Viral: హెల్మెట్ పెట్టుకొని కారు నడిపాడు.. కట్ చేస్తే.! పోలీసులకే పెద్ద షాక్ ఇచ్చాడు..

Viral: భారతదేశంలో ట్రాఫిక్ నిబంధనల అమలులో కొన్నిసార్లు సాంకేతిక లోపాలు విచిత్రమైన పరిస్థితులకు దారితీస్తుంటాయి. తాజాగా కర్ణాటకలోని అథనిలో ఓ వ్యక్తికి ఎదురైన అనుభవం నెట్టింట వైరల్ అవుతోంది. కారు నడుపుతున్న సమయంలో హెల్మెట్ పెట్టుకోలేదంటూ ఆ వ్యక్తి మొబైల్‌కు ట్రాఫిక్ పోలీసుల నుంచి మెసేజ్ వచ్చింది. కారు డ్రైవ్ చేస్తున్నప్పుడు సీట్ బెల్ట్ ధరించాలి తప్ప హెల్మెట్ అవసరం ఉండదు. కానీ ఏఐ కెమెరా లేదా ఆటోమేటిక్ సిస్టమ్ సాంకేతిక లోపం కారణంగా ద్విచక్ర వాహనదారుడికి వేయాల్సిన ఫైన్ కారు డ్రైవర్‌కు పడింది. ఈ విచిత్రమైన పరిస్థితిపై బాధితుడు తీవ్ర అసంతృప్తి వ్యక్తం చేశాడు.

వచ్చిన మెసేజ్‌తో ఆశ్చర్యపోయిన ఆ వ్యక్తి నిరసనగా తానే స్వయంగా హెల్మెట్ ధరించి కారు నడుపుకుంటూ నేరుగా స్థానిక ట్రాఫిక్ పోలీస్ స్టేషన్‌కు వెళ్లాడు. కారు నడిపినా హెల్మెట్ పెట్టుకోవాలా అంటూ అక్కడి అధికారులను ప్రశ్నించాడు. బాధితుడు చేసిన వినూత్న నిరసన చూసి పోలీసులు సైతం అవాక్కయ్యారు. వెంటనే సాంకేతిక సిస్టమ్‌ను తనిఖీ చేసి తమ వైపు జరిగిన పొరపాటును గుర్తించారు. కారు డ్రైవింగ్ సమయంలో హెల్మెట్ నిబంధన వర్తించదని స్పష్టం చేశారు. వెంటనే ఆ రూ. 5 వందల ఫైన్‌ను క్యాన్సిల్ చేసి బాధితుడికి ఉపశమనం కలిగించారు.

ఏఐ కెమెరాలు, ఆటోమేటిక్ ట్రాఫిక్ చలాన్ సిస్టమ్‌లలో తప్పుగా రికార్డ్ కావడం వల్ల ఇలాంటి ఘటనలు జరుగుతున్నాయని పోలీసులు వివరించారు. భవిష్యత్తులో ఇలాంటి పొరపాట్లు పునరావృతం కాకుండా టెక్నికల్ టీమ్‌కు సూచిస్తామని తెలిపారు. సామాన్య ప్రజలు ఇలాంటి ట్రాఫిక్ చలానా సమస్యలు ఎదురైనప్పుడు చట్టపరంగా లేదా నేరుగా స్టేషన్‌లో సంప్రదించి పరిష్కరించుకోవచ్చు. సాంకేతిక పరిజ్ఞానం పెరుగుతున్న తరుణంలో మానవ ప్రమేయం లేకుండా వస్తున్న ఆటోమేటిక్ ఫైన్ల విషయంలో సరైన అవగాహన ఉండాలి. ఈ ఉదంతం సోషల్ మీడియాలో చక్కర్లు కొడుతుండగా నెటిజన్లు ఆ వ్యక్తి ప్రదర్శించిన ధైర్యాన్ని, వినూత్న నిరసనను ప్రశంసిస్తున్నారు.

ట్రాఫిక్ నిబంధనలు రోడ్డు భద్రత కోసం ఏర్పాటు చేసినప్పటికీ, ఇలాంటి సాంకేతిక లోపాలు వాహనదారులను మానసిక ఆందోళనకు గురిచేస్తున్నాయి. యంత్రాంగం మరింత అప్రమత్తంగా ఉండి కెమెరా రీడింగ్స్ సరిచూసుకోవాలి. లేదంటే నిరసనలు వెల్లువెత్తే అవకాశం ఉంది. ఈ ఘటనతో అథని ట్రాఫిక్ పోలీసులు అప్రమత్తమై ఇలాంటి లోపాలను సరిదిద్దే పనిలో పడ్డారు. వాహనదారులు కూడా నిబంధనలు పాటిస్తూనే అన్యాయం జరిగితే ప్రశ్నించే ధైర్యం కలిగి ఉండాలని ఈ సంఘటన చాటిచెప్పింది. బాధితుడికి న్యాయం జరగడంతో ఈ వివాదం సద్దుమణిగింది.