Viral News : ఒక్క టీ బ్రేక్.. 5 ప్రాణాలు సేఫ్..

Viral News : కొన్నిసార్లు మనం తీసుకునే అత్యంత చిన్న నిర్ణయాలు జీవితాల రూపురేఖలనే మార్చేస్తాయి. సరిగ్గా అలాంటి అనుభవమే ఛత్తీస్‌గఢ్‌కు చెందిన ఐదుగురు మిత్రులకు ఎదురైంది. ఆగస్టు 26న నేపాల్‌లో వారు తాగిన ఒక చిన్న టీ బ్రేక్, భయానక జలప్రళయం , చావు మధ్య ఒక సన్నని గీతలా నిలిచింది. పది నిమిషాల వ్యవధిలో ముంచుకొచ్చిన ఆ ఉపద్రవం నుంచి వారు ప్రాణాలతో బయటపడటమే కాకుండా, రెండు రోజుల పాటు కార్లోనే నిద్రపోతూ భయం భయంగా గడిపి ఎట్టకేలకు స్వదేశానికి సురక్షితంగా చేరుకున్నారు.

నేపాల్ పర్యటనలో ఊహించని ప్రళయం

రాయ్‌పూర్‌లోని మానా క్యాంప్ ప్రాంతానికి చెందిన నారాయణ్ సేన్, దినేష్ ఓజా, ప్రేమ్ సింగ్ జగత్, యతేంద్ర ప్రకాష్ , దినేష్ సింగ్ ఠాకూర్ అనే 50 నుంచి 60 ఏళ్ల వయస్సు గల ఐదుగురు మిత్రులు ఆగస్టు 21న రాయ్‌పూర్ నుంచి నేపాల్ పర్యటనకు బయలుదేరారు. పశుపతినాథ్, మనోకామనా ఆలయాలతో పాటు పలు ప్రముఖ పర్యాటక ప్రాంతాలను సందర్శించేందుకు వారు కార్ వాడకానికి తీసుకున్నారు. అయితే ఆగస్టు 26 ఉదయం 10 గంటల సమయంలో ధాడింగ్ జిల్లాలోని ఒక హోటల్ వద్ద టీ తాగేందుకు ఆగారు.

ఒక్క టీ బ్రేక్ కాపాడిన ప్రాణాలు

"మేము టీ తాగడానికి ఆగడమే మేము చేసుకున్న అదృష్టం. మరో 10 నుంచి 15 నిమిషాల ముందే అక్కడి నుంచి బయలుదేరి ఉంటే, కచ్చితంగా ఆ ప్రళయంలో చిక్కుకుపోయేవాళ్లం" అని రాయ్‌పూర్‌లో సెలూన్ నడిపే 53 ఏళ్ల నారాయణ్ సేన్ తెలిపారు. టీ తాగుతున్న సమయంలో ముందరి బ్రిడ్జి కొట్టుకుపోయిందనే వార్త తెలిసింది. ఆ హోటల్ ఒక భారతీయుడికి చెందినది కావడంతో ఆయన వారికి ఎంతో సాయం చేసి ఆహారం అందించారు. అక్కడ నుంచి తప్పించుకుని మలేఖులోని ఎత్తైన ప్రాంతానికి చేరుకుని ఆ రాత్రి కార్లోనే గడిపారు.

కళ్లముందే భయానక దృశ్యాలు.. కదిలించిన రాఖీ వేడుక

పశుపతినాథ్ ఆలయానికి కేవలం 50 కిలోమీటర్ల దూరంలో ఉన్న సమయంలో ఈ విపత్తు సంభవించింది. "గ్రామాలు, భవనాలు, ఆఫీసులు, ప్రాజెక్టులు కొట్టుకుపోయాయని విని త్రిశూలి నది వద్దకు వెళ్లి చూశాం. అక్కడ కనిపించిన దృశ్యాలను మాటల్లో వర్ణించలేం" అని పోలీస్ హెడ్ కానిస్టేబుల్ దినేష్ సింగ్ ఠాకూర్ చెప్పారు. కరెంట్, నీరు లేకపోయినా స్థానిక అధికారులు తమను ఎంతో ఆదుకున్నారని తెలిపారు. ఈ కష్టసమయంలో ఒక మర్చిపోలేని మధుర ఘట్టం కూడా జరిగింది. పండుగ రోజు తమ సోదరీమణులు ఇచ్చిన రాఖీలను, అక్కడ విధుల్లో ఉన్న స్థానిక మహిళా భద్రతా సిబ్బంది ఆ ఐదుగురి చేతులకు కట్టడం వారిని తీవ్రంగా భావోద్వేగానికి గురిచేసింది.

భయంతో గడిపిన రాత్రులు.. ఎట్టకేలకు స్వదేశానికి

మరోసారి వరదలు ఎక్కడ ముంచుకొస్తాయోనన్న భయంతో రెండు రోజులు కార్లోనే నిద్రలేకుండా గడిపినట్లు టైలరింగ్ షాప్ నడిపే దినేష్ ఓజా తెలిపారు. ఇంటర్నెట్ సేవలు అందుబాటులో ఉండటంతో భారత ప్రభుత్వ హెల్ప్‌లైన్ ద్వారా కుటుంబ సభ్యులతో నిరంతరం టచ్‌లో ఉండి, ఆగస్టు 28న నేపాల్ నుంచి బయలుదేరి శనివారం నాటికి క్షేమంగా ఇళ్లకు చేరుకున్నారు.

700 దాటిన నేపాల్ వరద మృతుల సంఖ్య

ఈ భయానక జలప్రళయం సృష్టించిన విధ్వంసం తీవ్రంగా ఉంది. నేపాల్‌లో శనివారం నాటికి అధికారిక లెక్కల ప్రకారం మృతుల సంఖ్య 734కి చేరగా, టిబెట్‌లో 16 మంది ప్రాణాలు కోల్పోయారు. ఇప్పటికీ నేపాల్‌లో దాదాపు 2,426 మంది, టిబెట్ పరిధిలో 554 మందితో కలిపి మొత్తం 3,000 మందికి పైగా గల్లంతయ్యారు. అక్కడ ఐదో రోజు కూడా సహాయక చర్యలు ముమ్మరంగా కొనసాగుతున్నాయి.