Viral Video: పాము చచ్చింది.! పులి ఎంచక్కా ఆరగించింది.. నెట్టింట వీడియో వైరల్..

Viral Video: ఉత్తరాఖండ్‌లోని ప్రఖ్యాత జిమ్ కార్బెట్ టైగర్ రిజర్వ్‌లో ఒక అరుదైన ఘటన చోటుచేసుకుంది. పెద్ద పులి ఒకటి భారీ పామును తన నోట కరచుకుని అడవిలోకి వెళ్తున్న దృశ్యం కెమెరాలో చిక్కగా, ప్రస్తుతం ఈ వీడియో నెట్టింట తెగ వైరల్ అవుతోంది.

అడవిలో జీవనం ఎప్పుడూ అత్యంత కఠినంగా ఉంటుంది. "ఎవరిని వారు చంపుకు బతకాలి" అనే ఏకైక నియమంపైనే అక్కడి వన్యప్రాణుల మనుగడ ఆధారపడి ఉంటుంది. అడవిలో అత్యంత భయంకరమైన, శక్తివంతమైన వేటాడే జంతువులలో పులులు ముందుంటాయి. అయితే, ఎప్పుడూ కనిపించని విధంగా రెండు శక్తివంతమైన జంతువులు ఎదురుపడినప్పుడు ఆ దృశ్యం అత్యంత అరుదుగా మారుతుంది. తాజాగా ఉత్తరాఖండ్‌లోని ప్రసిద్ధ కార్బెట్ టైగర్ రిజర్వ్‌లో ఇలాంటి అరుదైన ఘటనే ఒకటి వెలుగు చూసింది. అక్కడ సఫారికి వెళ్లిన టూరిస్టుల కంట పడిన ఈ దృశ్యం సోషల్ మీడియాలో విపరీతంగా ట్రెండ్ అవుతోంది.

కార్బెట్ టైగర్ రిజర్వ్‌లోని జైత్రనా రేంజ్‌లో పూర్తి పరిపక్వత చెంది ఉన్న ఒక పెద్ద పులి కనిపించింది. అకస్మాత్తుగా ఆ పులి పైథాన్ కుటుంబానికి చెందిన ఒక పెద్ద పామును తన పదునైన కోరలతో నోట పట్టుకుంది. సరిగ్గా పట్టు దొరికేలా కాసేపు సర్దుకుని, ఆ తర్వాత ఎలాంటి భయం లేకుండా అత్యంత ప్రశాంతంగా ఆ పెద్ద పామును నోట్లో ఉంచుకుని పొదల్లోకి నడుచుకుంటూ వెళ్లిపోయింది. ఈ వినూత్న దృశ్యాన్ని అక్కడ సఫారికి వచ్చిన పర్యాటకులు తమ కెమెరాల్లో బంధించారు. కార్బెట్ టైగర్ రిజర్వ్ ఫీల్డ్ డైరెక్టర్ సాకేత్ బడోలా, ఐఎఫ్‌ఎస్ అధికారి భానుదాస్ పింగిల్ దీనికి సంబంధించిన వీడియోను సోషల్ మీడియాలో షేర్ చేయగా, అది కాస్తా వైరల్‌గా మారింది.

కాగా, సాధారణంగా పులులు జింకలు, సాంబార్లు, అడవి పందుల వంటి జంతువులను వేటాడటం చూస్తుంటాం. కానీ, ఒక పులి పామును వేటాడి నోట కరచుకుని వెళ్లడం మాత్రం బిలియన్‌లో ఒకసారి జరిగే అరుదైన పరిణామమని వన్యప్రాణి నిపుణులు అభిప్రాయపడుతున్నారు. "కార్బెట్‌లో ఉన్నప్పుడు ఎప్పుడైనా ఊహించని పరిణామాలు ఎదురుకావడానికి సిద్ధంగా ఉండాలి" అంటూ అధికారులు ఈ వీడియోను పోస్ట్ చేశారు. ప్రకృతిలో ఏమైనా సాధ్యమేనని నిరూపించే ఈ అరుదైన వీడియో చూసి నెటిజన్లు ఆశ్చర్యపోతూ రకరకాలుగా స్పందిస్తున్నారు.