీడియో చూసిన నెటిజన్లు ఆమె ధైర్యసాహసాలపై ప్రశంసల వర్షం కురిపిస్తున్నారు. ఇది నిజమైన మహిళా శక్తి, ఆమె ధైర్యానికి సెల్యూట్, పామును చంపకుండా ప్రాణాలతో కాపాడడం గొప్ప విషయం అంటూ కామెంట్లు పెడుతున్నారు. ప్రమాదకర పరిస్థితుల్లో కూడా పానిక్ అవ్వకుండా ధైర్యం, అనుభవం ఉంటే ఎంతటి సవాలునైనా ఎదుర్కోవచ్చని ఈ మహిళ నిరూపించింది.