Viral Video: భాషా సమస్యకు అద్భుతమైన ఐడియా.. ముంబై ఆటో డ్రైవర్ వినూత్న ప్రయత్నం వైరల్!

Viral Video: ప్రయాణికులతో మాట్లాడేందుకు భాష ఎప్పుడైనా అడ్డంకిగా మారితే ఏం చేయాలి? ఈ చిన్న సమస్యకు ముంబైకి చెందిన ఓ ఆటో డ్రైవర్ వెతికిన పరిష్కారం ఇప్పుడు సోషల్ మీడియాలో విపరీతంగా వైరల్ అవుతోంది. రోజూ ప్రయాణికులతో ఎదురయ్యే సాధారణ సంభాషణలను సులభతరం చేసుకునేందుకు ఆయన చేసిన వినూత్న ప్రయత్నం అందరినీ ఆకట్టుకుంటోంది.

"తన ఆటోలో హిందీ వాక్యాలకు ఎదురుగా మరాఠీ అనువాదాలను చేతిరాతతో రాసి ఉన్న ఓ షీట్‌ను అంటించి, ప్రయాణికులతో సులువుగా కమ్యూనికేట్ చేస్తున్నాడు." ముంబైలో ఆటోలో ప్రయాణిస్తున్న ఓ మహిళ దృష్టిని ఈ ప్రత్యేకమైన చేతిరాత షీట్ ఆకర్షించింది. వెంటనే దానిని వీడియో తీసి ఇన్‌స్టాగ్రామ్‌లో షేర్ చేయడంతో అది కాస్తా నెట్టింట వైరల్‌గా మారింది.

డ్రైవర్ స్వయంగా మరాఠీ నేర్చుకునే ప్రయత్నంలో భాగంగా, ప్రయాణికులతో తరచూ మాట్లాడేందుకు అవసరమయ్యే వాక్యాలను ఆ పేపర్‌పై రాసుకున్నాడు. అవసరమైనప్పుడు వాటిని చూసుకుంటూ మాట్లాడుతున్నాడు.

ఈ షీట్‌లో ‘చిల్లర లేదు’, ‘ఆటోను కాస్త ఆపండి’ వంటి సాధారణ రోజువారీ పదబంధాలు ఉన్నాయి. హిందీ రాని ప్రయాణికులు మరాఠీ వాక్యాలను చూసుకుని డ్రైవర్‌తో సులభంగా సంభాషిస్తున్నారు.

జీవనోపాధి కోసం కష్టపడుతూనే, ప్రయాణికులతో మెరుగ్గా మాట్లాడేందుకు, కొత్త భాషను నేర్చుకునేందుకు ఆటో డ్రైవర్ పడిన తపనను నెటిజన్లు తెగ అభినందిస్తున్నారు. ఆయన తయారు చేసుకున్న ఈ ‘చేతిరాత నోట్స్’ ప్రస్తుతం సోషల్ మీడియాలో అందరి మనసులను గెలుచుకుంటోంది.