Mother’s Day 2026: మ‌ద‌ర్స్ డే రోజు మీ అమ్మ‌కి ఇచ్చే బెస్ట్ ఫైనాన్షియ‌ల్ బ‌హుమ‌తులు ఇవే..

Mother’s Day 2026: ప్రతి సంవత్సరం మే రెండో ఆదివారం మదర్స్ డే జరుపుకుంటారు. 2026లో మదర్స్ డే మే 10న వ‌స్తోంది. సాధారణంగా ఈ రోజున అమ్మకు చీరలు, నగలు, గిఫ్ట్స్ ఇస్తుంటారు. కానీ ఈసారి కాస్త భిన్నంగా ఆలోచించి, ఆమె భవిష్యత్తుకు ఉపయోగపడే ఫైనాన్షియల్ గిఫ్ట్ ఇస్తే మరింత మంచిది. అలాంటి కొన్ని బెస్ట్ గిఫ్ట్స్ ఇవే..

ప్రస్తుతం ప్రపంచ పరిస్థితులు, పెరుగుతున్న ఖర్చులు, ఆరోగ్య సమస్యలు చూస్తే భావోద్వేగ బహుమతులతో పాటు ఆర్థిక భద్రత కూడా చాలా ముఖ్యం అయింది. అందుకే PPF, FD, SIP, హెల్త్ ఇన్సూరెన్స్ వంటి పెట్టుబడి మార్గాలు అమ్మకు మంచి భరోసా ఇవ్వగలవు.

PPF.. సురక్షిత పెట్టుబడికి మంచి ఎంపిక

పబ్లిక్ ప్రావిడెంట్ ఫండ్ (PPF) ప్రభుత్వ హామీతో నడిచే సురక్షిత పెట్టుబడి పథకం. దీంట్లో పెట్టిన డబ్బుపై మంచి వడ్డీ లభించడమే కాకుండా ట్యాక్స్ బెనిఫిట్స్ కూడా ఉంటాయి. మీ అమ్మ పేరుతో PPF అకౌంట్ ఓపెన్ చేసి ప్రారంభ పెట్టుబడి పెట్టవచ్చు. దీర్ఘకాలికంగా చూసుకుంటే ఇది మంచి సేవింగ్స్ ప్లాన్‌గా ఉపయోగపడుతుంది. రిస్క్ లేకుండా డబ్బు పెరగాలనుకునే వారికి ఇది సరైన ఎంపిక.

FD, SCSS.. రెగ్యులర్ ఆదాయం కోసం బెస్ట్

ఫిక్స్‌డ్ డిపాజిట్ (FD) ఇప్పటికీ చాలా మంది నమ్మే పెట్టుబడి మార్గం. ముఖ్యంగా సీనియర్ సిటిజన్లకు బ్యాంకులు సాధారణ కస్టమర్ల కంటే ఎక్కువ వడ్డీ ఇస్తున్నాయి. అమ్మ పేరుతో FD చేస్తే ప్రతి నెలా లేదా నిర్దిష్ట కాలానికి వడ్డీ రూపంలో ఆదాయం వస్తుంది. రిటైర్మెంట్ తర్వాత ఇది ఉపయోగపడుతుంది. అలాగే సీనియ‌ర్ సిటిజ‌న్ సేవింగ్స్ స్కీమ్ (SCSS) కూడా మంచి ఆప్షన్. ఇది ప్రభుత్వ పథకం కావడంతో పెట్టుబడి భద్రంగా ఉంటుంది. స్థిరమైన ఆదాయం కోరుకునే పెద్దవారికి ఇది మంచి మార్గంగా చెప్పొచ్చు.

SIP ద్వారా దీర్ఘకాలిక సంపద

మీ అమ్మ భవిష్యత్తులో మంచి రాబడులు పొందాలనుకుంటే SIP (Systematic Investment Plan) మంచి ఎంపిక అవుతుంది. మ్యూచువల్ ఫండ్స్‌లో ప్రతి నెలా చిన్న మొత్తంతో పెట్టుబడి ప్రారంభించవచ్చు. దీర్ఘకాలంలో SIP మంచి రిటర్న్స్ ఇచ్చే అవకాశం ఉంటుంది. మార్కెట్‌కు అనుసంధానంగా ఉండే పెట్టుబడి కావడంతో కొంత రిస్క్ ఉన్నా, ఎక్కువ కాలం కొనసాగిస్తే మంచి సంపద సృష్టించవచ్చు. పిల్లలు తమ అమ్మ కోసం SIP ప్రారంభిస్తే భవిష్యత్తులో పెద్ద ఆర్థిక భరోసాగా మారుతుంది.

హెల్త్ ఇన్సూరెన్స్.. అత్యంత అవసరమైన గిఫ్ట్

వయసు పెరిగే కొద్దీ ఆరోగ్య ఖర్చులు కూడా పెరుగుతాయి. ఒకసారి పెద్ద అనారోగ్యం వస్తే లక్షల్లో ఖర్చవుతుంది. అలాంటి సమయంలో మంచి హెల్త్ ఇన్సూరెన్స్ పాలసీ కుటుంబానికి పెద్ద ఆర్థిక రక్షణగా ఉంటుంది. అందుకే ఈ మదర్స్ డే సందర్భంగా అమ్మకు హెల్త్ ఇన్సూరెన్స్ తీసివ్వడం కూడా మంచి నిర్ణయం అవుతుంది. ఇది భవిష్యత్తులో వైద్య ఖర్చుల భారం తగ్గిస్తుంది.

ఈరోజుల్లో కేవలం భావోద్వేగ బహుమతులు మాత్రమే కాదు, ఆర్థిక భద్రత కూడా చాలా ముఖ్యం. ఇలాంటి ఫైనాన్షియల్ గిఫ్ట్స్ అమ్మను ఆర్థికంగా స్వయం సమృద్ధిగా మార్చడమే కాకుండా, భవిష్యత్తుపై ధైర్యాన్ని కూడా ఇస్తాయి.