Viral Video: హైదరాబాద్‌లో చెట్లపై విచిత్ర పొగ.. తీరా దగ్గరికి వెళ్లి చూస్తే.!

Viral Video: హైదరాబాద్ నగరంలో ఇటీవల జరిగిన ఒక వింత సంఘటన నెటిజన్లను ఆశ్చర్యానికి గురిచేసింది. నగరంలోని ఒక ప్రాంతంలో చెట్ల పైన పెద్ద ఎత్తున నల్లటి పొగలాంటి ఆకారం కనిపించడంతో స్థానికులు ఒక్కసారిగా భయాందోళనకు గురయ్యారు. మౌనికా జుయాల్ అనే మహిళ ఈ వింత దృశ్యాన్ని తన ఇన్‌స్టాగ్రామ్ ఖాతాలో పంచుకోవడంతో ఈ వీడియో ఇప్పుడు ఇంటర్నెట్‌లో విపరీతంగా వైరల్ అవుతోంది. ప్రకృతి విపత్తులు వస్తున్నాయా అన్న అనుమానాలు సైతం ఈ వీడియో చూసిన కొందరికి కలుగుతున్నాయి.

మౌనికా జుయాల్ తన ఇంటి సమీపంలో ఉన్న పచ్చటి చెట్ల పైన గాలిలో తేలుతున్నట్లు ఉన్న భారీ నల్లటి ఆకారాన్ని గమనించింది. మొదట అది ఎక్కడో భారీ అగ్నిప్రమాదం జరిగి అక్కడి నుంచి వస్తున్న దట్టమైన పొగ అని ఆమె భావించింది. ఆ దృశ్యాన్ని తన ఫోన్‌లో రికార్డ్ చేస్తూ, అక్కడ చూస్తే చెట్ల వెనుక ఏదో పెద్ద మంటలు చెలరేగాయని గట్టిగా అనుకున్నాను అని ఆమె వీడియోలో వివరించింది. కానీ కొద్ది నిమిషాల పాటు ఆ ఆకారాన్ని నిశితంగా గమనించిన తర్వాత ఆమెకు ఒక భయంకరమైన నిజం తెలిసింది. ఆ పొగలాంటి ఆకారం మంటల నుంచి వస్తున్నది కాదని, అది అక్షరాలా లక్షలాది దోమలు ఒకేచోట గుమిగూడి అలా గాలిలో ఎగురుతున్నాయని ఆమె స్పష్టం చేసింది. దోమలు అంత పెద్ద గుంపుగా ఏర్పడి ఆకాశంలో ఒక మేఘంలా కదలడం చూసి నెటిజన్లు సైతం తీవ్ర విస్మయానికి గురవుతున్నారు. ఈ భయానక దృశ్యం నగరవాసులకు కంటిమీద కునుకు లేకుండా చేస్తోంది.

ఈ వీడియో సోషల్ మీడియాలో పోస్ట్ చేసిన కొద్దిసేపటికే లక్షలాది వ్యూస్, వేలాది కామెంట్స్ సొంతం చేసుకుంది. 'హైదరాబాద్‌లో దోమల దాడి' అనే క్యాప్షన్‌తో ఆమె పెట్టిన ఈ పోస్ట్ కింద నెటిజన్లు తమదైన శైలిలో రకరకాల కామెంట్స్ చేస్తున్నారు. పర్యావరణ సమతుల్యత దెబ్బతినడం వల్లే ఇలా జరుగుతోందని పర్యావరణవేత్తలు భావిస్తున్నారు. దోమలను సహజంగా తినే తూనీగలు నగరాల్లో దాదాపుగా అంతరించిపోవడం వల్లే ఇలా దోమల సంఖ్య విపరీతంగా పెరిగిపోయిందని కొందరు నెటిజన్లు ఆందోళన వ్యక్తం చేశారు. ఆడ దోమలను ఆకర్షించడానికి మగ దోమలు ఇలా పెద్ద గుంపులుగా ఏర్పడతాయని మరికొందరు సైంటిఫిక్ కారణాలు వివరించారు. ఇంకొందరైతే ఇది హైదరాబాద్ నగరానికి సరికొత్త పర్యాటక ఆకర్షణ అంటూ నైట్ లైఫ్ మీద సెటైరికల్‌గా ఫన్నీ కామెంట్స్ చేస్తున్నారు.

నగరంలో పారిశుద్ధ్య లోపం, మురుగు నీరు ఎక్కడికక్కడ నిలిచిపోవడం కారణంగానే ఇలాంటి అనారోగ్యకరమైన పరిస్థితులు తలెత్తుతున్నాయని స్థానికులు అధికారుల మీద మండిపడుతున్నారు. ఈ దోమల బెడద వల్ల డెంగ్యూ, మలేరియా లాంటి ప్రాణాంతక వ్యాధులు ప్రబలే అవకాశం ఉందని వైద్యులు హెచ్చరిస్తున్నారు. నగర ప్రజలు దోమల నియంత్రణకు ఇళ్లలో తగిన జాగ్రత్తలు తీసుకోవాలని, పరిసరాలను పరిశుభ్రంగా ఉంచుకోవాలని ఆరోగ్య నిపుణులు గట్టిగా సూచిస్తున్నారు.