ప్రియుడి కోసం ప్రియురాలు దొంగతనం.. ఎవరి ఇంట్లో చోరీ చేసిందో తెలుసా..?

College Student: ప్రియుడిపై ఉన్న అమితమైన వ్యామోహం ఓ కళాశాల విద్యార్థినిని నేరస్థురాలిగా మార్చింది. అతనికి ఖరీదైన ద్విచక్ర వాహనం బహుమతిగా ఇవ్వాలనే ఉద్దేశంతో ఏకంగా తండ్రి స్నేహితుడి ఇంట్లోనే 72 గ్రాముల బంగారు ఆభరణాలను చోరీ చేసింది. ఈ విచిత్ర ఘటన తమిళనాడులోని పొల్లాచ్చి సమీపంలో వెలుగుచూసింది.

పొల్లాచ్చిలోని ప్రభుత్వ ఆర్ట్స్ కళాశాలలో డిగ్రీ ద్వితీయ సంవత్సరం చదువుతున్న ఆర్. జాయ్‌ ప్రిన్సీ (19) అనే విద్యార్థిని, తన తండ్రి రాజేష్‌ స్నేహితుడైన హెచ్. తమిళ్‌సెల్వన్‌ (59) ఇంటికి తరచూ వెళ్లేది. కుటుంబాల మధ్య ఉన్న సాన్నిహిత్యాన్ని ఆసరాగా చేసుకుని, ఆగస్టు 16న వారి ఇంటికి వెళ్లిన జాయ్ ప్రిన్సీ, ఎవరికీ అనుమానం రాకుండా అల్మారాలోని 9 సవరన్ల (సుమారు 72 గ్రాములు) బంగారు ఆభరణాలను దొంగిలించింది.

ఆమె వెళ్లిన తర్వాత అల్మారాను పరిశీలించిన తమిళ్‌సెల్వన్‌కు బంగారం మాయమైనట్లు తెలిసింది. దీంతో ఆయన పొల్లాచ్చి ఈస్ట్ పోలీసులకు ఫిర్యాదు చేస్తూ జాయ్ ప్రిన్సీపై అనుమానం వ్యక్తం చేశారు.

కేసు నమోదు చేసిన పోలీసులు జాయ్ ప్రిన్సీని అదుపులోకి తీసుకుని విచారించగా అసలు నిజం బయటపడింది. తాను దొంగిలించిన ఆభరణాలను విక్రయించి, ఆ వచ్చిన డబ్బుతో తన ప్రియుడు జనగన్ శివ కోసం కొత్త బైక్ కొనుగోలు చేసినట్లు ఆమె విచారణలో అంగీకరించింది.

నేరాన్ని అంగీకరించడంతో పోలీసులు జాయ్‌ ప్రిన్సీని అరెస్టు చేసి కోర్టులో హాజరుపరిచారు. న్యాయస్థానం ఆదేశాల మేరకు ఆమెను కోయంబత్తూరు సెంట్రల్ జైలుకు తరలించారు. కాగా, ఈ కేసులో జాయ్ ప్రిన్సీ ప్రియుడు జనగన్ శివ ప్రస్తుతం పరారీలో ఉన్నాడని, అతని కోసం గాలింపు చర్యలు ముమ్మరం చేశామని పోలీసులు వెల్లడించారు. తండ్రి స్నేహితుడి ఇంట్లోనే దొంగతనానికి పాల్పడి ప్రియుడికి బైక్ కొనిచ్చిన ఈ ఘటన స్థానికంగా తీవ్ర చర్చనీయాంశమైంది.