Viral Video: అన్నీ ప్రభుత్వాలే చేయాలా? రోడ్డు ప్రమాదాలను అరికడుతూ రియల్ హీరోగా మారిన యువకుడు!

Viral Video: మన దేశంలో ప్రతి ఏటా రోడ్డు ప్రమాదాల కారణంగా లక్షలాది మంది ప్రాణాలు కోల్పోవడం అత్యంత ఆందోళనకరమైన విషయం. దేశంలో 2025లో ఏకంగా 1.83 లక్షల మంది రోడ్డు ప్రమాదాలలో ప్రాణాలు కోల్పోవడం ఎంతో విషాదకరమని నివేదికలు వెల్లడిస్తున్నాయి. ఈ దుర్ఘటనలకు అతివేగంతో పాటు పాడైపోయిన రోడ్లు, సరిగ్గా కనిపించని ట్రాఫిక్ బోర్డులు, సైన్‌బోర్డులు ప్రధాన కారణాలుగా మారుతున్నాయి. ప్రతి చిన్న విషయానికి ప్రభుత్వాలు లేదా అధికారులే అన్నీ చేయాలని ఎదురుచూడకుండా, సమాజం పట్ల తమ బాధ్యతను గుర్తుంచుకుని కొందరు ముందుకు వస్తుంటారు. అలాంటి కోవకే చెందిన కేరళకు చెందిన వివేకానందన్ అనే యువకుడు ఎవరి సహాయం కోరకుండా పూర్తిగా సొంతంగా రంగంలోకి దిగి అందరి ప్రశంసలు అందుకుంటున్నాడు.

రోడ్లపై ప్రయాణించే ప్రయాణికుల ప్రాణాలను కాపాడాలనే గొప్ప ఉద్దేశంతో ఆయన ఈ సాహసోపేతమైన నిర్ణయం తీసుకున్నారు. తన చుట్టుపక్కల ప్రాంతాలలో ఉన్న 200లకు పైగా సైన్‌బోర్డులను స్వయంగా శుభ్రం చేసి స్పష్టంగా కనిపించేలా చేశారు. ఎదిగిన చెట్ల కొమ్మల వల్ల ట్రాఫిక్ సిగ్నల్స్, బోర్డులు సరిగ్గా కనిపించని చోట తానే స్వయంగా పాదలను కత్తిరించి, రోడ్లపై ఏర్పడిన గుంతలను పూడ్చుతూ ప్రమాదాల నివారణకు అంకితభావంతో కృషి చేస్తున్నారు. ప్రభుత్వ యంత్రాంగంపైనే ఆధారపడకుండా ఒక సాధారణ పౌరుడు తాను నమ్మిన సిద్ధాంతం కోసం చేపట్టిన ఈ సామాజిక సేవ నేటి యువతకు నిజంగా స్ఫూర్తిదాయకం అని చెప్పవచ్చు.

కాగా, వివేకానందన్ చేస్తున్న ఈ సేవలు కేవలం ప్రమాదాలను తగ్గించడమే కాకుండా తోటి పౌరులలో సామాజిక స్పృహను కూడా పెంపొందిస్తున్నాయి. చిన్నపాటి చొరవ తీసుకుంటే మన చుట్టూ జరిగే అనేక అనర్థాలను, ప్రాణనష్టాలను నివారించవచ్చని ఆయన నిరూపించి చూపారు. ఇలాంటి రియల్ హీరోలను సమాజం గుర్తించి ప్రోత్సహించడం ద్వారా మరికొందరు ముందుకు వచ్చే అవకాశం ఉంటుంది. రోడ్డు భద్రత అనేది కేవలం ప్రభుత్వాల బాధ్యత మాత్రమే కాదని, ప్రతి ఒక్కరు తమ వంతు బాధ్యతగా భావించి స్పందించాలని ఈ ఘటన మనకు స్పష్టం చేస్తోంది.