Viral Fashion Creator : ఫ్యాషన్ ప్రపంచాన్ని షేక్ చేస్తున్న 'కలు పుటిక్'.. ఆ వీడియోల్లో ఏముంది.?

Viral Fashion Creator : నేటి సోషల్ మీడియా యుగంలో ఎప్పుడు ఎవరు రాత్రికి రాత్రే స్టార్ అవుతారో ఊహించడం కష్టం. అయితే, స్వయంగా ఇన్‌స్టాగ్రామ్ సంస్థే ఒక క్రేజీ క్రియేటర్‌కు ఫ్యాన్ అయిపోయి, స్వయంగా ఆఫర్ ఇచ్చిందంటే ఆ వ్యక్తి ప్రతిభ ఎంతటిదో అర్థం చేసుకోవచ్చు. ప్రస్తుతం ఇంటర్నెట్ ప్రపంచంలో 'కలు పుటిక్' (Kalu Putik) అనే పేరు మారుమోగిపోతోంది. తూర్పు ఆఫ్రికాలోని ఇథియోపియా దేశానికి చెందిన ఈ 19 ఏళ్ల కుర్రాడు, తన వినూత్నమైన ఫ్యాషన్ సెన్స్‌తో ప్రపంచవ్యాప్త గుర్తింపు తెచ్చుకున్నాడు. ఇన్‌స్టాగ్రామ్‌లో కేవలం 19 పోస్ట్‌లతోనే సుమారు 1.8 మిలియన్ల ఫాలోవర్లను సంపాదించి అందరినీ ఆశ్చర్యపరుస్తున్నాడు.

కలు పుటిక్ ఉపయోగించే వనరులు..

కలు పుటిక్ విజయానికి ప్రధాన కారణం ఆయన ఉపయోగించే వనరులు. ఆయన పారిస్ లేదా మిలన్ వంటి నగరాల నుంచి వచ్చే ఖరీదైన దుస్తులను ధరించడు. తన ఇంటి చుట్టుపక్కల పడి ఉన్న చెత్త, ప్లాస్టిక్ సీసాలు, ధాన్యం సంచులు, చిరిగిన బూట్లు , ఇనుప తీగలను ఉపయోగించి అత్యద్భుతమైన అవుట్‌ఫిట్‌లను తయారు చేస్తాడు. సాధారణ వ్యర్థాలతో ఆయన రూపొందించే డిజైన్లు చూసి పెద్ద పెద్ద ఫ్యాషన్ డిజైనర్లు సైతం ముక్కున వేలేసుకుంటున్నారు. ఎటువంటి వనరులు లేకపోయినా, కేవలం సృజనాత్మకత ఉంటే ప్రపంచాన్ని జయించవచ్చని ఆయన నిరూపిస్తున్నారు.

ఒక ఇంటర్నేషనల్ మోడల్ తరహా

కలు పుటిక్ తన వీడియోల్లో ఒక ఇంటర్నేషనల్ మోడల్ తరహాలో క్యాట్‌వాక్ చేస్తూ కనిపిస్తారు. చెత్తతో చేసిన దుస్తుల్లో కూడా ఆయన చూపించే రాజసం , హావభావాలు నెటిజన్లను కట్టిపడేస్తున్నాయి. ఆయన అసలు పేరు కలీబ్ (Kalib) అని సమాచారం. ఒక సాధారణ పేదరికం నుంచి వచ్చి, వ్యర్థాలను కళాఖండాలుగా మార్చడంలో ఆయన చూపిస్తున్న నైపుణ్యం చూసి లక్షలాది మంది ఆయనకు మురిసిపోతున్నారు. అందుకే కలు పుటిక్ కంటెంట్ అంటే ఇప్పుడు గ్లోబల్ లెవల్‌లో విపరీతమైన క్రేజ్ ఏర్పడింది.

అద్భుతమైన క్రియేటివిటీ

ఈ అద్భుతమైన క్రియేటివిటీకి సాక్షాత్తూ ఇన్‌స్టాగ్రామ్ సంస్థే ఫిదా అయిపోయింది. ఇన్‌స్టాగ్రామ్ తన అధికారిక హ్యాండిల్ ద్వారా కలు పుటిక్ వీడియోలపై కామెంట్ చేస్తూ, ఆయన కంటెంట్‌ను తమ అఫీషియల్ ఛానల్‌లో ఫీచర్ చేయాలనుకుంటున్నట్లు ఆఫర్ ఇచ్చింది. అంతేకాకుండా 'క్రియేటర్ కొలాబరేషన్' లేదా ఏదైనా ప్రత్యేక ప్రాజెక్ట్ కోసం ఆయనతో జతకట్టాలని ఇన్‌స్టాగ్రామ్ భావిస్తోంది. ఇన్‌స్టాగ్రామ్ అంతటి సంస్థ స్వయంగా ఒక క్రియేటర్ వద్దకు వచ్చి ఆఫర్ ఇవ్వడం అనేది సోషల్ మీడియా చరిత్రలో అరుదైన విషయంగా చెప్పవచ్చు.

అయితే, ఇన్‌స్టాగ్రామ్ ఇచ్చిన ఈ భారీ ఆఫర్‌పై కలు పుటిక్ (kaluputics) ఇప్పటివరకు స్పందించలేదని సమాచారం. వైరల్ రిపోర్ట్స్ ప్రకారం, ఇన్‌స్టాగ్రామ్ తన ప్లాట్‌ఫామ్ ప్రమోషన్ కోసం ఆయన విలక్షణమైన శైలిని ఉపయోగించుకోవాలని గట్టిగా ప్రయత్నిస్తోంది. ప్రస్తుతం ఆయన వీడియోలు సోషల్ మీడియాను ఊపేస్తున్నాయి. ప్రపంచం నలుమూలల నుంచి వస్తున్న ప్రశంసలు, ఇన్‌స్టాగ్రామ్ ఆఫర్‌తో కలు పుటిక్ ప్రస్థానం కేవలం ఇథియోపియా వీధులకే పరిమితం కాకుండా, గ్లోబల్ ఫ్యాషన్ ఐకాన్‌గా మారే దిశగా సాగుతోంది.