Viral Video: జాతరలో కొన్న బెడ్‌షీట్‌ ఉతికిన మహిళ.. ఆపై దాని మీద కనిపించిన లేబుల్ చూడగా

Viral video: దేశంలో స్థానిక మార్కెట్లలో పొరుగు దేశమైన పాకిస్తాన్‌కు చెందిన వస్తువులు దర్శనమివ్వడం ఇప్పుడు తీవ్ర కలకలం రేపుతోంది. సాధారణంగా మనం మార్కెట్లో వస్తువులు కొనేటప్పుడు అది ఎక్కడ తయారైందో చూస్తుంటాం. కానీ, ఒక మహిళ జాతరలో కొనుగోలు చేసిన బెడ్‌షీట్‌ను ఇంటికి తీసుకెళ్లి ఉతికిన తర్వాత, దానికి ఒక మూలన దాగి ఉన్న 'మేడ్ ఇన్ పాకిస్తాన్' లేబుల్ బయటపడటంతో ఖంగుతింది. మహారాష్ట్రలోని పూణేలో జరిగిన ఈ విచిత్రమైన ఘటనకు సంబంధించిన వీడియో ఇప్పుడు సోషల్ మీడియాలో వైరల్ అవుతోంది.

పూణేకి సమీపంలోని పింప్రి-చించ్వాడ్ పరిధిలో ఉన్న శ్రీ మోరయా గోసావి ఆలయం వద్ద ఇటీవల సంకష్ట చతుర్థి సందర్భంగా ఒక జాతర జరిగింది. ఈ జాతరకు వెళ్లిన ఒక మహిళ అక్కడి స్థానిక వ్యాపారి వద్ద ఒక కొత్త బెడ్‌షీట్ కొనుగోలు చేసింది. కొనేటప్పుడు ఆ బెడ్‌షీట్‌పై ఎలాంటి లేబుల్స్ లేదా అనుమానాస్పద గుర్తులు ఆమెకు కనిపించలేదు. అయితే, ఇంటికి వెళ్లిన తర్వాత ఆ బెడ్‌షీట్‌ను ఉపయోగించే ముందు ఒకసారి వాష్ చేసింది. ఆశ్చర్యకరంగా, ఉతికిన తర్వాత ఆ బెడ్‌షీట్ మూలన ఉన్న ఒక లేబుల్ స్పష్టంగా బయటపడింది. దానిపై 'మేడ్ ఇన్ పాకిస్తాన్' అని రాసి ఉండటం చూసి ఆమె అవాక్కైంది.

దీంతో వెంటనే ఆ మహిళ ఈ బెడ్‌షీట్ లేబుల్‌ను వీడియో తీసి సోషల్ మీడియాలో పోస్ట్ చేసింది. రెండు దేశాల మధ్య వాణిజ్య సంబంధాలు దాదాపుగా నిలిచిపోయిన ఈ తరుణంలో, పాకిస్తాన్‌లో తయారైన ఒక వస్తువు మహారాష్ట్రలోని స్థానిక మార్కెట్లోకి అక్రమంగా ఎలా వచ్చిందంటూ ఆమె ఆ వీడియోలో ప్రశ్నించింది.

ఈ వీడియో ఆన్‌లైన్‌లో వైరల్ కావడంతో, పింప్రి-చించ్వాడ్ పోలీసులు వెంటనే అప్రమత్తమయ్యారు. ఈ వ్యవహారంపై దర్యాప్తు చేయడానికి ఒక ప్రత్యేక బృందాన్ని ఏర్పాటు చేశారు. జాతరలో ఈ బెడ్‌షీట్‌ను విక్రయించిన వ్యాపారి ఎవరు? ఈ పాకిస్తాన్ వస్తువుల స్టాక్ ఎక్కడి నుంచి సరఫరా అయింది? దీని వెనుక ఏదైనా పెద్ద సప్లై చైన్ నెట్‌వర్క్ ఉందా? అనే కోణంలో పోలీసులు ముమ్మరంగా దర్యాప్తు చేస్తున్నారు. అంతేకాకుండా, స్థానిక మార్కెట్లలో ఇలాంటి వస్తువులు విక్రయిస్తున్న వారిపై కఠిన చర్యలు తీసుకోవాలని మున్సిపల్ కార్పొరేషన్ అధికారులకు కూడా పోలీసులు అధికారికంగా లేఖ రాశారు.

సరిగ్గా ఈ ఘటనకు ఒక్కరోజు ముందే, మహారాష్ట్రలోని ఔరంగాబాద్ జిల్లాలో కూడా 'మేడ్ ఇన్ పాకిస్తాన్' అని ఉన్న కొన్ని సౌందర్య సాధనాలను విక్రయిస్తున్న ముగ్గురు వ్యక్తులను పోలీసులు అరెస్ట్ చేశారు. వరుసగా ఇలాంటి ఘటనలు వెలుగుచూస్తుండటంతో దేశ భద్రత, అక్రమ దిగుమతులపై ప్రజల్లో తీవ్ర ఆందోళన వ్యక్తమవుతోంది. ఈ పాకిస్తాన్ బ్రాండ్ వస్తువుల వెనుక ఉన్న అసలు గుట్టు ఏమిటో పోలీసుల పూర్తి దర్యాప్తులో తేలాల్సి ఉంది.