Viral: తీవ్రమైన కడుపు నొప్పితో అస్పత్రికొచ్చిన వ్యక్తి.. వైద్యులు టెస్టులు చేయగా.. ఎక్స్‌రేలో.!

Viral: హరియాణాలోని ఫరీదాబాద్ రోగికి వైద్యులు లాపరోస్కోపీ ఆపరేషన్ చేసి పిత్తాశయం నుంచి ఏకంగా 4000కు పైగా రాళ్లను విజయవంతంగా తొలగించారు.

మానవ శరీరంలో జరిగే విచిత్రమైన ఆరోగ్య సమస్యలు ఎప్పుడూ వైద్యులను ఆశ్చర్యానికి గురిచేస్తుంటాయి. సాధారణంగా పిత్తాశయంలో రాళ్లు ఏర్పడటం అనేది చాలా మందిలో కనిపిస్తుండే సాధారణ సమస్యే. కానీ ఒకే వ్యక్తిలో వేల సంఖ్యలో రాళ్లు తయారవడం అనేది వైద్య రంగంలోనే ఒక అరుదైన విషయంగా నిలుస్తుంది. తాజాగా హరియాణా రాష్ట్రంలో వెలుగు చూసిన ఒక ఘటన వైద్యులను సైతం విస్మయానికి గురిచేసింది. ఒక రోగి పిత్తాశయం నుంచి వైద్యులు ఏకంగా నాలుగు వేలకు పైగా రాళ్లను విజయవంతంగా బయటికి తీశారు.

హరియాణాలోని ఫరీదాబాద్‌కు చెందిన ఒక వ్యక్తి తీవ్రమైన కడుపు నొప్పితో బాధపడుతూ స్థానిక ఆసుపత్రికి వచ్చారు. ఆయన పడుతున్న ఇబ్బందిని చూసిన వైద్యులు వెంటనే పలు రకాల పరీక్షలు నిర్వహించారు. రిపోర్టులు రాగానే వైద్యులు ఒక్కసారిగా అవాక్కయ్యారు. ఆయన పిత్తాశయంలో ఒకట్రెండు కాదు, లెక్కలేనన్ని రాళ్లు ఉండిపోవడాన్ని గుర్తించారు. వెంటనే శస్త్రచికిత్స చేయాలని వైద్యులు నిర్ణయించారు.

ఆ రోగికి లాపరోస్కోపీ ఆపరేషన్ నిర్వహించి.. పిత్తాశయం లోపల పేరుకుపోయిన రాళ్లన్నింటినీ ఒక్కొక్కటిగా బయటికి తీశారు. లెక్కించి చూస్తే ఆ రాళ్ల సంఖ్య ఏకంగా నాలుగు వేలకు పైగా ఉండటం చూసి వైద్య సిబ్బంది సైతం ఆశ్చర్యపోయారు. ఒకే మనిషి శరీరంలో ఇన్ని వేల సంఖ్యలో రాళ్లు ఏర్పడటం వైద్య చరిత్రలోనే చాలా అరుదైన ఘటన అని వైద్యులు వెల్లడించారు.

సాధారణంగా పిత్తాశయంలో చిన్నపాటి రాళ్లు ఉంటేనే విపరీతమైన నొప్పి వస్తుంది. అలాంటిది ఏకంగా నాలుగు వేల రాళ్లు ఉన్నప్పటికీ ఆ వ్యక్తి ఆ నొప్పులను భరిస్తూ వచ్చారంటే నిజంగా ఆశ్చర్యకరమే. సర్జరీ విజయవంతంగా ముగిసిన తర్వాత ప్రస్తుతం ఆ రోగి ఆరోగ్యం చాలా నిలకడగా ఉందని వైద్యులు తెలిపారు. ఆయనకు ఎలాంటి ప్రాణాపాయం లేదని, పూర్తిగా కోలుకుంటున్నారని స్పష్టం చేశారు.

ఇలాంటి ఆరోగ్య సమస్యలు తలెత్తకుండా ఉండాలంటే ఆహారపు అలవాట్లపై ప్రత్యేక శ్రద్ధ పెట్టాలని నిపుణులు సూచిస్తున్నారు. శరీరంలో కొలెస్ట్రాల్ స్థాయిలు నియంత్రణలో లేకపోవడం, సరైన సమయానికి ఆహారం తీసుకోకపోవడం వంటి కారణాల వల్ల పిత్తాశయంలో రాళ్లు ఏర్పడే అవకాశం ఉంది. కడుపులో ఎప్పుడైనా విపరీతమైన నొప్పి వస్తే నిర్లక్ష్యం చేయకుండా వెంటనే వైద్యులను సంప్రదించడం మంచిదని ఈ ఘటన మరోసారి నిరూపించింది.