Viral: డ్రైవర్ సర్జరీ కోసం రూ. 4.25 లక్షలు ఖర్చు చేసిన బాస్.. డాక్టర్‌నే ఆశ్చర్యపరిచిన ఆ ఒక్క మాట.!

Viral: సమాజంలో కొన్నిసార్లు మానవత్వాన్ని చాటే అరుదైన సంఘటనలు ఎంతో మంది హృదయాలను హత్తుకుంటాయి. కార్డియాక్ సర్జన్ డాక్టర్ ప్రశాంత్ మిశ్రా తన అనుభవానికి సంబంధించిన ఒక అద్భుతమైన సంఘటనను సోషల్ మీడియాలో పంచుకోగా అది కాస్తా వైరల్ అయింది. ఆయన వద్దకు బైపాస్ సర్జరీ కోసం ఒక డ్రైవర్ కుటుంబం వచ్చింది. అయితే ప్రైవేట్ ఆసుపత్రిలో ఆ ఆపరేషన్‌కు దాదాపు రూ. 4.25 లక్షల వరకు ఖర్చవుతుందని తెలియడంతో, ఆర్థిక పరిస్థితి దృష్ట్యా ప్రభుత్వ ఆసుపత్రిని ఆశ్రయించాలని డాక్టర్ వారికి సలహా ఇచ్చారు.

కానీ మరుసటి రోజు ఆ రోగి కుమారుడు డాక్టర్‌కు ఫోన్ చేసి, ముంబైలోని ఒక ప్రైవేట్ వైద్య సౌకర్యంలోనే ఆపరేషన్ చేయించుకుంటామని తెలిపారు. ఆశ్చర్యకరంగా రోగి యజమానే స్వయంగా జోక్యం చేసుకుని ఆర్టీజీఎస్ ద్వారా అవసరమైన మొత్తాన్ని నేరుగా బదిలీ చేసి ఆపరేషన్‌కు పూర్తి ఆర్థిక సాయం అందించారు. విజయవంతంగా సర్జరీ పూర్తయిన తర్వాత డాక్టర్ ప్రశాంత్ మిశ్రా ఆ యజమానికి ఫోన్ చేసి కృతజ్ఞతలు తెలిపారు. "మీ సహకారానికి ధన్యవాదాలు, మిస్టర్ శుక్లా సర్జరీ విజయవంతమైంది" అని డాక్టర్ చెప్పారు.

కాగా, ఆ బాస్ ఇచ్చిన సమాధానం డాక్టర్‌ను తీవ్ర ఆశ్చర్యానికి గురిచేసింది. "నా సహచరుడికి అంత మంచి వైద్యం అందించినందుకు మీకు ధన్యవాదాలు డాక్టర్" అని ఆయన బదులిచ్చారు. అయోమయానికి గురైన డాక్టర్.. "కొలీగ్ అంటారేంటి? ఆయన మీ వద్ద డ్రైవర్‌గా పనిచేస్తున్నారని చెప్పారు కదా" అని ప్రశ్నించారు. దానికి ఆ యజమాని స్పందిస్తూ.. "ఆయన గత 15 ఏళ్లుగా నాతో ఉన్నారు, నేను ఆయనను కేవలం డ్రైవర్‌గా చూడను. మేము ఇద్దరం పనిచేస్తాం, కేవలం మా దైనందిన జీవితంలో పాత్రలు వేరు అంతే. ఆయన ఉద్యోగం వేరు కావచ్చు, కానీ మేమిద్దరం సహచరులమే" అని పేర్కొన్నారు. ఈ సమాధానం తనను నిశ్చేషుడిని చేసిందని డాక్టర్ తెలిపారు. శ్రమను గౌరవించడం, ప్రతి ఒక్కరికీ సమానమైన గౌరవం ఇవ్వడం ఎంత ముఖ్యమో ఈ సంఘటన చాటి చెప్పడంతో నెటిజన్లు ఆ యజమానిపై ప్రశంసల జల్లు కురిపిస్తున్నారు.