Heat: మహిళలకు వేడిని తట్టుకునే శక్తి ఎక్కువగా ఉంటుందా? నిపుణులు ఏం చెప్తున్నారంటే?

Heat: అధిక ఉష్ణోగ్రతలు, వడగాలులు ప్రజల ఆరోగ్యంపై ప్రభావం చూపుతున్నాయి. అయితే పురుషులు, మహిళలు ఇద్దరూ వేడిని ఒకే విధంగా అనుభవించరని శాస్త్రవేత్తలు చెబుతున్నారు. శరీర నిర్మాణం, చెమట పట్టే విధానం, జీవక్రియ (మెటాబాలిజం), హార్మోన్ల మార్పులు వంటి అంశాలు వేడిని తట్టుకునే సామర్థ్యాన్ని ప్రభావితం చేస్తాయి.

పురుషులకు త్వరగా చెమట ఎందుకు పడుతుంది.?

శరీరాన్ని చల్లబరచడంలో చెమట ప్రధాన పాత్ర పోషిస్తుంది. అధిక ఉష్ణోగ్రతలకు గురైనప్పుడు పురుషులకు సాధారణంగా త్వరగా, ఎక్కువ మొత్తంలో చెమట పడుతుంది. ఈ చెమట ఆవిరైపోవడం ద్వారా శరీర ఉష్ణోగ్రత తగ్గుతుంది. ప్రత్యేకించి పొడి వాతావరణంలో చెమట త్వరగా ఆవిరైపోతుంది కాబట్టి పురుషుల శరీరం వేడిని త్వరగా బయటకు పంపగలదు. అందువల్ల తీవ్రమైన వేడి లేదా శారీరక శ్రమ సమయంలో శరీర ఉష్ణోగ్రతను నియంత్రించడంలో వారికి కొంత ప్రయోజనం ఉంటుంది.

తేమ ఎక్కువగా ఉన్న వాతావరణంలో మహిళలకు ప్రయోజనం:

మహిళలకు పురుషులతో పోలిస్తే చెమట తక్కువగా పడుతుంది. అయినప్పటికీ కొన్ని అధ్యయనాలు తేమ ఎక్కువగా ఉన్న వేడి వాతావరణంలో మహిళల శరీరం ఉష్ణ సమతుల్యతను మెరుగ్గా కాపాడగలదని సూచిస్తున్నాయి. తక్కువ చెమట వచ్చినప్పటికీ అది సమర్థవంతంగా ఆవిరైపోవడం వల్ల శరీరంలోని నీటి నిల్వలు ఎక్కువగా నిల్వ ఉంటాయి. దీని వల్ల ఎక్కువసేపు వేడి వాతావరణంలో ఉన్నప్పుడు కూడా మహిళలు శరీర ద్రవాలను మెరుగ్గా సంరక్షించగలరని పరిశోధకులు భావిస్తున్నారు.

కండరాల పరిమాణం వేడిపై ఎలా ప్రభావం చూపుతుంది?

శరీరంలోని కండరాలు సహజంగానే వేడిని ఉత్పత్తి చేస్తాయి. పురుషుల్లో సాధారణంగా కండరాల ద్రవ్యరాశి ఎక్కువగా ఉంటుంది. శరీరం విశ్రాంతిలో ఉన్నప్పటికీ కండరాలు కొంతమేర వేడిని ఉత్పత్తి చేస్తూనే ఉంటాయి.

శాస్త్రవేత్తల అంచనా ప్రకారం శరీరంలో ఉత్పత్తి అయ్యే మొత్తం వేడిలో దాదాపు 25 శాతం వరకు కండరాల పాత్ర ఉంటుంది. అందువల్ల పురుషులకు వేడి త్వరగా అనిపించవచ్చు. మరోవైపు మహిళల్లో కండరాల పరిమాణం తక్కువగా ఉండటం వల్ల అంతర్గతంగా ఉత్పత్తి అయ్యే వేడి కూడా తక్కువగా ఉంటుంది.

మహిళల మెటాబాలిజం కూడా కీలకం:

మహిళల్లో సాధారణంగా విశ్రాంతి సమయంలో జరిగే జీవక్రియ రేటు (Resting Metabolic Rate) పురుషులతో పోలిస్తే తక్కువగా ఉంటుంది. దీనివల్ల శరీరం ఉత్పత్తి చేసే అంతర్గత వేడి కూడా తగ్గుతుంది.

అందుకే కొన్నిసార్లు మహిళలు అధిక ఉష్ణోగ్రతలను పురుషుల కంటే కొంత భిన్నంగా అనుభవిస్తారు. అయితే ఇది ప్రతి వ్యక్తికి ఒకేలా ఉండదు. వయస్సు, ఆరోగ్య పరిస్థితి, శారీరక దృఢత్వం వంటి అంశాలు కూడా ప్రభావం చూపుతాయి.

హార్మోన్ల మార్పులు మహిళలపై ప్రభావం చూపుతాయి

మహిళల్లో ఈస్ట్రోజెన్, ప్రొజెస్టెరోన్ వంటి హార్మోన్ల మార్పులు శరీర ఉష్ణోగ్రత నియంత్రణను ప్రభావితం చేస్తాయి. ముఖ్యంగా నెలసరి చక్రం, గర్భధారణ, మెనోపాజ్ సమయంలో ఈ ప్రభావం ఎక్కువగా ఉంటుంది.

ఉదాహరణకు అండోత్సర్గం (Ovulation) తర్వాత మహిళల శరీర ప్రాథమిక ఉష్ణోగ్రత కొద్దిగా పెరుగుతుంది. ఈ సమయంలో చాలా మందికి సాధారణం కంటే ఎక్కువ వేడి అనిపించడం, అలసట లేదా అసౌకర్యం కలుగుతుంది. మెనోపాజ్ సమయంలో వచ్చే "హాట్ ఫ్లాషెస్" కూడా హార్మోన్ల మార్పుల ఫలితమే.