చాట్‌జీపీటీ వల్లే నా కొడుకు చనిపోయాడు.. కోర్టును ఆశ్రయించిన తల్లి.. ఆ తర్వాత!

Excerpt: కృత్రిమ మేధస్సు (ఆర్టిఫిషియల్ ఇంటెలిజెన్స్) చాట్‌బాట్ ఇచ్చిన తప్పుడు సూచనల వలనే తన కొడుకు ప్రాణాలు కోల్పోయాడని ఒక తల్లి ఆరోపిస్తూ న్యాయస్థానాన్ని ఆశ్రయించింది. ఈ దిగ్భ్రాంతికరమైన ఘటనకు సంబంధించిన పూర్తి వివరాలు ఇక్కడ తెలుసుకోండి.

సాంకేతికత ఎంత వేగంగా అభివృద్ధి చెందుతుందో, దానివల్ల కొన్నిసార్లు ఊహించని ప్రమాగాలు కూడా ముంచుకొస్తున్నాయి. సరిగ్గా అలాంటి కోవకే చెందిన ఒక విషాదకరమైన ఉదంతంలో కృత్రిమ మేధస్సు (ఆర్టిఫిషియల్ ఇంటెలిజెన్స్) సాంకేతికతపై తీవ్రమైన విమర్శలు వ్యక్తమవుతున్నాయి. ప్రపంచవ్యాప్తంగా విపరీతమైన ఆదరణ పొందిన 'చాట్‌జీపీటీ' అనే ఏఐ చాట్‌బాట్ ఇచ్చిన తప్పుడు, ప్రమాదకరమైన సూచనల వల్ల తన కుమారుడు మరణించాడని ఆరోపిస్తూ ఒక తల్లి ఓపెన్ ఏఐ సంస్థపై న్యాయస్థానంలో దావా వేసింది.

బాధిత తల్లి లీలా టర్నర్ అందించిన వివరాల ప్రకారం, ఆమె 19 ఏళ్ల కుమారుడు సామ్ నెల్సన్ గతంలో వివిధ విషయాల కోసం చాట్‌బాట్‌ను తరచూ ఉపయోగించేవాడు. అయితే కొంతకాలం తర్వాత అతడు కొన్ని రకాల మందుల వాడకం గురించి చాట్‌బాట్‌ను సంప్రదించడం మొదలుపెట్టాడు. 'క్రాటమ్' అలాగే 'జనాక్స్' అనే రెండు వేర్వేరు మందులను కలిపి వాడొచ్చా అని సామ్ ప్రశ్నించగా, ఆ రెండింటిని కలిపి తీసుకోవడం వల్ల ఎలాంటి ప్రమాదం ఉండదని చాట్‌జీపీటీ తప్పుడు సమాచారం ఇచ్చింది. అసలు ఈ మందుల కలయిక మానవ శరీరానికి అత్యంత ప్రమాదకరమని వైద్య నిపుణులు హెచ్చరిస్తున్నారు. నొప్పుల నివారణకు వాడే క్రాటమ్ అలాగే ఆందోళనను తగ్గించే జనాక్స్ మందులను ఒకేసారి తీసుకోవడం వల్ల శ్వాసకోశ వ్యవస్థపై తీవ్రమైన దుష్ప్రభావం పడుతుంది. చాట్‌బాట్ మాటలను గుడ్డిగా నమ్మిన ఆ యువకుడు ఆ మందులను సేవించడంతో తీవ్ర అస్వస్థతకు గురై ప్రాణాలు కోల్పోయాడు. చాట్‌బాట్ డెవలపర్లు దానిని మరింత ఆకర్షణీయంగా మార్చడం వల్ల, వినియోగదారుడి ప్రశ్నలకు సరైన నిపుణుల సలహాలు ఇవ్వకుండా కేవలం సంభాషణను పొడిగించేలా ప్రవర్తించిందని తల్లి ఆవేదన వ్యక్తం చేసింది.

ఈ సాంకేతికత వినియోగదారుల భద్రతను విస్మరించి వ్యాపార ప్రయోజనాలకే పెద్దపీట వేస్తోందని బాధితురాలి తరఫు న్యాయవాదులు వాదిస్తున్నారు. మరోవైపు ఈ ఘటనపై స్పందించిన ఓపెన్ ఏఐ సంస్థ ఇది అత్యంత బాధకరమైన పరిస్థితి అని పేర్కొంటూ, ఆ ఘటనకు కారణమైన పాత వెర్షన్‌ను ఇప్పటికే నిలిపివేశామని వెల్లడించింది. వైద్య లేదా మానసిక ఆరోగ్య సమస్యలకు ఏఐ చాట్‌బాట్‌లు ఎప్పుడూ ప్రత్యామ్నాయం కాదని, ఇలాంటి సున్నితమైన విషయాలపై చాట్‌బాట్ స్పందించే విధానాన్ని మరింత మెరుగుపరచడానికి తగిన చర్యలు తీసుకుంటున్నట్లు కంపెనీ తెలిపింది. ఏదేమైనప్పటికీ, కృత్రిమ మేధస్సును గుడ్డిగా నమ్మడం ఎంతటి ప్రాణాంతక ముప్పునకు దారితీస్తుందో ఈ ఘటన మరోసారి ప్రపంచానికి హెచ్చరికగా నిలిచింది.