Viral Video: ఆఫీస్ పార్టీలో ఒక్క డ్యాన్స్‌తో ఓవర్‌నైట్ స్టార్.. 2 కోట్ల వ్యూస్‌తో సోషల్ మీడియాను ఊపేస్తున్న..

Viral Video: వేడుకలు, పండుగల సమయాల్లో సరదాగా చేసే కొన్ని పనులు ఒక్కోసారి ఊహించని రేంజ్‌లో గుర్తింపు తెచ్చిపెడుతుంటాయి. చండీగఢ్‌కు చెందిన ఓషీన్ పాండ్యా అనే యువతి విషయంలో సరిగ్గా ఇదే జరిగింది. తన ఆఫీసులో జరిగిన దీపావళి వేడుకల్లో భాగంగా ఆమె వేసిన ఉత్సాహభరితమైన డ్యాన్స్ ఇప్పుడు ఇంటర్నెట్‌ను షేక్ చేస్తోంది. ఇన్స్టాగ్రామ్‌లో పోస్ట్ చేసిన కొద్ది రోజుల్లోనే ఈ వైరల్ వీడియోకు ఏకంగా 2 కోట్లకు (20 మిలియన్లు) పైగా వ్యూస్ రావడం విశేషం.

వివరాల్లోకి వెళ్తే.. ఓషీన్ పాండ్యా తన ఆఫీసు దీపావళి ఈవెంట్‌లో భాగంగా 2012 నాటి సూపర్‌హిట్ ‘ఇషక్‌జాదే’ సినిమాలోని ప్రసిద్ధ ‘ఝల్లా వల్లా’ పాటకు ఎంతో ఎనర్జిటిక్‌గా డ్యాన్స్ చేసింది. నీలం, ఆకుపచ్చ రంగుల సంప్రదాయ దుస్తులు ధరించి ఆమె చురుగ్గా వేసిన స్టెప్పులకు తోటి సహోద్యోగులు కేరింతలు కొడుతూ, చప్పట్లతో ప్రోత్సహించారు. ఈ ఆనంద క్షణాలకు సంబంధించిన వీడియోను ఓషీన్ “ఆఫీస్ దీపావళి పార్టీలో ఒక డ్యాన్స్ అయితే ఉండాల్సిందే కదా” అనే క్యాప్షన్‌తో తన ఇన్స్టాగ్రామ్ ఖాతాలో షేర్ చేసుకుంది.

పోస్ట్ చేసిన అతి తక్కువ సమయంలోనే ఈ వీడియో నెట్టింట విపరీతంగా వైరల్ అయింది. ఓషీన్ డ్యాన్స్‌లోని ఎక్స్‌ప్రెషన్స్, ముఖంలో చిరునవ్వు, పండుగ ఉత్సాహం నెటిజన్లను కట్టిపడేసాయి. వేలాది మంది నెటిజన్లు ఆమెను పొగుడుతూ కామెంట్లు చేయగా, కొందరైతే ఏకంగా ‘ఆమె నేషనల్ ఆఫీస్ క్రష్‌గా మారిపోయింది’ అంటూ కామెంట్ బాక్స్‌ను హోరెత్తించారు. లక్షలాది లైకులు, కొనియాడే ప్రశంసలతో ఈ వీడియో ఆఫీసుల్లో జరుపుకునే చిన్నచిన్న సంతోషాలకు, వేడుకలకు ఒక సరికొత్త ప్రతీకగా నిలిచింది.