Viral Video: కదిలించే దృశ్యం: తోటివారు ఆడుతుంటే చూసి మురిసిన దివ్యాంగ చిన్నారి.. నెటిజన్లు ఎమోషనల్!

Viral Video: సాధారణంగా ఆడుకునే వయసులో పిల్లలు తోటివారితో కలిసి పరిగెత్తాలని, కేరింతలు కొట్టాలని ఆరాటపడతారు. కానీ, ఓ దివ్యాంగ చిన్నారి మాత్రం తన శారీరక స్థితి వల్ల వారితో కలిసి పరిగెత్తలేకపోయినా, వారి ఆనందంలో భాగస్వామి కావచ్చని నిరూపించి అందరినీ భావోద్వేగానికి గురిచేసింది.

వీడియోలో ఏముంది?

ఇన్‌స్టాగ్రామ్‌లో వైరల్ అవుతున్న ఈ చిన్న వీడియోలో.. మెట్ల వద్ద కూర్చున్న ఒక చిన్నారి, తన పక్కనే ఇద్దరు అబ్బాయిలు ఒకరినొకరు తరుముకుంటూ, కుస్తీ పడుతూ ఆడుకోవడం గమనిస్తోంది. వారు అటు ఇటు పరిగెడుతూ నవ్వుతుంటే, ఈ చిన్నారి కూడా వారితో పాటు కేరింతలు కొడుతూ, చప్పట్లు కొడుతూ ఆ క్షణాలను ఆస్వాదించింది. మనం స్వయంగా ఆటలో పాల్గొనకపోయినా, ఇతరుల సంతోషాన్ని చూసి కూడా ఆనందాన్ని పొందవచ్చని ఆ చిన్నారి ముఖంలోని చిరునవ్వు చాటిచెప్పింది.

ఈ వీడియో చూసిన నెటిజన్లు ఎమోషనల్ అవుతున్నారు. "ఈ చిరునవ్వు వెలకట్టలేనిది", "చాలా ధైర్యవంతురాలైన అమ్మాయి.. దేవుడు నిన్ను చల్లగా చూడాలి" అంటూ వేల సంఖ్యలో కామెంట్లు పెడుతున్నారు. శారీరక లోపాలను మర్చిపోయి ఆమె పంచుతున్న ఆ ఆనందం ప్రతి ఒక్కరి కళ్లు చెమర్చేలా చేస్తోంది.