Viral: ఇదేందిది.! ఆ గ్రామంలో ఇంటి పైకప్పులే రోడ్లు.. ఎక్కడో తెలుసా.?

Viral: ప్రపంచవ్యాప్తంగా ఎన్నో విభిన్నమైన ప్రదేశాలు అలాగే ప్రత్యేకత కలిగిన గ్రామాలు ఉన్నాయి. కొన్ని ప్రాంతాలు తమ సంస్కృతి ద్వారా గుర్తింపు పొందితే మరికొన్ని తమ విచిత్రమైన నిర్మాణ శైలితో అందరినీ ఆశ్చర్యపరుస్తుంటాయి. తాజాగా అలాంటి కోవకు చెందిన ఒక అద్భుతమైన గ్రామం గురించి ఇంటర్నెట్‌లో చర్చ జరుగుతోంది. నార్త్ ఇరాన్‌లో ఉన్న ఒక ప్రత్యేకమైన గ్రామం పర్యాటకులను విపరీతంగా ఆకట్టుకుంటోంది. ఈ గ్రామానికి సంబంధించిన ఆసక్తికరమైన వివరాలు ప్రస్తుతం సోషల్ మీడియాలో వైరల్ అవుతున్నాయి.

అందుతున్న సమాచారం ప్రకారం నార్త్ ఇరాన్‌లోని మసూలే గ్రామంలో ఎలాంటి సాధారణ రోడ్లు ఉండవు. కొండను ఆనుకొని మెట్లుగా నిర్మించిన ఇళ్ల పైకప్పులే అక్కడి ప్రజలకు ప్రధాన రహదారులుగా మారుతుంటాయి. ఒక ఇల్లు పైకప్పు మరో ఇల్లు ముంగిట రోడ్డులా మారే విధంగా ఈ గ్రామం నిర్మాణ శైలి ఉంటుంది. పర్వత ప్రాంతాలలో లభించే భద్రత అలాగే ప్రత్యేక వ్యాపార అవకాశాల కారణంగా కొన్ని శతాబ్దాల నుంచి ప్రజలు ఇక్కడ నివసిస్తున్నారు. ఈ విభిన్నమైన నిర్మాణ శైలి ప్రపంచవ్యాప్తంగా ఉన్న టూరిస్టులను ఎంతగానో ఆకర్షిస్తోంది.

ఈ గ్రామానికి మరో ముఖ్యమైన ప్రత్యేకత ఏమిటంటే ఇక్కడ మోటారు వాహనాలను పూర్తిగా అనుమతించరు. ఇరాన్ దేశంలోనే వాహనాల రాకపోకలపై పూర్తిగా నిషేధం ఉన్న ఏకైక గ్రామం ఇదే కావడం విశేషం. రోడ్లు లేకపోవడం అలాగే ఇళ్ల పైకప్పులపై నడవాల్సి ఉండటం వల్ల ఇక్కడ కార్లు లేదా బైక్‌లు తిరిగే అవకాశం ఉండదు. దీనివల్ల ఈ గ్రామంలో వాయు కాలుష్యం అనే సమస్యే ఉండదని పర్యావరణ నిపుణులు చెబుతున్నారు. ప్రశాంతమైన వాతావరణం కోరుకునే వారికి ఈ గ్రామం ఒక చక్కటి పర్యాటక ప్రాంతంగా నిలుస్తోంది.

పర్యాటకులు ఈ గ్రామాన్ని సందర్శించడానికి ఎక్కువగా ఆసక్తి చూపుతుంటారు. కొండల నడుమ ప్రకృతి అందాల మధ్య సాగే ఈ జీవన విధానం చూడటానికి రెండు కళ్లు చాలవని సందర్శకులు అభిప్రాయపడుతున్నారు. ఆధునిక ప్రపంచానికి దూరంగా సంప్రదాయ పద్ధతులను పాటిస్తూ జీవిస్తున్న ఈ గ్రామం అందరికీ ఆశ్చర్యం కలిగిస్తోంది. ఈ గ్రామానికి సంబంధించిన విశేషాలు టూరిజం వెబ్‌సైట్లలో ప్రత్యేక ఆకర్షణగా నిలుస్తున్నాయి. రాబోయే రోజుల్లో ఈ ప్రాంతాన్ని సందర్శించే టూరిస్టుల సంఖ్య మరింత పెరిగే అవకాశం ఉందని అంచనా వేస్తున్నారు.